2 Makani 34
34
Mwami Josiya waku Juda
(2 Bami 22.1-2)
1Josiya wakajisi myaka iili lusele ciindi naakatalika kulela, wakalela mu Jelusalemu kwamyaka iili makumi otatwe aumwi. 2Walo ooyu wakacita ziluleme ku Mwami Leza alimwi wakeenda munzila zyasikale wakwe Devedi, taakazisiya pe.
Josiya mbwaakamwaya zipaililo zyamituni
3Mumwaka walusele wakulela kwa Josiya aawo kacili mwana, Josiya wakatalika kukomba Leza wa Devedi sikale wakwe. Mumwaka wakkumi aibili wakulela kwakwe wakatalika kugwisya malende, misumpuululu yaleza mukaintu Asyela, mituni iibezedwe ayalubulo mucisi ca Juda a Jelusalemu. 4Zipaililo zya Baali zyakamwaigwa mukulailila kwakwe. Wakapwayaula tupaililo twatununkilizyo twakali alinzizyo. Alimwi wakapwaya misumpuululu ya Asyela kubikkilizya amituni azibumbwa. Eezi wakazipwayaula akuzimwaila azyuumbwe zyabaabo bakali kupaizya kulinzizyo. 5Mafuwa aabapaizi bamalende wakaaumpila aazipaililo zyamalende eezyo. Munzila eeyi wakasalazya bacisi ca Juda abamu Jelusalemu mumulawo. 6Wakacita mbubonya oobo muminzi yazisi zya Manase, Efulemu, a Simiyoni mane kuyoosika ku Nafutali kumatongo aankuko. 7Wakamwaya zipaililo, misumpuululu ya Asyela akupwayaula mituni, amane wapwayaula zipaililo zyatununkilizyo kumalende. Azwe waawo wakapilukila ku Jelusalemu.
Bbuku lyamulawo mbulyakajanwa
(2 Bami 22.3-20)
8Lino mumwaka wakkumi alusele wakulela kwa Josiya, kamanizizye kale kusalazya nyika aŋanda ya Leza, wakatuma Syafani mwana wa Azaliya, a Maaseiya mwendelezi wamunzi antoomwe a Jowa mwanaa Jowahazi mulembi kuyoobambulula ŋanda ya Mwami Leza. 9Bakainka kuli Hilikiya mupaizi mupati wabo wakabapa mali aakali kuletwa kuŋanda ya Mwami Leza, aayo Balevi balo bali mbalindizi baamulyango ngibakali kutambula kuzwa kubantu bazisi zya Manase, Efulemu, abamwi basyeede ku Isilayeli akubantu boonse bacisi ca Juda a Benjamini, kubikkilizya abakali kukkala mu Jelusalemu. 10Aayo mali apegwe kuli basikulanga basikubeleka kuŋanda ya Leza balo bakape basimilimo bakali kubambulula ŋanda eeyo. 11Alimwi bakapa mali kubabezi abayaki bakaula mabwe aakuyasya amasomo ambalo zyakubambuluzya maanda aayo bami baku Juda ngubakalekelela kuti awe. 12Baalumi aaba bakali kusyomeka kapati. Bakali kubalanga akubalailila mbaa, Jahati mwana wa Obaiya, Balevi balunyungu lwa Melali, a Zekaliya mwana Mesyulamu walunyungu lwa Kohati, kubikkilizya a Balevi boonse bakazi kwiimbya zingwali-ngwali. 13Bamwi Balevi bakali kulanga banyamuna zintu ababelesi bamilimo imwi. Bamwi babo bakali balembi, basikulanga babeleka, bamwi bakali balindizi.
14Ciindi nibakali kugwisya mali muciyobwedo, Hilikiya wakajana bbuku lyamulawo eelyo Mwami Leza ndyaakapede kuli Mozesi. 15Lino Hilikiya mupaizi mupati wakati kuli syafani mulembi, “Ndajana bbuku lyamulawo muŋanda ya Mwami Leza.” Nkabela Hilikiya wakapa bbuku eelyo kuli Syafani. 16Mpawo Syafani wakalitola kumwami, wamwaambila makani aakuti, “Balupati-pati bako bacita eezyo zyoonse nzyookabalailila. 17Mali aali muŋanda ya Mwami Leza baapa kubalangi ababelesi.” 18Eelyo Syafani mulembi wakaambila mwami kuti, “Hilikiya mupaizi wandipa bbuku.”
Mpawo Syafani wakalibala mwami kamvwide. 19Lino mwami naakamvwa majwi aabbuku lyamulawo wakazapula zisani zyakwe. 20Mpawo mwami wakalailila Hilikiya, Ahikamu mwanaa Syafani, Abidoni mwanaa Mika, Syafani mulembi a Asaiya mugwasyi wamwami kuti, 21“Kamuya mukandibuzizye mebo a Baisilayeli basyeede abantu ba Juda ku Mwami Leza akaambo kazilembedwe mubbuku eeli lyakajanika. Nkaambo bukali bwa Mwami Leza bwatusikila mbupati mukuti basikale besu tiibakatobela majwi aabbuku eeli pe, tiibakacita mukweendelana azyoonse zilembedwe mulindilyo.”
22Hilikiya antoomwe abaabo Josiya mbaakatuma anguwe bakainka antoomwe kuli Huluda mukaintu musinsimi, mukaintu wa Syalumu mwanaa Tokati mwanaa Hasila wakali kulanga zyakusama. Mukaintu ooyo wakali kukkala mubusena bupya bwa Jelusalemu. Bakamwaambila zyakacitika. 23Eelyo mukaintu ooyo wakati, “Mboobu mbwaamba Mwami Leza wa Isilayeli, ‘Amukamwaambile ooyo wamutuma’ kuti Mwami Leza ulati, 24‘Mboobu mbwaamba Mwami Leza,’ bona ncobeni ndiyooleta mapenzi mubusena oobu ansinganyo zilembedwe mubbuku eeli lyabalilwa mwami wa Juda. 25Nkaambo bakandisiya akutentela baleza bambi tununkilizyo akundinyemya, amituni yoonse eeyi njibakalibambila, nkaako bukali bwangu bwabukila busena oobu, nkabela tabutimane pe. 26Amukaambile mwami wa Juda wamutuma kuzoobuzya Mwami Leza kuti, ‘Mboobu mbwaamba Mwami Leza wa Isilayeli amajwi aayo ngoomvwa,’ 27nkaambo kakuti wasungwaala akulibombya kuli Leza noomvwa mbundaamba akaambo kabusena oobu antoomwe abantu bali muli mbubo, alimwi akaambo kakuti walibombya alimwi mukuti wazapula zisani zyako akulila kumbele lyangu, ambebo ndakumvwa, mbwaamba Mwami Leza. 28Nkaako uyoofwa akuzikkwa abasikale bako muluumuno, tokooyoobona mapenzi ngendiyooletela busena oobu abantu bakkala mulimbubo pe.” Eelyo mwami bakazoomwaambila majwi aaya.
Josiya mbwaakalesya bukombi bwakunze
(2 Bami 23.1-20)
29Lino mwami Josiya wakaita bapati bacisi ca Juda abamu Jelusalemu. 30Mwami wakainka kuŋanda ya Mwami Leza antoomwe abantu bacisi ca Juda abamu Jelusalemu, bapaizi a Balevi abantu boonse, kuzwa kubantu buyo kuyoosika kuli baabo balemekwa. Wakabala majwi aabbuku lyacizuminano eelyo lyakajanwa muŋanda ya Leza kabamvwide. 31Mwami wakaliimvwi munsi aamusemo akukubulusya cizuminano kumbele lya Mwami Leza, kuti unootobela majwi amalailile woonse amuuya wakwe woonse akuswiilila majwi aacizuminano eeci mbubonya mbuli mbwaalembedwe mubbuku eeli. 32Lino aawo wakaambila boonse bamu Jelusalemu abamucisi ca Benjamini kuti kababamba cizuminano eeci. Bantu bamu Jelusalemu bakaswiilila cizuminano ncibakapanga a Leza wabasikale babo. 33Josiya wakagwisya mituni yoonse iisesemya yakali ya Baisilayeli, alimwi wakacita kuti boonse bakalimo mu Isilayeli bakombe Mwami wabo. Kwaciindi coonse ncaakali kupona, bantu bakali kutobela Mwami Leza wabasikale babo.
Currently Selected:
2 Makani 34: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
