2 Makani 32
32
Baasiliya mbubakapingila munzi wa Jelusalemu
(2 Bami 18.13-37; 19.14-19, 35-37; Izaya 36.1-22; 37.8-38)
1Hezekiya mbwakamanina buyo kucita zeezyo nzyaakabelekela Mwami Leza cakusyomeka, Senakelibu mwami waku Asiliya wakasaala cisi ca Juda. Wakasinkilizya minzi yakakwabilidwe kuyanda kuti aitole. 2Ciindi Hezekiya naakabona kuti Senakelibu uyanda kuulwana munzi wa Jelusalemu, 3wakabuzya-buzya balupati-pati bakwe kubikkilizya abasilumamba zyamakani aakusinka maanzi aatusensa tuli anze lyamunzi, eelyo bakamuzuminina. 4Bantu banji bakabungana akusinka tusensa kuti maanzi kaatazwi muli ntuto, nkaambo bakati mwami waku Asiliya atajani maanzi manji munsi aamunzi. 5Kumane wakabeleka canguzu kubambulula bwaanda oomo mubwakoolekede akuyaka maanda malamfu aakulikwabilizya alimbubo. Kuzwa waawo wakayaka abumbi bwaanda kunze aaboobu bumwi. Amane wakabambulula zilikwabilizyo zyamunzi wa Devedi. Alimwi wakapanga zilwanyo antobo zinji. 6Wakasala bapati babasilumamba kulanga bantu akubayumya-yumya amajwi aaya, 7“Amuyume muzyandamane. Mutayoowi nikuba kutyompwa akaambo kamakani aamwami waku Asiliya uujisi mpi mpati. Swebo tujisi singuzu kwiinda mbabo. 8Tee walo ujisi bantu balya maila, pele swebo wesu ngu Mwami Leza uukonzya kutugwasya amulumamba.” Mwami Hezekiya naakaamba boobo bantu bakayuma-yuma.
9Ba Asiliya ampi yabo nibakacili ku Lakisyi, Senakelibu wakatuma balupati-pati bakwe ku Jelusalemu amajwi aaya kuli Hezekiya mwami wacisi ca Juda abantu mbaakali aabo wati, 10“Mboobu mbwaamba mwami Senakelibu waku Asiliya ulati, ‘Ncinzi cimutunzizye kuti kamukkede mu Jelusalemu nomusinkilizigwa?’ 11Ciindi Hezekiya namwaambila kuti, ‘Mwami Leza wesu ulatuvuna kuzwa ku Baasiliya,’ ulamucenga kuti mufwe nzala anyota. 12Tee kayi Hezekiya lwakwe mwini nguwakamwaya malende azipaililo zya Leza ooyu kati kuli baku Juda abaku Jelusalemu, ‘Mweelede kukombela kucipaililo comwe akupaizya alincico?’ 13Sena tamuzi eezyo nzitwakacita ataata kumanyika amwi? Sena baleza bamanyika aayo bakakonzya kubavuna bantu kuzwa kulindime? 14Nguuli wabaleza bamanyika aaya taata ngaakanyonyoona wakali kukonzya kuvuna bantu bakwe kuzwa kulindime? Ani inga nywebo leza wanu wamuvuna buti kuzwa kulindime? 15Nkaako Hezekiya atamuunini akumucenga, Mutamusyomi, nkaambo kunyina leza wamusyobo umwi naa bwami bumwi bwakali kukonzya kuvuna bantu babo kuzwa kulindime naa kuli taata. Ino mbuti leza wanu ooyo mbwanga wamuvuna kuzwa kulindime!”
16Kwiindilizya waawa balupati-pati ba Senakelibu abalo bakasaaza Mwami Leza a mubelesi wakwe Hezekiya. 17Mwami wabo wakalemba akutukana Mwami Leza wa Isilayeli kati, “Mbubonya mbuli baleza bamisyobo yamanyika amwi mbubatakali kukonzya kuvuna bantu babo kuzwa kulindime, awalo leza wa Hezekiya takonzyi kuvuna bantu bakwe kulindime.” 18Balupati-pati aabo bakapozomoka majwi aaya Mucihibulu mukuti bayoosye akutyompya bantu bamu Jelusalemu bakali aabwaanda bwamunzi. Bakacita oobo kuti cibaubaubile kutola munzi ooyo. 19Bantu aaba bakali kukanana zya Leza waku Jelusalemu mbubonya mbuli mbubakali kwaamba zyabaleza babantu bamanyika amwi, aabo bapangwa amaanza aabantu.
20Hezekiya amusinsimi Izaya mwana wa Amozi bakalilila Leza wakujulu kuli ceeci. 21Aawo Leza wakatuma mungelo wakazoonyonyweeda limwi boonse basilumamba, basololi, abalupati-pati muzivuka zyamwami waku Asiliya. Aboobo mwami wabo wakapilukila kulimbabo kauside. Naakanjila muŋanda yaleza wakwe, bana bakwe beni bakamujaya amapanga.
22Mbombuboobu Mwami Leza mbwaakavuna Hezekiya abantu baku Jelusalemu kuzwa kuli Senakelibu mwami waku Asiliya akuli bamwi boonse. Wakabakwabilila kuzwa kumabazu oonse. 23Bantu banji bakali kuza ku Jelusalemu, kabaleta zipaizyo ku Mwami Leza azipego kuli Hezekiya. Kuzwa waawo bamasi oonse bakali kulemeka Hezekiya.
Mwami Hezekiya mbwakaciswa akupona
(2 Bami 20.1-3, 12-19; Izaya 38.1-3; 39.1-8)
24Lino ciindi eeco mwami Hezekiya wakaciswa calufu. Wakakomba ku Mwami Leza walo wakamupa citondezyo cakuti ulapona. 25Pele Hezekiya wakali kulikankaizya cakuti taakatondezya kulumba ku Mwami Leza kuli ceeco ncaakamucitila. Nkaako bukali bwa Mwami Leza bwakamusikila abamu Juda abaku Jelusalemu. 26Kumamanino Hezekiya abaku Jelusalemu bakalibombya, nkaako Mwami Leza taakabasubula muciindi cakulela kwa Hezekiya.
Zyabuvubi ampuwo ya Hezekiya
27Hezekiya wakavuba kapati cakuti bakatalika kumulemeka. Wakayasya maanda aaziyobwedo zyangolida, nsiliva, mabwe mayandisi, tununkilizyo, ntobo, azimwi zibelesyo ziyandika. 28Kuzwa waawo wakayaka matala aakubikka maila, azibikkilo zyawaini amafuta, alimwi wakayaka azimpati zyaŋombe azyamaanda aambelele. 29Kunze aaboobo Mwami Leza wakamupa mbelele, ŋombe alimwi alubono lumwi lunji cakuti wakayaka minzi minji. 30Hezekiya nguwakasinka kasensa kaku Gehoni akusya kankolola kutegwa maanzi akunkile kumbo lyamunzi wa Devedi. Wakazwidilila mulizyoonse nzyaakacita. 31Ciindi batumwa baku Babuloni nibakasika kulinguwe kuzoobuzya zyamaleele aakacitika munyika, Leza wakalekelezya Hezekiya mukuti abone mpaakabikide moyo.
Mamanino aakulela kwa Hezekiya
(2 Bami 20.20-21)
32Lino zimwi eezyo zyakulela kwa Hezekiya amilimo yakulyaaba kwakwe, zililembedwe mucilengaano ca Izaya musinsimi mwana wa Amozi zili mubbuku lyamakani aabami ba Juda a Isilayeli. 33Hezekiya wakafwa akuzikkwa abasikale bakwe kubusena kuzikkilwa balunyungu lwabwami. Baku Juda a Baisilayeli bakamulila kapati. Nkabela Manase mwanaakwe nguwakaba mwami mubusena bwakwe.
Currently Selected:
2 Makani 32: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
