2 Makani 31
31
Hezekiya mbwaakabambulula bukombi
1Lino pobwe eeli nilyakamana, bantu boonse baku Isilayeli, bakainka kuminzi yaku Juda bakaakupwayaula misumpuululu yabaleza bapange awaleza mukaintu Asyela. Alimwi bakanyonyoona malende azipaililo zyoonse zyamu zisi zya Juda, Benjamini, Efulemu a Manase. Bamane boonse bakapilukila kuminzi yabo, kulukono lwabo.
2Lino mwami Hezekiya wakaapaula bapaizi a Balevi mumalizi kweendelana amilimo yabo mbuli bapaizi naa Balevi. Eeyi ibikkilizya kupa zipaizyo zyakutenta azituuzyo zyalumvwano, kutola lubazu mukukomba, kulumbaizya akwiimba kumilyango yakuŋanda ya Mwami Leza. 3Mwami wakapa kuzwa kubutanga bwakwe, mbelele, aŋombe, kuti zibe zipaizyo zyakutenta zyacifumo-fumo akumangolezya, azeezyo zyakutenta Sabata a Sabata, ciindi capobwe lyamwezi mupya amapobwe amwi aakali kucitwa kweendelana amulawo wa Mwami Leza.
4Lino atalaa zeezi mwami wakaambila bantu baku Jelusalemu kuleta zipego zyeelede bapaizi a Balevi kutegwa bape ciindi cabo coonse kuli zeezyo zyaamba mulawo wa Mwami Leza. 5Mulawo ooyu mbuwakapegelwa buyo bantu Baisilayeli, bakaleta zipego eezi cakulyaaba: maila mabotu, waini mupya, mafuta aaoliva, buci, azimwi zilimwa. Alimwi bakaleta kwakkumi kwazeezyo nzibakajisi. 6Bantu boonse bakali kukkala muminzi yacisi ca Juda bakaleta kwakkumi kuzwa kuŋombe ambelele zyabo. Bamane bakaleta azimwi zipego nzibakapa ku Mwami Leza wabo, eezyo nzibakalundika muzilwi. 7Zipego eezi bakatalika kuzileta mumwezi watatu bazoomanizya mumwezi waciloba. 8Ciindi mwami Hezekiya abalupati-pati bakwe nibakaboola bakabona milwi yazipego eezi, nkaako bakalumbaizya Mwami Leza a Baisilayeli bantu bakwe. 9Hezekiya wakaambila bapaizi a Balevi zyazipego eezi, 10aawo Azalaiya mupaizi mupati, walunyungu lwa Zadoki wakati kulinguwe, “Kuzwa ciindi bantu nibakatalika kuleta zipego zyabo kuŋanda ya Leza, kwaba cakulya cinji cisyaala buyo. Mukuti Mwami Leza waleleka bantu bakwe. Ncenciceeci ncokusyaala zinji zili boobu.”
11Lino kwiindila mukulaililwa a Hezekiya bakabamba ziyobwedo mubusena oobo mwakali ŋanda ya Mwami Leza. 12Aawo bakaleta zipego, akwakkumi zyakapedwe ku Mwami Leza. Konaniya Mulevi nguwakali kulanga zintu eezi. Syimeyi munyina nguwakali kumugwasya. 13Mbaaba Balevi bakali kweendelezya: Jehiyeli, Azaziya, Nahati, Asaheli, Jelimoti, Jozabadi, Eliyeli, Isimakiya, Mahati a Benaiya. Coonse eeci cakacitika kwiindila mukulailila kwamwami Hezekiya a Azaliya mupaizi mupati. 14Kole mwanaa Imuna Mulevi, wakali mulindizi mupati wakumulyango wakujwe. Nguwakali kutambula zipego zyakuliyandila zyakali kuletwa kuli Leza, akwaapaula azimwi zya Mwami Leza. 15Muminzi imwi mwakali kukkala bapaizi aaba: Edeni, Miniyamini, Jesyuwa, Syemaiya, Amaliya a Syekaniya. Aaba mbibakaapaula zyakulya bweelede akupa Balevinyina kweendelana amalizi aabo. Bapati nibaceya. 16Bakaapwida baalumi kutalikila amyaka iili makumi otatwe akwiindilila bakali kukonzya kubelekela kuŋanda ya Leza buzuba abuzuba, kweendelana amalizi aabo. 17Bapaizi bakapegwa milimo yabo kweendelana aziinga zyabo pele Balevi bamyaka iili makumi obilo akwiindilila bakapegwa zyakucita mumalizi aabo. 18Boonse aaba bakalembwa antoomwe abakaintu abana babo, abamwi mbibakali kulela, nkaambo bakali kuyandika kuti kabalibambilide kucita milimo kufumbwa ciindi kuŋanda ya Leza. 19Akati kabapaizi bakali kukkala muminzi yakapegwa kulunyungu lwa Aloni, naa macelelo aminzi eeyo, kwakali baalumi basyomeka bamikwasyi yabupaizi alimwi abaabo bakalembedwe muziinga zyabo zya Balevi.
20Lino mucisi ca Juda coonse Hezekiya wakacita ziluleme zyakali kubotelezya Mwami Leza wakwe. 21Wakazwidilila, nkaako zyoonse nzyaakacita kuŋanda ya Leza naa mukuswiilila mulawo, wakazicita cakulyaaba amoyo wakwe woonse kuli Leza.
Currently Selected:
2 Makani 31: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
