2 Makani 23
23
Mbwaakazangilwa Ataliya
(2 Bami 11.4-16)
1Lino mumwaka waciloba Jehoiyada wakatondezya nguzu zyakwe. Wakapanga cizuminano abasilutwe bamyaanda aaba: Azaliya mwanaa Jelohamu, Isyimayeli mwanaa Jehohanani, Azaliya mwana wa Obedi, Maaseiya mwana wa Adaiya a Elisyafati mwanaa Zikili. 2Aaba bakainka mucisi ca Juda coonse kabaya bubunganya Balevi abasololi bamikwasyi ya Baisilayeli.
3Nibakasika ku Jelusalemu mbungano yoonse yakapanga cizuminano amwami kuŋanda ya Leza. Jehoiyada wakati kulimbabo, “Mwanaa mwami nguutilele mbubonya mbuli bwakasyomezya Mwami Leza kaamba zyalunyungu lwa Devedi. 4Mboobu mbomweelede kucita, akati kankamu zyanu zyotatwe nobapaizi a Balevi nomuli aabulizi mubuzuba bwa Sabata mukalindile kumilyango. 5Bamwi banu kuŋanda yabwami, eelyo bamwi kumulyango wantalisyo. Kwaamba zyabantu bamwi banooli mubbuwa lyaŋanda ya Mwami Leza. 6Taakwe uumbi weelede kunjila muŋanda ya Mwami Leza ccita buyo bapaizi Balevi bali aamulimo nkaambo basalazigwa, pele bamwi beelede kulindila zeezyo nzyaabalailila Mwami Leza.
7“Balevi baleelede kuyookwabilila mwami Jowasyi kabamuzingulukide. Umwi kajisi azilwanyo zyakwe mujanza, nkabela kufumbwa ooyo uunjila muŋanda ya Leza mukamujaye. Kamuli munsi-munsi amwami kufumbwa nkwaaya.”
8Balevi abaalumi boonse baku Juda bakacita mbuli Jehoiyada mupaizi mbwaakalailila, umwi aumwi wakaleta bantu bankamu yakwe aabo bakeelede abatakeelede kubeleka mu Sabata, nkaambo Jehoiyada mupaizi taakanaasungula malizi. 9Mpawo mupaizi wakapa basilutwe babali myaanda masumo, ntobo mpati ansyoonto zyakali zyamwami Devedi zyakali muŋanda ya Leza. 10Eelyo balindizi bakandandama umwi aumwi kajisi azilwanyo zyakwe, kuzwa kubbazu lyakumusanza kusikila kubbazu lyakunyika, kuzinguluka mwami, kumbali aacipaililo aŋanda ya Mwami Leza. 11Mpoonya Jehoiyada abana bakwe balombe bakagwisya mwanaa mwami anze, bamubikka musini akumupa bbuku lyamilawo yabwami akumwaamba kuti mmwami, aboobo bakamunanika kabapozomoka kabati, “Aongole mwami!” 12Ataliya naakamvwa kuyobeka kwabantu bakali kuzuzaana akusekelela mwami wakainka waakunjila muŋanda ya Mwami Leza mwakali bantu. 13Naakalanga wakabona mwami uliimvwi amusemu wakwe kumanjililo. Bantu boonse bacisi bakali kusekelela akusiba myeembo. Mukwiimba ooku bakalikusolwedwa abasikulizya zingwali-ngwali. Mpawo Ataliya wakazapula zyakusama zyakwe, wapozomoka wati, “Mmbuzangi, mmbuzangi.”
14Mpoonya Jehoiyada mupaizi wakatuma basilutwe bankamu zyamyaanda bakali kulanga basilumamba akuti kulimbabo, “Amumukwelele kuli basilumamba, kufumbwa muntu uutimutobele ajaigwe. Mupaizi wakaambide kuti, mutamujaili muŋanda ya Mwami Leza pe.” 15Aboobo mbwaakasikila buyo kuŋanda yabwami kumanjililo aamulyango wamabbiza bakamujaya.
Jehoiyada mbwaakabukulusya bukombi bwini-bwini
(2 Bami 11.17-20)
16Lino Jehoiyada mupaizi wakapanga cizuminano cakuti walo, bantu amwami balaba ba Mwami Leza. 17Bantu boonse bakainka kuŋanda ya Baali akuyooimwaya. Bakapwayaula zipaililo amituni yakwe alimwi bakajaya Matani mupaizi wa Baali mpoonya aawo kumbele lyazipaililo. 18Alimwi Jehoiyada mupaizi wakabikka bapaizi Balevi kuti kabalanga mulimo wakuŋanda ya Mwami Leza. Bakeelede kucita mulimo wakabapa mwami Devedi akupaizya ku Mwami Leza, kweendelana amulawo wa Mozesi. Mbabakali kulanga zyanyimbo amapobwe. 19Jehoiyada wakabikka balindizi kumilyango yaŋanda ya Leza kuti batazumizyi baabo batasalali mumulawo.
20Basilutwe bamyaanda, balemekwa, baleli babantu, abantu boonse, bakaleta mwami kuzwa kuŋanda ya Mwami Leza. Bakaakunjila kuŋanda yabwami kwiinda kumulyango wakutala, bakamukkazika acuuno cabwami. 21Bantu bacisi bakatangala, aboobo munzi woonse wakaliliibide nkaambo Ataliya wakajaigwa apanga.
Currently Selected:
2 Makani 23: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
