2 Makani 13
13
Nkondo ya Abija a Jelobowamu
(1 Bami 15.1-8)
1Mumwaka wakkumi alusele wakulela kwa Jelobowamu mwami wa Baisilayeli, Abija wakaba ngomwami wacisi ca Juda, 2wakalela kwamyaka yotatwe mu Jelusalemu. Banyina bakali ba Maaka mwanaa wa Uliyeli waku Gibeya. Kwakali mazwanga lyoonse akati ka Abija a Jelobowamu.
3Abija wakainka kuyoolwana abasilumamba bakonzya bali zyuulu zili myaanda yone pele Jelobowamu wakandandamika basilumamba bakwe bakonzya bali zyuulu zili myaanda iili lusele. 4Basilumamba aaba bakaswaangana munyika yatulundu-lundu ya Efulemu. Aawo Abija wakatanta acilundu ca Zemalaimu akuti, “Jelobowamu a Baisilayeli amundiswiilile,” 5“Sena nywebo tamuzi kuti Mwami Leza wa Isilayeli wakapa bwami bwa Isilayeli kuli Devedi, abalunyungu lwakwe kukabe kutamani mucizuminano citakonzyi kutyolwa? 6Pele Jelobowamu mwanaa Nebati wabalupati-pati ba Solomoni mwanaa Devedi wakamuzangila. 7Zimwi nziinga zyabasicinguni zigwebenga zyakamugwasya kuzangila Lehobowamu mwanaa Solomoni naakacili mwana katazi cakucita alimwi katajisi nguzu zyakubalwana. 8Ono mwayanda kuzangila bulelo bwa Mwami Leza bujisi balunyungu lwa Devedi. Iiyi mulijisi mpi mpati abaleza baboombe bangolida aabo Jelobowamu mbaakamupangila. 9Tee mwakatanda bapaizi ba Mwami Leza, bana ba Aloni a Balevi, mwakasala bapaizi banu nobeni mbubonya mbuli bucita bamasi? Kufumbwa waleta mupoho abagutu bali ciloba mulamucita kuti abe mupaizi wabatali baleza.
10“Lino kwaamba ndiswe Mwami Leza ngo Leza wesu, taakwe nitwakamusiya pe. Bapaizi babelekela Mwami Leza mbana ba Aloni bagwasigwa a Balevi. 11Lyoonse cifumo-fumo akumangolezya balapaizya akuumpa tununkilizyo ku Mwami Leza. Balabikka cinkwa cakutuula atebule lisalala akudomeka malambe aali azikkazikilo zyangolida, mangolezya oonse. Tutobela malailile aa Mwami Leza wesu, pele nywebo mwamukaka. 12Nkaako Leza ulaandiswe, nguutusolweda. Bapaizi bakwe mbabatisibe myeembo akuyobeka kwankondo. Akaka no Baisilayeli mutalwani Mwami Leza wabasikale banu, nkaambo tamutizwidilile.”
13Ciindi eeco Jelobowamu wakatumide basilumamba kuti bakabazide kusule basinkondo baku Juda. Bamwi babacingilile kumbele. 14Basilumamba baku Juda nibakalanga bakajana kuti balwanwa kumbele akusule. Aawo bakalilila Mwami Leza. Bapaizi bakasiba myeembo. 15Bantu ba Juda bakalwana, kabasolwedwa a Abija, aawo Mwami Leza wakazunda Jelobowamu a Baisilayeli boonse. 16Baisilayeli bakatija mukuti Mwami Leza wakabaaba kubantu ba Juda. 17Abija abasilumamba bakali zyuulu zili myaanda yosanwe wakajaya bali zyuulu zili myaanda iili makumi osanwe akati ka Baisilayeli bakali kukonzya kulwana. 18Bantu ba Juda bakazunda ciindi eeci nkaambo bakasyomede Mwami Leza wabasikale babo.
19Lino aawo Abija wakatandaanya Jelobowamu akuyoomunyanga minzi ya Beteli, Jesyana, awa Efuloni, kubikkilizya atunzi twakiizingulukide. 20Kuzwa waawo Jelobowamu taakwe naakaba aalimbi nguzu mukulela kwa Abija. Alimwi Mwami Leza wakamuuma akumujaya.
21Pele Abija nguzu zyakwe zyakali kuya buvula. Wakakwata bakaintu bali kkumi abane. Wakazyala bana balombe bali makumi obilo ababili abasimbi bali kkumi acisambomwe.
22Lino eezyo zyoonse Abija nzyaakacita akulela kwakwe, anzyaakaamba zililembedwe mubbuku lya Ido musinsimi.
Currently Selected:
2 Makani 13: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
