2 Makani 12
12
Nkondo mu Juda yakacitwa a Baijipiti
(1 Bami 14.25-28)
1Ciindi Lehobowamu naakakkazikika akubaanguzu mbuli mwami walo abantu bakwe boonse bakasiya mulawo wa Mwami Leza. 2Akaambo kakuti tiibakasyomeka ku Mwami Leza, Syisyaki mwami waku Ijipiti wakalwana munzi wa Jelusalemu mumwaka wasanu wakulela kwa Lehobowamu. 3Wakajisi nkalaki zili cuulu amyaanda yobilo abasimabbiza bali zyuulu zili makumi aali cisambomwe kubikkilizya abasilumamba batabaliki baku Libya, Suki a Kusyi aabo mbaakaletelezya kuzwa ku Ijipiti. 4Wakatola minzi yakakwabilidwe yamu Juda mane wazoosika aku Jelusalemu.
5Lino aawo Syemaiya musinsimi wakaboola kuli Lehobowamu abasololi ba Bajuda bakabungene mu Jelusalemu kabayoowede Syisyaki wazooti, “Mboobu mbwaamba Mwami Leza, ‘Mwandisiya nkaako ambebo ndamusiila Syisyaki.’”
6Mwami abasololi bakalisyimuna bati, “Mwami Leza uliluleme.” 7Mwami Leza naakabona kulisyimuna kwabo, wakati kuli Syemaiya, “Mukuti beempa nsikoobanyonyweda limwi bayoofutuka. Alimwi nsikooleka Syisyaki kuti azunde Jelusalemu. 8Nikuba boobo unoobeendelezya kuti babone kuti ncili cibotu kwiinda, mukubelekela ndime naa mwami wacisi cimbi.” 9Ciindi Syisyaki mwami waku Ijipiti naakalwana Jelusalemu wakatola zyakali muziyobwedo zyaŋanda ya Mwami Leza azyaŋanda yabwami. Wakatola zyoonse, kubikkilizya antobo zyangolida Solomoni nzyaakapangide. 10Mubusena bwazyo mwami Lehobowamu wakapanga ntobo zyamukuba nzyaakapa kubalailili baamulyango bakuŋanda yabwami. 11Ciindi mwami naakali kuya kuŋanda ya Mwami Leza, balindizi bakali kuunka anguwe kabajisi antobo eezyo, kuzwa kooko bakali kuzibikka mukaanda kabalindizi. 12Nkaambo kakuti Lehobowamu wakalibombya Mwami Leza wakaleka kumunyemena taakamunyonyweeda limwi, nkaako zintu zyakacili kabotu.
13Mwami Lehobowamu wakakkalikila ncobeni mu Jelusalemu kalela. Wakajisi myaka iili makumi one aumwi naakaba mwami. Wakalela kwamyaka iili kkumi aciloba mu Jelusalemu, munzi Mwami Leza ngwaakasala kuzwa kumisyobo yoonse ya Isilayeli, kuti kakombelwa mumo. Banyina bakali ba Naama baku Amoni. 14Wakabisya nkaambo taakakomba Mwami Leza amoyo woonse. 15Lino eezyo zyoonse Lehobowamu nzyaakacita kuzwa naakatalika kulela kusikila kumamanino zililembedwe mumabbuku aa Syemaiya musinsimi amuli Ido musinsimi naamba zyamazyalani. Kwakali mazwanga lyoonse akati ka Lehobowamu a Jelobowamu.
16Wakafwa akuzikkwa abasikale bakwe mumunzi wa Devedi, eelyo Abija mwanaakwe nguwakalela mubusena bwakwe.
Currently Selected:
2 Makani 12: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
