1 Samuyele 22

Devedi mbwaakatalika kweendeenda

1Lino Devedi wakazwa ku Gati, wakatijila kumpangala yaku Adulamu. Nkabela bana bokwabo abamukwasyi boonse bawisi nibakamvwa, bakainka boonse kulinguwe nkukonya ooko. 2Bantu boonse bakapengede aboonse bakajisi zikoloto abaabo bakabijilidwe bakainka kulinguwe. Mpawo wakaba mupati wabo boonse. Lino bantu bakali aawe bakatisike kumyaanda yone.

3Devedi wakazwa ooko, wakainka ku Mizipa waku Mowabu, wakaamba kumwami waku Mowabu kuti, “Ndakukumbila kuti uzumizye taata abaama kuti bazookkale ayebo kuno, mane kusikila nkazibe Leza eeco ncatindicitile.” 4Mpoonya wakabasiya bazyali bakwe amwami wa Mowabu, balo bakakkala anguwe kwamazuba oonse Devedi ngaakakkede mumpangala.

5Musinsimi Gadi wakaambila Devedi kuti, “Toelede kukkala mumpangala. Kozwa, uye kunyika ya Juda.” Mpoonya Devedi wakazwa akuunka kumasaka aa Heleti.

6Lino Saulu wakamvwa kuti Devedi wakajanwa, abaalumi aabo mbaakali aabo. Saulu wakakkala munsi mukkomba atala aakalundu, wakajisi sumo mujanza lyakwe, 7abalupati-pati bakwe boonse bakaliimvwi munsi lyakwe. Mpoonya Saulu wakaamba kulimbabo kuti, “Lino amuswiilile, nywebo noba Benjamini. Sena mwanaa Jese ulamupa nyoonse myuunda yakulima yamisaansa? Sena nyoonse uyoomucita basilutwe bazyuulu amyaanda yabasilumamba? 8Taakwe naba omwe uundaambila kuti mwanaangu upangene bulongwe amwanaa Jese? Taakwe akati kanu uundifwida nsoni akundaambila kuti mwanaangu wayunga mubelesi wangu mwanaa Jese kuti andijaye akundiyubilila mbubonya mbuli buzuba buno.”

9Mpoonya Dowegi Muedomu wakaimvwi kumbali aababelesi ba Saulu, wakaingula kuti, “Ndakabona mwanaa Jese naakali kuboola kumunzi waku Nobu kuli Ahimeleki mwana wa Ahitubi. 10Nkabela wakamubuzizya ku Mwami Leza akumupa cakulya, alimwi wakamupa panga lya Goliyati Mufilisiti.”

11Mpoonya mwami Saulu wakatuma mulomo wakwiita Ahimeleki mupaizi, aboonse baŋanda yawisi bapaizi aabo baku Nobu, boonse bakaboola kumwami. 12Saulu wakati kulinguwe, “Lino swiilila, o mwana wa Ahitubi.”

Mpawo wakaingula kuti, “Mpendi, o mwami wangu.” 13Saulu wakati kulinguwe, “Nkaambo nzi nondipanganina yebo amwanaa Jese? Nkaambo nzi wakamupa cinkwa apanga, akumubuzizya ku Mwami Leza, kuti andibukile akundiyubilila mbwacita sunu?”

14Mpoonya Ahimeleki wakaingula mwami kuti, “Sena Devedi tali mukwe wako, sena tali nguwe mupati wabalindizi bamwami? Tee alimwi nguusyomeka muŋanda yako? 15Sena ndatalika sunu kumubuzizizya ku Mwami Leza? Peepe. Mwami atabikki kaambo kumubelesi wakwe naa kuli baŋanda yataata, nkaambo mebo ndemubelesi wako, taakwe cintu ncendizi pe.”

16Eelyo mwami wakati, “Ncobeni ulafwa, Ahimeleki, yebo antoomwe abaŋanda yauso.” 17Mpoonya mwami wakaambila balindizi aabo bakaimvwi munsi lyakwe kuti, “Amubajaye bapaizi ba Mwami Leza. Nkaambo bayanzene aa Devedi, alimwi bakalizi kuti wakatija, pele tiibakandilwiida pe.” 18Mpoonya mwami wakati kuli Dowegi, “Boola, ujaye bapaizi.” Dowegi Muedomu wakabajaya bapaizi, mubuzuba oobo wakajaya bantu bali makumi aali lusele abasanu aabo bakali kukonzya kusama zisani zyabupaizi. 19Nobu, munzi wabapaizi Saulu wakuusaala apanga. Boonse baalumi abakaintu, bana balesi bacinyonka, ŋombe, mbongolo ambelele, zyoonse wakazijaya apanga.

20Pele umwi wabana balombe ba Ahimeleki, mwana wa Ahitubi, zina lyakwe Abiyata, wakatijila kuli Devedi. 21Abiyata wakaambila Devedi kuti Saulu wakabajaya bapaizi ba Mwami Leza. 22Devedi wakati kuli Abiyata, “Nindakabona kuti Dowegi Muedomu nkwali ndakaziba kuti uyooambila Saulu, ‘Ndime ndaletelezya lufu lwabantu boonse baŋanda yauso. 23Lino kkala andime, utayoowi nkaambo ooyo uuyanda kundijaya nguuyanda akukujaya ayebo. Kkala andime, ndakubamba kabotu.’”

Currently Selected:

1 Samuyele 22: Tonga96

Highlight

Copy

Compare