1 Samuyele 21
21
Devedi mbwaakatija Saulu
1Lino Devedi wakainka ku Nobu kuli Ahimeleki mupaizi. Ahimeleki wakaza kucingauzya Devedi kumwi kazyangama, wakati, “Ino nkaambo nzi ncoli olike, taakwe angoli aawe pe?”
2Mpawo Devedi wakati kuli Ahimeleki mupaizi, Mwami wandilailila makani amwi, wakandaambila kuti, “Kutabi muntu naba omwe uuziba makani aaya ngindakwaambila. Kwaamba zyabantu bangu twapangana kuti tukaswaangane kubusena bumwi. 3Mwati kuli kakulya? Ndipe zinkwa zyosanwe niciba cimwi ncojisi.”
4Mpawo mupaizi wakaingula Devedi kuti, “Nsijisi zinkwa ziligwa bantu buyo, pele ndijisi cinkwa cisalala, kuti naa bantu bako tiibakali kuya kubakaintu.”
5Eelyo Devedi wakaingula mupaizi kuti, “Masimpe ciindi coonse notuli alweendo tatubonani abakaintu, tulalyaanga. Mbotucita amunyendo buyo, ino ono alweendo luli boobu inga twaya buti kubakaintu?”
6Mpoonya mupaizi wakamupa cinkwa cisalala, nkaambo ooko tiibakajisi cinkwa buyo ccita buyo cakatuulidwe, eeco cakagwisigwa kuzwa kumbele lya Mwami Leza, kuti kubikwe cinkwa cicikasaala mubuzuba oobo mbubonya mbocigwisigwa.
7Lino kwakali mwaalumi umwi wababelesi ba Saulu mubuzuba oobo wakaliwo, wakalikuzuzikizya cikonke muŋanda ya Leza. Zina lyakwe wakali Dowegi Muedomu, wakali ngomupati wabeembezi ba Saulu.
8Mpawo Devedi wakati kuli Ahimeleki, “Sena kuno tojisi sumo naa panga? Nkaambo nsiindaleta sumo neliba panga niziba zilwanyo zimwi, kayi makani aamwami akandigubizya.”
9Mpawo mupaizi wakati, “Panga lya Goliyati mu Filisiti, ooyo ngookajaya mukkuti lya Ela mpolili. Lilizambaidwe acisani kusule lyakabaki kabupaizi. Kuti naa wayanda ulalibweza, nkaambo ndeliliko lilikke.”
Mpoonya Devedi wakati, “Taakwe limbi mbuli leelyo, kondipa.”
10Buzuba oobo Devedi wakanyamuka akutija kuzwa kuli Saulu, wakainka kuli Akisyi mwami waku Gati. 11Babelesi ba Akisyi bakati kulinguwe, “Sena ooyu tali ngo Devedi mwami wacisi?
Sena tali ngonguwe ngobaimba nobazyana kabati, ‘Saulu wakajaya bantu bali zyuulu,
Devedi wakajaya bantu bali zyuulu zili makumi?’”
12Lino Devedi majwi aaya akamunjila, wakayoowa Akisyi mwami waku Gati. 13Nkabela, wakalisondosya-sondosya, wakalikweengaula azitendele zyamilyango akulekela mate kaalolomoka kusikila kucilezu. 14Mpoonya Akisyi wakati kubabelesi bakwe, “Mwabona, muntu ooyu wasondoka, ino mwamuletela nzi kulindime? 15Sena ndabula bantu basondokede kuti mundiletele yooyu uucita zili boobu? Ani ooyu anjile buti muŋanda yangu?”
Currently Selected:
1 Samuyele 21: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
