1 Bami 17
17
Elija mbwaakasaninwa abacikwangala
1Lino musinsimi Elija uuzwa kumunzi wa Tisyibi mucisi ca Giliyadi, wakaambile mwami Ahabu kuti, “Mbubonya mbuli Mwami Leza wa Isilayeli mbwali muumi ooyo ngwebelekela takukoyooba mume naa mvula kwamyaka, kusikila mane nkaambe.”
2Kumane Mwami Leza wakaambila Elija kuti, 3“Kozwa mubusena oobu uunke ukayube kukalonga ka Keliti, aako kali kujwe lya Jolodani. 4Mukalonga oomu monoojana maanzi aakunywa, alimwi ndalailila bacikwangala kuti kabakuletela cakulya.”
5Elija wakaswiilila kulailila kwa Mwami Leza, wakainka akuyookkala kukalonga ka Keliti kujwe lya Jolodani. 6Wakali kunywa maanzi kuzwa mulinkako, abalo bacikwangala bakali kumuletela zyakulya cifumo-fumo akumangolezya buzuba abuzuba. 7Nikwakainda kaindi, kalonga aako kakayuminina nkaambo kwakanyina mvula.
Elija amukamufu waku Zalefati
8Lino Mwami Leza wakati kuli Elija, 9“Ono koya kumunzi wa Zalefati kumbali aaku Sidoni, ukakkalile nkuko. Ndacita kale kuti mukamufu uukkala kooko kanookusanina.” 10Aboobo Elija wakainka ku Zalefati. Lino mbwaakasikila buyo kumulyango wamunzi wakabona mukamufu katebba nkuni. Mpoonya wakati kuli nguwe, “Ndikumbila maanzi aakunywa.” 11Mukaintu naakacili kuya kukweeta maanzi, Elija wakaita wati, “Kondiletelezezya akakulya.”
12Mukamufu ooyo wakati, “Mbubonya mbuli Mwami Leza wako mbwali muumi, nsijisi akakulya nokaceya pe. Ndijisi buyo tusu tuce mumutiba, atufuta twakujisya mukankuli. Ndaboola kuzoobwezelela tukuni ndikajike kakulya mebo amwanaangu. Kuzwa waawo tuyoolindila lufu.”
13Pele Elija wakamwaambila kuti, “Utapengi akaambo kaceeci pe, koya buyo ukajike mbundakwaambila. Pele usaangune kundikangila kankwa, eelyo atusu tutisyaale ukange cako amwanaako. 14Nkaambo mboobu mbwaamba Mwami Leza wa Isilayeli wati, ‘Tusu taakwe nituyoomana mumutiba, atwalo tufuta taakwe nituyoomana mukankuli pe, kusikila buzuba oobo mebo, nde Mwami Leza nenjoowisya mvula.’”
15Mukamufu ooyo wakainka akuyoocita mbubonya mbuli mbwaakaambilwa a Elija, nkaako boonse botatwe bakalijisi cakulya buzuba abuzuba. 16Mbubuli Mwami Leza mbwaakasyomezezye kwiindila muli Elija, tusu tiitwakamana mumutiba, atwalo tufuta tiitwakamana mukankuli.
17Nikwakainda kaindi, mwana wamukamufu ooyo wakaciswa. Bulwazi oobo bwakali kuya bukomena, mane limwi mwana wakafwa. 18Eelyo mukaintu wakaambila Elija kuti, “Yebo omuntu wa Leza, nkaambo nzi nookacita boobu kuli ndime? Sena wakazida kuti uzooyeezye Leza zinyonyoono zyangu kutegwa andijaile mwanaangu?” 19Pele Elija wakati, “Ndipa mulombe ooyo.” Mpawo wakabweza mwana ooyo kuzwa mumaanza aabanyina, wamutola muŋanda yamujulu oomo mwaakali kukkala, waakumulazika abulo bwakwe. 20Mpoonya wakoombooka wati, “O Mwami Leza wangu, ino nkaambo nzi noocita eeci ciyoosya kuli mukamufu ooyu? Langa mbuli mbwandibamba caluzyalo, ono yebo wamujaila mwanaakwe mulombe!” 21Mpoonya Elija wakafumbata mulombe ooyo ziindi zyotatwe kumwi kakomba kati, “O Mwami Leza wangu, muponye mwana ooyu alimwi!” 22Leza wakamvwa kukomba kwa Elija. Mulombe wakatalika kuyoya alimwi, waba muumi. 23Mpawo Elija wakabweza mulombe ooyo waseluka anguwe kuzwa muŋanda yamujulu, wamubweedezya kuli banyina wati, “Bona, mwanaako muumi!” 24Eelyo mukaintu ooyo mukamufu wakaingula kuti, “Ono ndaziba kuti uli muntu wa Leza, akuti ncobeni Leza ulaamba kwiindila mulinduwe!”
Currently Selected:
1 Bami 17: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
