1 Bami 15

Zyamwami Abija waku Juda

(2 Makani 13.1—14.1)

1Mumwaka wakkumi alusele wakulela kwa Jelobowamu mwami wa Baisilayeli, Abija wakaba ngomwami wacisi ca Juda, 2wakalela mu Jelusalemu kwamyaka yotatwe. Banyina bakali Maaka mwana wa Abisalomu. 3Abija awalo wakabisya mbubwakali kucita wisi. Moyo wakwe tiiwakamaninide ku Mwami Leza wakwe mbubuli bwakali wa Devedi sikale wabo. 4Lino akaambo ka Devedi Mwami Leza wakapa Abija mwana mulombe wakuti akalele mu Jelusalemu ciindi aakufwa alimwi akuyooyumya munzi wa Jelusalemu. 5Mwami Leza wakakucita ooku nkaambo ka Devedi wakali kutobela milawo yakwe lyoonse. Ccita buyo mumakani aa Uliya Muhiti. 6Kwakali mazwanga lyoonse akati ka Abija a Jelobowamu mubuumi bwa Abija boonse. 7Lino zintu zyoonse nzyaakacita Abija zililembedwe mubbuku lyamakani aabami ba Juda. 8Nkabela Abija wakafwa akuzikkwa abasikale bakwe mumunzi wa Devedi. Asa nguwakaba mwami mubusena bwakwe.

Zyamwami Asa wa Juda

(2 Makani 15.16—16.6)

9Lino mumwaka wamakumi obilo aakulela kwa Jelobowamu mwami wa Isilayeli, Asa wakaba ngomwami wa Juda. 10Wakalela kwamyaka iili makumi one aumwi mu Jelusalemu. Banyinakulu Asa bakali Maaka, mwana wa Abisalomu. 11Asa wakali kucita zibotezya Mwami Leza, mbubwakali kucita Devedi sikale wakwe. 12Wakatanda baalumi boonse bakali kucita zitaambiki mumalende kuzwa munyika yakwe. Wakamwaya amituni eeyo yakayakide bamawisi. 13Abalo banyinakulu wakabatanda muciinga cabwami nkaambo bakajisi mutuni wa Asyela. Asa wakuugonka akuyooutentela kukkuti lya Kidiloni. 14Nikuba kuti taakamwaya malende pele moyo wakuubikkide ku Mwami Leza mubuumi bwakwe boonse. 15Wakaleta kuŋanda ya Mwami Leza nsiliva, ngolida azintu zimwi, walo awisi nzibakapede ku Mwami Leza. 16Kwakali mazwanga lyoonse akati ka Asa wacisi ca Juda a Baasya wacisi ca Isilayeli mubwami bwabo boonse. 17Baasya wakainka kuyoolwana cisi ca Juda, wakayakilizya munzi wa Lama kuti kubule uunjila nikuba kuzwa mucisi ca Juda. 18Pele mwami Asa naakabona boobo wakabweza nsiliva angolida zyoonse eezyo zyakasyeede muŋanda ya Mwami Leza ayakwe mwini, wakazipa balupati-pati bakwe kuti bazitole kumwami Benihadadi waku Alamu, mwanaa Tabulimoni, muzyukulu wa Heziyoni amakani aakuti, 19“Atupangane bulongwe bwakugwasyanya, mbuli bwakacitide bamatata. Nsiliva angolida eezi ncipego cako. Ino mbuti kuti bulongwe bwanu a Baasya bwamana, kutegwa agwisye basilumamba bakwe mucisi cangu.” 20Lino mwami Benihadadi wakuuzumina muzeezo wa Asa ooyu. Mpawo wakatuma bapati babasilumamba bakwe antoomwe abasilumamba babo kuyoolwana minzi ya Isilayeli. Bakaakuzunda minzi ya Ijoni, Dani, Abelabetimaaka, a Kineleti, Kujatikizya acisi ca Nafutali coonse. 21Ciindi mwami Baasya naakamvwa cakacitika, wakaleka kuyakilizya Lama wakainka ku Tiiza. 22Eelyo Asa wakatumya majwi mucisi ca Juda coonse, akulailila bantu boonse kutaleka naba omwe pe, kuti bakagwasye kuyoobweza mabwe oonse amapulanga kuzwa ku Lama aayo ngaakali kubelesya Baasya mukuyakilizya munzi ooyo. Nkabela Asa wakabelesya zintu eezi mukukwabilila minzi ya Mizipa, a Geba uuli mucisi ca Benjamini.

23Zintu zyoonse Asa nzyaakacita, zya nguzu zyoonse azimwi nzyakaacita kubikkilizya a minzi njaakayaka, zililembedwe mubbuku lyamakani aabami ba Juda, Naakacembaala myeendo yakali kucisa. 24Asa wakafwa akuzikkwa abasikale bakwe mumunzi wa Devedi, eelyo mwanaakwe Jehosyafati nguwakaba mwami mubusena bwakwe.

Zyamwami Nadabu wacisi ca Isilayeli

25Lino Asa naakali mumwaka wakwe wabili wakulela cisi ca Juda, Nadabu mwanaa Jelobowamu nguwakaba mwami mucisi ca Isilayeli. Wakalela kwamyaka yobilo. 26Pele awalo wakatobela nzila yawisi, wakabisizya Mwami Leza akusolweda Baisilayeli mucibi. 27Baasya mwana wa Ahija wamusyobo wa Isakaa wakamuzangila kumane wakamujaya ku Gibetoni munzi Wabafilisiti. Ciindi Nadabu a Baisilayeli boonse nibakali kusinkilizya munzi ooyo. 28Baasya wakajaya Nadabu mumwaka watatu wabwami bwa Asa waku Juda. Baasya wakaba ngomwami. 29Lino mbwaakanjilila buyo mubwami wakajaya boonse bamukwasyi wa Jelobowamu, taakwe naba omwe ngwaakasiya kali muumi pe. Eeci cakacitika kweendelana abwakaambide Mwami Leza kwiindila mumubelesi wakwe Ahija ku Syilo. 30Eeci cakaba boobo akaambo ka Jelobowamu wakabisizya Mwami Leza wa Isilayeli akumunyemya, alimwi akaambo kakusolweda cisi ca Isilayeli mucibi. 31Lino zyoonse zyaakacita Nadabu zililembedwe mubbuku lyamakani aabami ba Isilayeli. 32Kwakali mazwanga lyoonse akati kabwami bwa Asa a Baasya.

Zyamwami Baasya wacisi ca Isilayeli

33Mumwaka watatu wabwami bwa Asa waku Juda, Baasya mwana wa Ahija wakaba ngomwami wacisi ca Isilayeli coonse, ku Tiiza. Wakalela myaka iili makumi obilo aine. 34Pele awalo wakabisizya Mwami Leza mukutobela nzila zya Jelobowamu wakabisizya Mwami Leza akusolweda Baisilayeli mucibi.

Currently Selected:

1 Bami 15: Tonga96

Highlight

Copy

Compare