1 Bami 11

Solomoni mbwaakaleka nzila ya Leza

1Solomoni wakali muntu uuyandisya bakaintu bazwamasi. Kunze amwanaa Falo wakakwata Bahiti, Bamowabu, Baamoni, Baedomu, a Basidoni. 2Wakakwata bakaintu aaba nikuba kuti Mwami Leza wakalaililide Baisilayeli kuti mutanookwatani ambabo, nkaambo ciyoomucita kuti mukombe baleza bambi. Nikuba boobo Solomoni wakacili kubayanda. 3Nkabela Solomoni wakakwete bakaintu baciinga cabwami bali myaanda iili ciloba, abamwanakasuwa bali myaanda yotatwe. Aaba bakaintu mbabakacita kuti Solomoni asiye nzila ya Leza. 4Lino Solomoni mbwaakali kuya bucembaala bakaintu aaba bakacita kuti akombe baleza bambi. Taakwe naakacili kusyomeka ku Mwami Leza wakwe mbuli bwakali Devedi wisi. 5Wakakomba Asyitaloti leza mukaintu wa Basidoni a Moleki leza wa Baamoni uusesemya. 6Solomoni wakabisizya Mwami Leza, alimwi taakali kutobela Mwami Leza mbuli bwakali kucita Devedi wisi. 7Lino acilundu cili kujwe aamunzi wa Jelusalemu wakayaka busena bwakukombela Kemosyi leza uusesemya wa Bamowabu, alimwi wakayaka abusena bwakukombela Moleki leza uusesemya wa Baamoni. 8Kwamana wakayakila bakaintu bakwe bamasi masena aakukombela, balo bakali kutenta tununkilizyo akupa zipaizyo zyakutenta kuli baleza babo.

9Mwami Leza wakanyemena Solomoni akaambo kakuti wakasiya nzila ya Mwami Leza wa Isilayeli ooyo wakalibonya kulinguwe ziindi zyobilo. 10Nikuba kuti Mwami Leza wakali mukasizye kutobela baleza bambi, walo taakaccilila kulailila kwakwe. 11Mwami Leza wakati kulinguwe, “Akaambo kakuti yebo omwini watyola cizuminano amalailile ngindakwaambila kuti waabambe alimwi ndakakwaambila, kuti otaabamba nzookunyanga bwami akubupa kuluumwi wababetesi bako. 12Nikuba boobo, akaambo ka Devedi uso eeci nsikoocicita yebo nocipona pe, ndiyoocicita ciindi kwaakulela mwanaako, 13pele nsikooyoomunyanga bulelo boonse, ndiyoomusiila buyo musyobo omwe akaambo kamubelesi wangu Devedi alimwi akaambo ka Jelusalemu, munzi ooyo ngwindakalisalila.”

Basinkondonyina Solomoni

14Lino Mwami Leza wakacita Hadadi, waciinga cabwami bwa Edomu kuti abukile Solomoni. 15Kusaanguna Devedi naakali kulwana Baedomu, Jowabu silutwe wabasilumamba wakainka kuyoozikka Baisilayeli bakajaidwe, amane wakajaya baalumi boonse baku Edomu. 16Jowabu abasilumamba bakwe bakakkala ooko kwamyezi iili cisambomwe. 17Ciindi eeco Hadadi wakacili mulombe, wakatijila ku Ijipiti a Baedomu bamwi bakali balupati-pati mubwami bwawisi. 18Bakazwida ku Midiyani, bagama ku Palani ooko nkobakaakutolelezya baalumi bamwi kuli Falo mwami wa Ijipiti. Falo wakapa Hadadi nyika yakukkala, ŋanda acakulya. 19Falo wakayandisisya Hadadi cakuti wakamupa mulamwaakwe mukaintu Tapenesi kuti akwate. 20Mukaintu ooyo wakazyala mwana mulombe. Wakamuulika kuti Genubati. Mwana ooyu wakalelwa abanyina muŋanda yabwami ya Falo, ooko Genubati nkwaakali kukkala antoomwe abana ba Falo.

21Pele Hadadi naakamvwa makani aakuti Devedi wakafwa, alimwi akuti Jowabu ooyo wakali mupati wabasilumamba, awalo wakafwa, Hadadi wakaambila mwami kuti, “Ndikumbila kuti ndibweede ono kucisi cokwesu.”

22Lino mwami wakabuzya kuti, “Ino wabula nzi? Nkaambo nzi ncoyanda kubweeda kucisi cokwanu?” Hadadi wakati, “Peepe, taakwe. Ndizumizya ndibweede.” Eelyo wakabweeda kucisi cokwabo. 23Alimwi Leza wakacita kuti awalo Lezoni mwana wa Eliyada abukile Solomoni. Lezoni wakali muntu wakatija kuzwa kuli simalelo wakwe, mwami Hadadeza waku Zoba, 24akuyooba musololi wazigwebenga. Eeci cakacitika ciindi Devedi naakanyonyoona mpi yaku Zoba. Zigwebenga eezi zyakaya ku Damasikasi nkuzyakaakukkala. Zyakaakucita Lezoni kuti abe mwami wazyo ooko.

25Lezoni wakali sinkondonyina Solomoni mubuumi bwakwe boonse, mbubwakali kucita Hadadi. Lezoni wakalela mu Siliya kabatalangani kabotu a Baisilayeli.

Cisyomezyo ca Leza kuli Jelobowamu

26Awalo Jelobowamu mwanaa Nebati wakali umwi wabalupati-pati wakabukila Solomoni. Jelobowamu wakali Muefulemu uuzwa ku Zeleda. Banyina bakali bamukamufu Zeluwa. 27Mboobu mbwaakabukila mwami. Solomoni wakali kuyaka cikwabilizyo kulubazu lwakujwe lwa Jelusalemu alimwi akuyakulula bwaanda bwamunzi. 28Jelobowamu wakali mwaalumi singuzu, nkabela Solomoni naakabona kuti muntu wamulimo, wakamubikka kuba mulangi wabasicibbalo mucisi cabana ba Josefa. 29Lino buzuba bumwi Jelobowamu naakali kuzwida ku Jelusalemu wakaswaanywa amusinsimi Ahija kazwida ku Syilo, bakaswaangana bobilo. Ahija wakasamide jansi pya. 30Nkabela wakalisamununa, walidelaula muzibeela zili kkumi azibili, 31mpoonya wakati kuli Jelobowamu, “Kotola zibeela eezi zili kkumi zibe zyako, nkaambo Mwami Leza wa Isilayeli waamba kuti, ‘Solomoni ndiyoomunyanga bwami, nkabela yebo ndiyookupa misyobo iili kkumi. 32Solomoni ndiyoomusiila buyo musyobo omwe akaambo kamubelesi wangu Devedi alimwi akaambo ka Jelusalemu munzi ooyo ngwindakalisalila. 33Ndiyoocita oobo nkaambo kakuti Solomoni wakandikaka, wakatalika kukomba Asyitaloti leza mukaintu wa Basidoni, Kemosyi leza wa Bamowabu, alimwi a Moleki leza wa Baamoni. Solomoni tacinditobeli, nikuba kucita zeezyo nzindibotela. Tabambi milawo amalailile aangu mbuli bwakali kucita Devedi, wisi. 34Pele Solomoni nsikooyoomunyanga bwami muciindi coonse cabuumi bwakwe, akaambo kamubelesi wangu Devedi ooyo ngwendakasala, walo wakali kuswiilila akubamba milawo amalailile aangu. 35Ndiyoonyanga mwanaakwe bwami akuyookupa misyobo iili kkumi. 36Mwanaa Solomoni ndiyoomupa buyo musyobo omwe kutegwa lyoonse kandijisi umwi wabana bamubelesi wangu Devedi unoolela mu Jelusalemu, munzi ooyo ngwendakasala kuti bube busena bwakundikombela. 37Yebo lwako Jelobowamu, ndiyookucita kuti ukabe mwami wa Isilayeli, nkabela uyoolela cisi coonse mboyanda. 38Kuti naa ukandiswiilile amoyo omwe akutobela malailile amilawo yangu, mbubonya mbuli bwakali kucita mubelesi wangu Devedi, ndiyooba aanduwe lyoonse. Cibeela ca Isilayeli ndiyoocipa kulinduwe, alimwi balunyungu lwako mbabanoolela mbuli mbundakacita kuli Devedi. 39Pele akaambo kacibi ca Solomoni, njoobombya balunyungu lwa Devedi, pele kutali akutamani pe.’” 40Nkaako Solomoni wakasola kujaya Jelobowamu, pele Jelobowamu wakatijila kumwami Syisyaki waku Ijipiti, nkwaakaakukkala mane kusikila lufu lwa Solomoni.

Lufu lwa Solomoni

(2 Makani 9.29-31)

41Lino zyoonse eezyo nzyaakacita Solomoni, zyamulimo azyabusongo bwakwe, zililembedwe mubbuku lyamilimo ya Solomoni. 42Wakali mwami mu Jelusalemu kalela Baisilayeli boonse kwamyaka iili makumi one. 43Wakafwa akuzikkwa abasikale bakwe mumunzi wa Devedi, wisi, eelyo mwanaakwe Lehobowamu nguwakalela mubusena bwakwe.

Currently Selected:

1 Bami 11: Tonga96

Highlight

Copy

Compare