1 Bami 10
10
Kuswaya kwamwami mukaintu waku Syeba
(2 Makani 9.1-12)
1Lino mwami mukaintu waku Syeba naakamvwa mpuwo ya Solomoni, ambwaakadumya zina lya Mwami Leza wakeenda kuya ku Jelusalemu kuti akamusunke amibuzyo miyumu. 2Wakainka kasindikilwa ababelesi banji-banji, bakali kweenda ankamela zyakayumwide tununkilizyo, amabwe mayandisi alimwi angolida zinji. Nibakaswaangana a Solomoni mwami mukaintu ooyo wakabuzya Solomoni mibuzyo yoonse yakali kumoyo. 3Solomoni wakaingula mibuzyo eeyo yoonse kunyina wakamuyumina pe. 4Mwami mukaintu waku Syeba ooyo wakalamwa kuti Solomoni mmusongo, alimwi wakabona aŋanda yakwe eeyo njaakayaka, 5zyakulya zyakwe azyabalupati-pati bakwe, basyaaŋandu mumajansi aabo, basikupa zyakunywa azipaizyo zyakutenta ambwaakayaka Ŋanda ya Mwami Leza wakakankamana. 6Nkabela wakati ku mwami Solomoni, “Zintu nzindakamvwa nkecili mucisi cangu zyanduwe abusongo bwako nzyakasimpe! 7Pele tiindakasyoma kusikila nindalibonena ndemwini. Ndakamvwide kuce buyo, kwaamba zyabusongo bwako, abuvubi bwako zyainda mbundakamvwide. 8Ncobeni balaacoolwe bantu ababelesi bako aabo bakkala kumbele lyako lyoonse akumvwa zyabusongo bwako. 9Aalumbwe Mwami Leza wako! Walo wakabotelwa kuti akubikke mubulelo bwa Isilayeli. Wakakubikka mubwami akaambo kaluyando lwa Leza lutamani ku Baisilayeli. Wakakubikka mubwami kuti ulele Baisilayeli bweelede mubululami.” 10Mpoonya mwami mukaintu waku Syeba wakapa Solomoni ngolida iilema matalenta aali mwaanda amakumi obilo. Wakamupa tununkilizyo tunji amabwe mayandisi Solomoni taakwe naakatambula limbi tununkilizyo tunji tuli mbuli twakamupa mwami mukaintu waku Syeba. 11Mato aa Hilamu akaleta ngolida kuzwa ku Offi, kuzwida nkukonya ooko bakaleta zisamu zyaalumagi zinji amabwe meebesi. 12Solomoni wakabelesya zisamu eezi mukuyasya zicinda zyaŊanda ya Leza ayakwe, akubeza tuntimbwa atulumbu twabaimbi. Taakwe limbi lyakaletedwe nikuba kubona zisamu zinji zili boobu. 13Awalo Solomoni wakapa mwami mukaintu waku Syeba zyoonse nzyaakakumbila, kuleka eezyo zyakali kupegwa kubeenzu lyoonse kwiindila mucilengwa cabo. Mpoonya mukaintu ooyo ababelesi bakwe bakabweeda ku Syeba.
Zyabuvubi bwa Solomoni
(2 Makani 9.13-29)
14Mwaka amwaka mwami Solomoni wakali kutambula ngolida iilema matalenta aali myaanda iili cisambomwe amakumi aali cisambomwe acisambomwe. 15Kutabalilizya ayamitelo yabasimakwebo abamami ba Baalabu abeendelezi banyika. 16Mwami Solomoni wakapanga ntobo mpati zili myaanda yobilo, nkabela imwi aimwi yakali yangolida iifulidwe. Ntobo yomwe-yomwe yakafulwa angolida iilema mabeka aali makumi obilo acisambomwe. 17Alimwi wakapanga azimbi ntobo nsyoonto zili myaanda yotatwe, imwi aimwi yakali kulema mabeka aangolida aali otatwe. Zyoonse eezi wakazibikka kuŋanda yakwe yakali kugundu lya Lebanoni. 18Alimwi wakapanga acuuno cabwami cipati cameja aabazovu ncaakasyingulula angolida iini-ini. 19Kwakali malyatilo aali cisambomwe kuyoosika aakkalilwa eeni. Ciyaamino cakalivungumene. Kumabazu aaco kwakali cikozyano casyuumbwa omwe-omwe. 20Mumabazu aamalyatilo kwakali basyuumbwa bobilo-bobilo, antoomwe bakali kkumi ababili. Taakwe umwi mwami wakajisi cuuno cili mbuli ceeci pe.
21Nkomeki zyoonse zya Solomoni zyakali zyangolida, azibelesyo zyamu; nanda yakugundu lya Lebanoni zyakali zyangolida iini-ini. Taakwe nsiliva yakali kubelesegwa mumazuba aa Solomoni, nkaambo nsiliva tiiyakali kulemekwa. 22Mwami wakalijisi bantu beenzya mato aamakwebo, aabo bakali kweenda abantu ba Hilamu. Lyoonse kwainda myaka yotatwe akali kunga aletelela ngolida, nsiliva, meja aabazovu, bapombo abasokwe. 23Mwami Solomoni wakali muvubi alimwi musongo kwiinda bami boonse baanyika, 24nkabela bantu bamanyika oonse bakali kuunka kulinguwe kuyoomvwa zyabusongo Leza mbwaakamupede. 25Mwaka amwaka bakali kuzoomubona bakali kuletelezya azipego, zyansiliva, ngolida, majansi, zilwanyo, tununkilizyo, mabbiza amamyuulu.
26Solomoni wakajana nkalaki zyakali myaanda iili kkumi azine, amabbiza aali zyuulu zili kkumi azibili, aakali muminzi mwakali kuyobwedwa nkalaki zimwi zyakali aanguwe mu Jelusalemu. 27Mumazuba aayo Solomoni naakali kulela, nsiliva cakali cintu buyo mu Jelusalemu, yakali mbuli mabwe kuvula, milombe yakali minji mbuli mikuyu mugundu. 28Mabbiza aakwe wakali kwaajana ku Ijipiti aku Kuwe. Basambazi bakali kuula kuzwa ku Kuwe. 29Nkalaki zyaku Ijipiti bakali kuzyuula masyekeli aansiliva aali myaanda iili cisambomwe, bbiza lyakali kuulwa aali mwaanda amakumi osanwe. Nkabela basambazi ba Solomoni bakaauzya kubami ba Bahiti aba Baalamu.
Currently Selected:
1 Bami 10: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
