1 Makani 4

Balunyungu lwa Juda

1Mbaaba bamwi balunyungu lwa Juda mbaa: Pelezi, Heziloni, Kaami, Huli a Syobali. 2Syobali wakazyede Leyaiya, wakali Jahati wisi Ahumayi a Lahadi, basikale babantu bakkala mu Zola.

3Huli ngomwana wakusaanguna wa Efulata muka Kalebi. Balunyungu lwakwe mbibakatalika munzi wa Betelehemu. Huli wakajisi bana balombe botatwe ba, Etamu, Penuweli a Eza. Etamu wakajisi bana balombe botatwe ba, Jezileeli, Isyima a Idibasyi, wakajisi amwana musimbi omwe Hezeleliponi. 4Penuweli nguwakatalisya munzi wa Gedoo, Eza nguwakatalisya munzi wa Husya.

5Asyuu, wakatalisya munzi wa Tekowa, wakakwete bakaintu bobilo ba Hela a Naala. 6Kuli Naala wakazyala bana balombe bone, Ahuzamu, Hefa, Temeni a Haahasyitali. 7Kuli Hela wakazyede bana botatwe ba, Zeleti, Iziha a Etinani.

8Kozi nguwakazyala Anubu a Zobeba basikale babaabo balunyungu lwa Ahaaheli mwanaa Halumu.

9Kwakali mwaalumi wakali kutegwa Jabezi, wakali kulemekwa kwiinda bana bokwabo. Banyina mbibakamuulika zina lya Jabezi nkaambo bakati, “Ndakamuzyalila mumaciswe.” 10Jabezi wakalilila Leza wa Isilayeli wakati, “Noondileleka akukwakwabula cisi cangu, kondikwabilila akundibamba kuzwa kumacise kuti nketaciswi.” Nkabela Leza wakamucitila nzyaakakumbila.

Mikwasyi imwi

11Kalebi, munyina Syuha wakazyede mwana mulombe ngu Mehili. Mehili ngowisi Esyitoni. 12Ooyu wakajisi bana balombe botatwe ba, Betilafa, Paseya a Tehina. Tehina nguwakatalisya munzi wa Ilinahasyi. Balunyungu lwabaalumi aaba bakkala mu Leka.

13Kenazi wakazyede bana balombe bobilo ba, Otiniyeli a Selaiya. Otiniyeli wakazyede bana balombe bobilo ba, Hatati a Meyonotayi. 14Meyonotayi nguwakazyala Ofula. Selaiya nguwakazyala Jowabu wakatalisya kkuti lya basibuuya, ooko bantu boonse nkobakali bauya mumilimo.

15Kalebi mwanaa Jefune wakazyede bana balombe ba, Ilu, Ela, a Naamu. Ela nguwakazyala Kenazi. 16Jehaleleli wakazyede bana balombe bone ba, Zifu, Zifa, Tiliya a Asaleli.

17Ezula wakazyede bana balombe bone ba, Jetee, Meledi, Efee a Jaloni. Meledi wakakwata Bitiya mwanaa Falo waku Ijipiti. Bakazyala mwana musimbi Miliyamu, abana balombe bobilo ba, Syamayi a Isyiba. Isyiba nguwakatalisya munzi wa Esyitemoya. 18Meledi wakalikwete aumwi mukaintu wamusyobo wa Juda, bakazyede bana balombe botatwe ba, Jeledi, wakatalisya munzi wa Gedoo. Hebee, wakatalisya munzi wa Soko. Jekutiyeli wakatalisya munzi wa Zanoya.

19Hodiya wakakwata mucizi wa Nahamu. Balunyungu lwakwe mbabaciinga ca Gaamu, bakkala mumunzi wa Keila, awa Maakati, bakkala mumunzi wa Esyitemoya.

20Syimoni wakazyede bana balombe bone, Aminoni, Lina, Benihanani, a Tiloni. Isyi wakazyede bana balombe bobilo, Zoheti a Benizoheti.

Bana ba Syela

21Syela wakali umwi wabana ba Juda. Bana bakwe mbaa: Ela wakatalisya munzi wa Leka, Laada wakatalisya munzi wa Malesya, aziinga zyabaabo babamba ndeketela kumunzi wa Betisyibeya. 22Jokimu abantu bakali kukkala mumunzi wa Koziba, a Jowasyi awa Salafu, bakali kulela mu Mowabu aku Jasyubilehemu makani aaya ngaciindi loko. 23Alimwi bakali babumbi bauya bamwami, bakali kukkala muminzi ya Netayimu a Gedela.

Balunyungu lwa Simiyoni

24Simiyoni wakazyede bana bosanwe ba, Memuyeli, Jamini, Jalibu, Zela, a Syauli. 25Syauli nguwakazyala Syalumu, muzyukulu wakwe ngu Mibusamu, muzyukulu ngu Misyima. 26Kuzwida kuli Misyima mundandanda walunyungu wakaakusikila kuli Hamuyeli, Zaku a Syimeyi. 27Syimeyi wakazyede bana balombe bali kkumi acisambomwe, basimbi bali cisambomwe. Pele basazinyina bakajisi bana bace buyo, nkaako musyobo wa Simiyoni tiiwakavula bwakavulide wa Juda.

28Kuzoosika mukulela kwa mwami Devedi balunyungu lwa Simiyoni bakali kukkala muminzi eeyi: Beyasyiba, Molada, Hazasyuwali, 29Biliha, Ezemu, Toladi, 30Betuyeli, Hona, Zikilagi, 31Betimaakabotu, Hazasusimu, Betibili a Syaalaimu. 32Alimwi bakali kukkala mumasena aambi osanwe aa: Etamu, Limoni Tokeni, Aini a Asyani. 33Kubikkilizya atunzi twakazingulukide, kumbo kuyoosika kumunzi wa Baalati. Ooyu ngomundandanda ngubakabamba bamikwasyi amasena ngubakakkede.

34Aaba mbabasololi baziinga zyabaaba: Mesyobabu, Jamuleki, Josya mwana wa Amaziya, 35Joweli, Jehu mwanaa Josibiya, mwanaa Selaiya, mwana wa Asiyeli. 36Eliyoyenayi, Jaakoba, Jeshohaiya, Asaiya, Adiyeli, Jesimiyele, Benaiya, 37Ziza mwanaa Syifi, mwana wa Aloni walunyungu lwa Jedaiya, Syimuli, Syemaiya, 38aaba baambwa mazina aabo bakali mbabapati muziinga zyabo, mikwasyi yabo yakakomena kapati. 39Bakeenda mane baakusika kumbali aa Gedoo kujwe lyakkuti, kuyabuyandaula macelelo aamatanga aabo. 40Ooko bakaakujana macelelo mabotu, anyika yakali kwakwabukide kakuliibide, bantu bakasaanguna kukkala ooko bakali balunyungu lwa Hamu.

41Bamusyobo wa Simiyoni baambwa waawa bakazwa ciindi Hezekiya naakali mwami wa Juda. Bakasaala Bahamu mumatente kubikkilizya a Bameuni mumaanda aabo, akubanyonyweeda limwi, mbuli mbokuboneka asunu. Bamane bakakkala mumasena aabo nkaambo kwakali macelelo aamatanga aabo. 42Alimwi bamwi ba Basimiyoni aaba bali myaanda yosanwe bakaya kuyoosaala cisi catulundu-lundu ca Siiya, kabasolwedwa a Pelatiya, Neyaliya, Lefaiya a Uziyeli bana ba Isyi. 43Nkabela bakanyonyoona Baameleki bakatijilide ooko. Basimiyoni aabo nkobakkede asunu.

Currently Selected:

1 Makani 4: Tonga96

Highlight

Copy

Compare