1 Makani 26

Balindizi baamilyango yaŋanda ya Leza

1Mboobu mbubakaapaulwa balindizi baamilyango. Kuzwa kulunyungu lwa Kola kuli Mesyelemiya mwanaa Kole umwi wabana ba Asafu. 2Mesyelemiya wakajisi bana balombe aaba: Zekaliya ngowakusaanguna, kumane ngu Jediyeli, kumane ngu Zebadiya, kumane ngu Jatiniyeli, 3kumane ngu Elamu, kumane ngu Jehohanani, kuzwa waawo ngu Eliyehoyenayi. 4Bana ba Obediedomu mbaa: Syemaiya uuli ngowakusaanguna, kumane ngu Jehozabadi kumane ngu Jowa, kumane ngu Sakaa, kumane ngu Netaneli, 5kumane ngu Amiyele, kumane ngu Isakaa, kuzwa waawo ngu Peuletayi. Leza wakalelekede Obediedomu.

6Syemaiya mwana wa Obediedomu awalo wakajisi bana balombe bakali basololi mumukwasyi wawisi nkaambo bakali kukonzya. 7Bana ba Syemaiya mbaa: Otini, Lefayeli, Obedi, a Elizabadi. Basazinyina ba Elihu a Syemakiya abalo bakalicikonzyede.

8Boonse aaba bakali balunyungu lwa Obediedomu. Balo abana babo kubikkilizya abasazinyina bakali kukonzya alimwi bakali bankutwe. Balunyungu lwa Obediedomu antoomwe bakali makumi aali cisambomwe ababili.

9Mesyelemiya wakajisi bana abasazinyina bakacikonzyede, antoomwe bakali kkumi alusele.

10Hosa Mumelali wakalijisi bana ba Syimuli uuli ngowakusaanguna nikuba kuti teensi wakusaanguna kuzyalwa, wisi wakamupa bupati, 11kumane ngu Hilikiya kumane ngu Tabaliya, kuzwa waawo ngu Zekaliya. Bana balombe abasazinyina Hosa bakali kkumi abatatu.

12Balindizi bamilyango bakaapaulwa mumalizi, kweendelana amikwasyi yabo, abalo bakapegwa milimo muŋanda ya Leza mbubonya mbuli Balevi bamwi. 13Kakunyina akulanga mbuli mupati, mukwasyi omwe-omwe wakauma cisolo kuti babone kuti ino bayoolindila kumulyango uuli. 14Syelemiya wakatola mulyango wakujwe, mwanaakwe Zekaliya wakali mulailili wakacibwene, wakatola mulyango wakunyika. 15Obediedomu wakatola mulyango wakumusanza, bana bakwe balombe mbabakalanga ŋanda yaciyobwedo. 16Syupimu a Hosa mbibakatola mulyango wakumbo wa Syeleketi uuli kutala lyamugwagwa. Balindizi bakali kwiimpana mumalizi. 17Kujwe kwakali Balevi bali cisambomwe buzuba abuzuba, kunyika kwakali bone, kumusanza bone, aŋanda yaciyobwedo kwakali bobilo ciindi aciindi. 18Kwaamba zyabbuwa lili kumbo kwakali bone, kumugwagwa bone, alimwi kwakali bambi bobilo abbuwa lini. 19Mbombuboobu mbubakaapaulwa balindizi balo bakali balunyungu lwa Kola a Melali.

Milimo imwi yakuŋanda ya Leza

20Lino Balevi bamwi mbuli bwakali Ahiya bakali kulanga ziyobwedo zyakuŋanda ya Leza azyazintu zipedwe ku Mwami Leza. 21Ladani uuli ngumwi wabana ba Gesyoni wakali sikale wamikwasyi minji kubikkilizya amukwasyi wamwanaakwe Jehiyeli. 22Bana bamwi ba Ladani bobilo ba Zetamu a Joweli mbabakali kulanga zyaciyobwedo camuŋanda ya Leza.

23Milimo imwi yakapegwa kuli balunyungu lwa, Amulamu, Iziha, Hebuloni a Uziyeli.

24Syubaeli walunyungu lwa Gesyomu mwanaa Mozesi nguwakali kulanga balindizi baziyobwedo zyaŋanda ya Leza. 25Kwiindila muli Gesyomu munyina Eliyezaa wakaba siluzubonyina a Syelomiti. Eliyezaa wakazyala Lehabiya walo wakazyala Jesyaiya walo wakazyala Jolamu, walo wakazyala Zikili, walo wakazyala Syelomiti. 26Syelomiti abasazinyina mbibakali kulanga ziyobwedo zyazintu zyakapedwe ku Mwami Leza a Devedi, abasololi bamikwasyi bakali balailili bazyuulu abamyaanda kubikkilizya azyabalailili bankondo bamwi. 27Zimwi zyakasaalwa munkondo bakazizandula kuti zibambuluzye ŋanda ya Leza. 28Bakalangilizya azyakapedwe ku Mwami Leza a Samuyele musinsimi, Saulu mwanaa Kisyi, Abina mwanaa Nee a Jowabu mwanaa Zeluiya. Alimwi Syelomiti abasazinyina bakali kulanga azimwi zintu zyakapedwe ku Mwami Leza.

Milimo yakapegwa Balevi bamwi

29Akati kalunyungu lwa Iziha, Kenaniya abana bakwe bakapegwa milimo yakweendelezya mbeta mu Isilayeli yoonse.

30Akati kalunyungu lwa Hebuloni, Hasyabiya abasazinyina bakali kukonzya bali cuulu amyaanda iili ciloba, mbibakali kweendelezya milimo ya Mwami Leza aya Devedi kumbo lyamulonga wa Jolodani. 31Kwaamba zya Bahebuloni, Jeliya nguwakali mupati wabo kweendelana amazyalani aamikwasyi yabo. Mumwaka wamakumi one wakulela kwa Devedi, kwakaba kuvuntauzya mumabbuku calo cakatondezya kuti baalumi bakonzya ba Bahebuloni bakali kujanika ku Jaaza mu Giliyadi. 32Jeliya wakalijisi basazinyina bali zyuulu zyobilo amyaanda iili ciloba, basololi bamikwasyi bakacibwene, nkaako mwami Devedi wakabacita kuti kabalanga Balubeni, Bagadi, abacisela camusyobo wa Manase mumakani aajatikizya zya Leza aamwami Devedi.

Currently Selected:

1 Makani 26: Tonga96

Highlight

Copy

Compare