1 Makani 14

Milimo ya Devedi mu Jelusalemu

(2 Samuyele 5.11-16)

1Lino mwami Hilamu waku Taya wakatuma batumwa bakwe kuli Devedi. Wakamutumina masamu aamulombe abasikuyasya mabwe ababezi kuyoomuyakila ŋanda mpati yabwami. 2Devedi wakaziba kuti Mwami Leza nguwakkazika bwami bwakwe mu Isilayeli, akuti Leza wabusumpula bwami bwakwe akaambo kabantu bakwe Baisilayeli. 3Mu Jelusalemu Devedi wakakwata abambi bakaintu eelyo wakazyala bana banji balombe abasimbi. 4Ngaaya mazina aabana mbaakazyalila kooko: Syamuwa, Syobabu, Natani, Solomoni, 5Ibaa, Elisyuwa, Elipeleti, 6Noga, Nefegi, Jafiya, 7Elisyama, Beeliyada, a Elifeleti.

Kuzundwa kwa Bafilisiti

(2 Samuyele 5.17-25)

8Ciindi Bafilisiti nibakamvwa kuti Devedi nguwakananikwa kuba mwami wa Baisilayeli boonse, kwakaza mpi iilibambilide kuzoomulangaula. Pele Devedi wakamvwa, aboobo wakainka kuyoobalwana. 9Bafilisiti bakasika akusaala kkuti lya Lefaimu. 10Nkaako Devedi wakabuzya Mwami Leza kuti, “Sena nkabalwane Bafilisiti? Sena ulabaaba kulindime?” Mwami Leza wakati, “Ii, koya, nkaambo ncobeni ndabaaba Bafilisiti kulinduwe.” 11Lino Devedi abasilumamba bakwe bakaakubalwana ku Baalipelazimu akubazunda. Eelyo Devedi wakati, “Mbubonya mbuli bupola maanzi, Leza woola basinkondoma kwiindila mulindime.” Aboobo busena oobo bwakaitwa kuti Baalipelazimu. 12Ooko Bafilisiti nibakatija bakasiya mituni yabo, Devedi wakalailila kuti itentwe.

13Alimwi Bafilisiti bakaboola kuzoosaala kkuti eelyo. 14Ciindi Devedi nakabuzya Mwami Leza wakaambilwa kuti, “Utabagami, pele koya ukabazwide kusule, ukabavumpe cakubasyaanikizya kumangwabale. 15Lino waakumvwa misindo yakweenda atala aazisamu, ukabalwane nkaambo eeci cintondezya cakuti ndakusolweda kale kuyoozunda Bafilisiti.” 16Aboobo Devedi wakacita mbuli mbwaakalaililwa a Mwami Leza. Bakali kujaya Bafilisiti kuzwida ku Gibeyoni kuyoosika ku Geza. 17Mbombubo oobo Devedi mbwaakaduma mumanyika oonse. Aawo Mwami Leza wakacita kuti Devedi ayoowegwe amisyobo yoonse.

Currently Selected:

1 Makani 14: Tonga96

Highlight

Copy

Compare