Loma 12
12
Bwikalo bwa mu mwingilo wa Lesa
1Byonkabyo anweba bakwetu, ne musashijila na bya lusa lwa Lesa, namba mulambule mibiji yenu, ke kitapisho kyumi, kyazhila, kyaitabilwa kwi Lesa, kokunemeka Lesa kwenu kwa mu muchima. 2Kabiji kechi mwipashang'anyenga na ba pano pantanda ne, poso mwalulukenga ke bangi na kusangulwa kwa michima yenu, namba mukayukenga kyaswa muchima wa Lesa, akya kyawama ne kyaitabilwa ne kyalumbuluka.
3Mambo amiwa naambila monka mwayila bupe bonapewa ku bonse ba mwi anweba. Namba kechi mwilanguluke kukilapo pomwafwainwa kwilangulukila ne. Poso mulangulukenga byonka byafwainwa kulanguluka, monka mo emupimina Lesa pa muntu pa muntu kipimo kya lwitabilo. 4#1 Ko 12:12 Mambo byonka byo tuji na bya mubiji byavula mu mubiji umo, ne byonse kechi biji na mwingilo umotu ne. 5Byonkabyo ne atweba, nangwa twavula, twi mubiji umo mwi Kilishitu, ne pa muntu pa muntu, bonse twi bamo. 6#1 Ko 12:4-11 Kasa tuji na bya bupe bya pusanapusana monka mwayila bupe botwapewa, nangwa bungauzhi, twaule monka mwayila kipimo kya lwitabilo lwetu; 7nangwa mwingilo wa bukwasho, tuteshe muchima monka mu mwingilo wetu; aye ufunjisha naye ateshe muchima monka mu kufunjisha kwanji; 8nangwa utundaika na byambo, naye ateshe muchima mu kutundaika kwanji. Aye upana na kukwasha bakwabo, apanetu na muchima yense; aye ulama bantu, naye ateshekotu muchima; aye uba lusa, naye obe lusa na lusekelo.
9Butemwe bwikale bwa kubula bujimbijimbi. Shikwai byatama, kakachilai kyawama. 10Mu butemwe bwa balongo kasa mwitemwisha na lusa anweba bene na bene, mu buneme namo kasa mwinemeka anweba bene na bene. 11Kechi mube mukose pafwainwa kuuba lupata ne, mwikale na muchima walupata, ingijilai Nkambo. 12Sekelai mu luketekelo, tekanyai mu bya malwa, kasa mukelwa mu milombelo. 13Panai ku bazhijikwa bakajilwa kabiji ikalai na muchima wa kutambwila benyi.
14 #
Mat 5:44; Lu 6:28 Bapeshai bemumanyika, peshai, kufing'ang'ana ne. 15Sekelai na boba babena kusekela, jilai na boba babena kujila. 16#Maana 3:7 Ikalai na muchima umo anweba bene na bene. Kechi muteshe michima yenu ku bya kwitumbijika ne, swai kutambula mingilo yasulwa. Kechi mwilanguluke anweba bene amba mwi bamaana ne.
17Kechi mushinkanye kibi na kibi kikwabo nangwa na muntu umo ne. Langulukilai jimo bintu bikawama ku meso a bantu bonse. 18Umvwe kyakonsheka kubiwa, monka mwayila bulume bwenu, mwikale mu mutende na bantu bonse. 19#Mpitu 32:35Anweba batemwe, kechi mushinkanye ne, bino lekai bukaji bwa Lesa bwingile. Mambo kyanembwa amba, “Kushinkanya ko kwami, amiwa yami nkashinkanya, byo byaamba Nkambo.” 20#Maana 25:21,22 Bino “umvwe mulwanyi wobe wafwa nzala, umujishe; umvwe wafwa kilaka, mupe bya kutoma. Mambo pakuba bibye wauba nobe wabiika makala pa mutwe wanji.” 21Kechi mushindwe na bubi ne, poso mushinde bubi na byawama.
Currently Selected:
Loma 12: KNTP
Highlight
Copy
Compare
Share
Want to have your highlights saved across all your devices? Sign up or sign in
The Kaonde New Testament © The Bible Society of Zambia, 2019.
