Loma 10
10
1Anweba bakwetu, kyo nasakisha mu muchima wami ne kyo nebalombelela kwi Lesa, kyokya kuuba namba bapuluke! 2Amiwa nebashimuna namba baji nalupata lwa kusaka Lesa, bino kechi mwayila maana ne. 3Mambo byo babula kuyuka bololoke bufuma kwi Lesa, ne kukeba kwimika bwabo abo bene, kechi bakookela bololoke bwa Lesa ne. 4Mambo Kilishitu yo mpelo ya Mizhilo pakuba amba, bonse baitabila bamone bololoke.
Lupulukilo lwa bantu bonse
5 #
Levi 18:5
Mambo Mosesa wanemba na mambo a bololoke bwaimana pa Mizhilo amba, “Awa muntu uba byaoloka byatongola Mizhilo ukamwenamo bumi.” 6#Mpitu 30:12-14Pakuba bololoke bwa mu lwitabilo bwa amba amba, “Kechi wambe mu muchima wobe amba, ng'anyi ukakanjila mwiulu?” (Ko kuuba amba, na kumwikizha Kilishitu panshi). 7“Nangwa amba, ng'anyi ukekila mu kalengwa?” (Ko kuuba amba, na kumufumya Kilishitu mu bafu). 8Kine kyo bwa amba ke kino amba, “Byambo uji nabyo pa bwipi, monka mu kanwa kobe, ne mu muchima wobe,” o mambo a lwitabilo otusapwila. 9Pakuba umvwe witabe pa kanwa kobe amba, Yesu ye Nkambo, ne kwitabila mu muchima wobe amba, Lesa wamusangwile mu bafu, ukapuluka. 10Mambo na muchima muntu witabila ne kumona bololoke; kabiji na kanwa nako witabila ne kumona lupulukilo. 11#Isa 28:16Mambo kinembelo kyaamba amba, “Bonse bamwitabila kechi bakamona bumvu ne.” 12Mambo Bayudea ne Bagiliki kechi bapusana ne; mambo Nkambo umo ye Nkambo wa bonse, kabiji Aye wibapesha bonse bamwita. 13#Yoe 2:32 Mambo, “Bonse bakeeta pa jizhina ja Nkambo bakapuluka.”
14Lelo bakamwita byepi ye babula kwitabila? Kabiji bakamwitabila byepi ye babula kumvwa? Kabiji bakomvwa byepi kwakubula musapwishi? 15#Isa 52:7Kabiji bakasapwila byepi kwakubula kwibatuma? Monka mo kyanembelwa amba, “Byo auba buuya maulu aboba basapwila Mambo Awama!” 16#Isa 53:1Bino bonse kechi bakookela Mambo Awama ne. Mambo Isaya wa amba amba, “Nkambo, ng'anyi waitaba kusapwila kwetu?” 17Byonkabyo lwitabilo lwiya pakumvwa, kabiji kumvwa nako kwiya na byambo bya Kilishitu.
18 #
Sala 19:4
Bino amiwa naipuzha namba, nanchi kechi ba umvwine nenyi? Ee, kine ba umvwine,
“Jiwi jabo jakumbana pano pantanda ponse,
ne byambo byabo nabyo byafika ne kwapela ntanda.”
19 #
Mpitu 32:21
Bino amiwa naipuzha jibiji namba, bena Isalela kechi ba umvwine nenyi? Patanshi aye Mosesa amba,
“Amiwa nkemubisha kichima
na bantu babula mukoka.
Kabiji na mukoka wabula maana
nkemuzhingijisha.”
20 #
Isa 65:1
Byonkabyo ne Isaya naye wa ambishatu na kuchinchika amba,
“Natanwa na aba babujile kunkeba;
Nemwesha kuboba babujile kunkeba.”
21 #
Isa 65:2
Pakuba kubena Isalela aye amba, “Juba jonsetu natambika maboko ami ku bantu bamilengulwila ne ba lupata.”
Currently Selected:
Loma 10: KNTP
Highlight
Copy
Compare
Share
Want to have your highlights saved across all your devices? Sign up or sign in
The Kaonde New Testament © The Bible Society of Zambia, 2019.
