Byubilo 6
6
Kusalwa kwa bankwasho batanu na babiji
1Mu oa moba, baana babwanga byo bayilenga na kuvula, Bahelena banyinyichilenga Bayudea mambo banabakazhi babo bafwilwa bebalubilengako kwibapa bukwasho bwa pa juba pa juba. 2Ponkapo abo ba jikumi na babiji baichile pamo jibumba ja baana babwanga kobaji, ne kwibambila amba, “Kechi kyafwainwa atweba kuleka kusapwila mambo a Lesa ne kwingila mwingilo wa ku matebulu ne. 3Onkao mambo anweba bakwetu, monaimo mwi anweba banabalume batanu ne babiji, batelwa bulongo ku bonse, bayula na Mupashi ne maana, twibatongwele uno mwingilo. 4Pakuba atweba tukaswezhatu mu milombelo, ne mu mwingilo wa kusapwila mambo.”
5Ne akya kyo ba ambile kibatokeshe ku michima bonse bamu jibumba, kabiji basajile Setepena, muntu wayujile lwitabilo ne Mupashi Wazhila, ne Filipa, ne Polokolusa, ne Nikanola, ne Timona, ne Palamenasa, ne Nikolasa, ye wialwile ke mu Yudea, mwina Antioka. 6Bano bebaleetele ku meso a batumwa, kabiji abo bebalombejile, ne kwibatenteka maboko abo.
7Kabiji mambo a Lesa ananukilenga, ne baana babwanga bayilenga na kuvujilako bingi mu Yelusalema, kabiji ne jibumba jikatampe ja bang'anga jakookejile lwitabilo.
Byo bamukwachile Setepena
8Ne aye Setepena, wayujile bupe ne bulume, waubilenga bya kukumya ne biyukilo bikatampe mu bantu. 9Kabiji kwaimene bamo bamu aya shinagoga yobatela amba, ya Baana ba bene#6:9 Baana ba bene, bano bajinga Bayudea banonkelwe buzha, pano bafuchile mali a buzha bwabo nangwa bebakasulwile mu buzha (byobyo yatongwelwe), ne bamu ya bena Kilene, ne bamu ya bena Alekesandiliya, ne bamu ya bena Kilikya ne Asha, baimene ne kupachika na Setepena. 10Bino abo kechi bakonsheshe kushinda aa maana ne aye Mupashi ye a ambijilengamo ne. 11Byonkabyo bamwene bantu bamo bufyamfya ne kwibapa mazhikakanwa bo ba ambile amba, “Twamumvwine kasa amba bya mwenga bya kunena Mosesa, ne aye Lesa.” 12Kabiji bebavulumwine bantu, ne bakulumpe, ne banembeshi, kabiji bamubungulukijile ne kumukwata, ne kumuleeta mukije. 13Ponkapo baimikile batumonyi ba bubela ba ambile amba, “Uno muntu kechi uzhikilwa kunena bibi pano pantu pazhila, ne Mizhilo ya Mosesa nayo pamo ne. 14Mambo twamumvwine kasa amba amba. Aye Yesu mwina Nazala ukonauna pano pantu ne kwalulula bisela bitupele Mosesa.”
15Ne bonse baikajile mukije pa kumutala, bamwene kilungi kyanji nobe kilungi kya malaika.
Currently Selected:
Byubilo 6: KNTP
Highlight
Copy
Compare
Share
Want to have your highlights saved across all your devices? Sign up or sign in
The Kaonde New Testament © The Bible Society of Zambia, 2019.
