Byubilo 4
4
Petelo ne Yoano ku meso a kije
1Kabiji byo bakyambilenga ku bantu, bang'anga ne mukulumpe wa bakalama ba ku nzubo ya Lesa ne Basadusea bebasolomokele, 2kasa bebazhingijila bingi mambo ba funjishenga bantu, ne kwibasapwila amba Yesu wasanguka mu bafu, ke kiyukilo amba bafu ba kasanguka. 3Ponkapo bebakwachile, ne kwibabiika mu kaleya poso ke keesha, mambo ajinga ke mabanga. 4Pakuba bavula ba umvwine lusapwilo baitabijile; ne pa kwibabala banabalume bafikile kampe ke biumbi bitanu.
5Byo bwakiile lukeelo, bapwijile pamo mu Yelusalema, bandamakyalo babo, ne bakulumpe babo, ne banembeshi. 6Ne Anasa ng'anga mukatampe ne Kaifasa, ne Yoano, ne Alekesanda, ne bonse mobavujila balongo bang'anga mukatampe. 7Kabiji byo bebabikile mukachi, be bepwizhe amba, “Nanchi mu ng'anyi bulume nangwa mu ng'anyi jizhina mo mwaubila kino?”
8Ponkapo Petelo, wayujile na Mupashi Wazhila, ne kwibambila amba, “Anweba bandamakyalo mulama bantu, ne bakulumpe, 9inge leelo mwitwipuzha mambo a kintu kyawama kyamubijilwe uno muntu walemana ne moabukilwa, 10yukai anweba bonse, ne ku bonse bena Isalela amba, uno muntu waimana ku meso enu ke mutuntulu mu jizhina ja Yesu Kilishitu mwina Nazala, ye mwaipayile pa musalabu anweba, ye asangwile Lesa mu bafu.” 11#Sala 118:22 Yesu jo joja,
“Jibwe jo mwalengulwile anweba bashimika
jo jaaluka ke mutwe wa jikonka.”
12“Kabiji lupulukilo lujitu monka mwi aye, pakuba kechi paji jizhina jikwabo muno munshi japewa mu bantu jo twafwainwa kupulukilamo ne.”
13Bino byo bamwene Petelo ne Yoano kasa bachinchika, ne kuyuka amba bajinga bantutu babula kufunda, bakuminye bingi. Kaiji bayukile amba, bajinga ne Yesu. 14Ne byo bamwene muntu ye babukile kasa aimana naabo, kechi bajinga na mwakwikyambila ne. 15Bino byo bebakambizhe amba, akifumaimo mukije, beipwizhe bene na bene amba, 16“Lelo tusakwiboba byepi bano bantu? Mambo kine kino kiyukilo kya kukumya bobe kyuba, be kiyuka ku bonse bamu Yelusalema, kabiji kechi tuji ne mwa kwikikaina ne. 17Bino kuchiina amba kyakakumbana mu bantu, twibafunde kechi bambe jibiji nangwa ku muntu umo mu jo jino jizhina ne.”
18Byonkabyo bebechile ne kwibakambizha amba, kechi bambe ne kufunjisha nangwa pachechetu mu jizhina ja Yesu ne. 19Bino ba Petelo ne Yoano bebakumbwile amba, “Pwishai kana kyawama ku meso a Lesa kwi mukookela anweba kukila kumukookela Lesa nyi? 20Mambo atweba kechi twakonsha kuleka kwamba bintu byotwamwene ne byo twaumvwine ne.” 21Ne abo, byo bebafunjile jibiji bebalekele, byo babujile kumona bya kwibakabishishamo na mambo a bantu; mambo bantu bonse bamutumbijikilenga Lesa, pa kyokya kyaubilwe. 22Mambo awa muntu wabukilwe na kya kukumya, myaka yanji yakijile makumi ana.
Baitabila byo balombele amba bekale bachinchika
23Kabiji byo bebalekele, bayile ku balongo babo, na kwibabula byonse byo bebambijile ku bang'anga bakatampe ne bakulumpe. 24#Lupu 20:11; Ne 9:6; Sala 146:6Ne abo, pa kwibyumvwa basanswile mawi abo kwi Lesa na muchima umo amba, “Anweba Nkambo, mwalengele jiulu ne ntanda, ne kalunga ka mema, ne byonse bijimo! 25#Sala 2:1,2Mwa ambile na Mupashi Wazhila, mu kanwa ka mushakulu wetu Davida, muntu wenu wamwingilo amba,”
“Mambo ka o bazhingijila Bangentila,
Mambo ka ne bantu nabo balangulukila byatu?
26Bamfumu ba pano pantanda beimanya nzhita
ne bandamakyalo bamubungulukila
Nkambo ne Mushingwa wanji.
27 #
Lu 23:7-11;
Mat 27:1,2; Mako 15:1; Lu 23:1; Yoa 18:28,29 Mambo kine monka mu yeuno muzhi, Heloda ne Pontiusa Pilato, ne Bangentila ne bena Isalela, bonse bamubungulukile Yesu wamwingilo wenu wazhila, ye mwashingile manyi. 28Kumuba byonse byo mwafukwijile jimo kuuba na bulume bwenu. 29Ne pano Nkambo, talai abo byo bapinga bipingo, kabiji mwibape bakalume benu kwamba mambo enu na kuchinchika. 30Mutanyike kuboko kwenu ne kwibabuka bantu, kabiji ne biyukilo ne bya kukumya byubiwe mu jizhina ja wamwingilo wenu wazhila Yesu.”
31Ponkapo byo balombele, ne momwa mobapwijile mwasunkene, ne bonse bayujile na Mupashi Wazhila, ke bambetu mambo a Lesa na kuchinchika.
Baitabila byo bekwashishenga na bya bunonshi bwabo
32 #
Byu 2:44,45 Ne jibumba ja baitabila bajingatu na milanguluko imo ne na muchima umo. Kafwako nangwatu umo watelele kintu kya mu bunonshi bwanji amba kyami amiwa mwine ne, kabiji byonse byo bajinga naabyo byajinga bya bonse. 33Ne na bulume bukatampe batumwa bashimwinenga mambo a lusanguko lwa Nkambo Yesu, ne bupe bukatampe bwaikajile pe abo bonse. 34Mwi abo kechi mwajinga nangwa umo wakajilwe ne. Mambo bonse bajinga na mishiji nangwa na mazubo bebipoteshenga, kabiji baletelenga mali o bamwenejilemo, 35ne kwiatula ku maulu a batumwa, ne kwiabanya ku bonse monka mwayijile kukajilwa kwabo.
36Kabiji Yosefwa, ye batumbile batumwa jikwabo amba Banabasa (pa kulumbulula, ko kuuba amba, “Mwana wa bukwasho,”) mwina Levi wasemekejilwe ku Kipilusa, 37wajinga na bujimi bwanji bo apoteshe, ne mali wialetele ne kwiatula ku maulu a batumwa.
Currently Selected:
Byubilo 4: KNTP
Highlight
Copy
Compare
Share
Want to have your highlights saved across all your devices? Sign up or sign in
The Kaonde New Testament © The Bible Society of Zambia, 2019.
