Byubilo 25
25
Paulo byo asakile amba bamuchibile mambo anji kwi Kesala
1Pano Fesatusa, byo aishile mu kyalo, pakupita moba asatu, wayile ku Yelusalema kufuma ku Kesalea. 2Kabiji bang'anga bakatampe ne bakulumpe ba Bayudea bamubujile mambo akwa Paulo, ne kumusashijila, 3ne kumulomba amba, ebobile lusa pakutuma jiwi amba ba kamulete Paulo ku Yelusalema, mambo bamupingijile amba baka mubelamine pa jishinda ne kumwipaya. 4Pakuba Fesatusa wa ambile amba, “Paulo bamulama ku Kesalea, ne amiwa mwine nkayako palutwe kacheche. 5Byonkabyo, aye amba, abo ba luusa mwi anweba bakaye ne amiwa, bakamushinawine ao muntu, kana mwi aye muji byatama.”
6Fesatusa waikajile naabo moba kechi akijile atanu na asatu, nangwa jikumi ne, kepo ayile ku Kesalea. Byo bwakiile lukeelo waikele pa kipona kya kije ne kukambizha amba, bamulete Paulo. 7Pano byo aishile, Bayudea bafumine ku Yelusalema bamuzhokolokele, kasa bamushinawina na mambo avula akatampe o babujile kukonsha kumwesha bishiinka pa kwialumbulula. 8Bino Paulo wiambile aye mwine amba, “Amiwa nangwa ku mizhilo ya Bayudea, nangwa ku nzubo ya Lesa, nangwa kwi Kesala, kechi nalengapo mambo ne.”
9Pakuba Fesatusa, byo asakile kwibatokesha Bayudea pa muchima, wamukumbwile Paulo amba, “Waswanyi kuya ku Yelusalema, baka kuchibile mambo obe konka ku meso ami nyi?”
10Pakuba Paulo amba, “Naimana ku kipona kya kije kya kwa Kesala, koko nafwainwa kuchibilwa mambo. Kechi nalenga mambo ku Bayudea ne, ne anweba bene mwayukishatu. 11Pakuba umvwe ne ngubabibi, ne kuuba nauba kintu kyafwainwa lufu, amiwa kechi nakaana kufwa ne. Kabiji umvwe mu bibye byonse byo banshiina kafwamo kya kine, kafwako muntu wakonsha kumpana kwi abo ne. Naponena kwi Kesala akomvwe mambo ami.”
12Kabiji aye Fesatusa, byo aumvwang'ene naabo ba kije, wamwambijile amba, “Obewa byo wasashijila kuya kwi Kesala, nanchi konka kwi Kesala ko ukaya.”
Mfumu Agilipa ne mukazhanji Belenise
13Pano byo papichile moba amo, Agilipa mfumu ne Belenise bafikile ku Kesalea na kumwimuna Fesatusa. 14Kabiji byo baikajile konka moba avula, Fesatusa wamubujilemo mfumu mambo a Paulo amba, “Kuji muntu umo ye ashiile Felikisa kasa akaswa. 15Ao muntu, byo naji kuya ku Yelusalema, bang'anga bakatampe ne bakulumpe ba Bayudea bambujile mambo anji, ne kusaka amba, namuzhachishe. 16Ne amiwa nebakumbwile amba kechi kisela kya bena Loma kupanatu muntu nangwa wa byepi poso washiinwa wamonang'ana naabo bamushiina kilungi ne kilungi ne kumona mwa kwiambila mambo anji o bamushinawina. 17Onkao mambo byo bapwijile pamo kuno, kechi natayile kimye ne, pakuba lukeelo naikajile pa kipona kya kije, ne kukambizha amba, ao muntu bamuleete. 18Byo baimene ba kumushinawina, kechi bamushinawijile byatama byo naketekejile ne. 19Poso na mambo amo a bya mu kupandawila kwabo bene, ne a umo Yesu, wafwile, ye a ambilenga Paulo amba mumi. 20Amiwa, byo nazhinaukile mwa kwipwizha bulongo bino bintu, namwipwizhe namba kana mwaswa kuya ku Yelusalema na kuchibilwa ano mambo nyi? 21Bino Paulo, byo a musashijile mwine mfumu kineeme, amba a nchibile mambo, amiwa nakambizhe namba, alamwe poso nkamutume kwi Kesala.”
22Ponkapo aye Agilipa wamwambijile Fesatusa amba, “Ne amiwa nasaka ku mumvwa awo muntu amiwa mwine.”
Kumvwa aye amba, “Mukamumvwa keesha.”
23Ponkapo byobwakile lukeelo, aye Agilipa waishile ne Belenise, na buneme bukatampe, batwelele ne mobomvwina mambo, ne bakulumpe bene ba bashilikale, ne bakulumpe ba mu muzhi pamo. Ponkapo Fesatusa wapaine mukambizho ne Paulo bamuletele monka. 24Ponkapo aye Fesatusa wa ambile amba, “Mfumu Agilipa, ne bantu bonse botuji naabo muno, mwamumona uno muntu ye jang'ambijile jibumba jonse ja Bayudea mu Yelusalema ne kuno, kasa babijikizha amba, kechi wafwainwa kukikala na bumi ne. 25Pakuba amiwa namwene namba kechi wauba kintu kyafwainwa lufu ne. Kabiji mwine byo a musashijile mwine mfumu kineeme, amiwa napwishishe mu muchima namba, nanchi nkamutuma konka. 26Kabiji mwi aye kechi nji na kintu kine kya kunemba kwi nkambo yami ne. Onkao mambo kyo namuletela kwi anweba bonse, ne kwiine ke kwi anweba Mfumu Agilipa, namba, pa kupwisha kumwipuzhaipuzha, mmonemo bya kunemba. 27Mambo amiwa nalanguluka namba, kechi kyafwainwa kutuma kaili kwakubula kutela mambo o bamufwisha nao ne.”
Currently Selected:
Byubilo 25: KNTP
Highlight
Copy
Compare
Share
Want to have your highlights saved across all your devices? Sign up or sign in
The Kaonde New Testament © The Bible Society of Zambia, 2019.
