Byubilo 22
22
(Byubilo 9:1-19; 26:12-18)
1Anweba bakwetu ne bataata, ng'umvwai byo nsakwiambila ko muji.
2Kabiji byo ba umvwine byo keebambile mu Kihebelu, ponkapo bazhindamishepotu nzo, kumvwa aye amba.
3 #
Byu 5:34-39
“Amiwa ne mu Yudea, nasemenwe mu Talasusa mu Kilikya, kabiji nakomejile mu ye uno muzhi, ku maulu a Ngamaliela. Nafunjishiwe monka mwayilatu musango wa Mizhilo ya bashakulu betu, kasa naikala na muchima wauba lupata mu bya Lesa, pamo byonka byo muji anweba leelo. 4#Byu 8:3; 26:9-11Kabiji napachile jino Jishinda namba nejipaye, kasa ne bakasa ne kwibataya mu kaleya banabalume ne banabakazhi. 5Abyo ne aye ng'anga mukatampe wakonsha kushimuna, ne bonse baji mukije kya bakulumpe nabo pamo. Kabiji kwi abo ko konatambwile ne makalata a kutwala ku balongo Bayudea, nayile namba nkakwate baji ku Damasakasa, ne kwibaleeta ku Yelusalema kasa bakaswa amba bebakabishe.”
Paulo byo a ambile mambo a kwaluluka kwanji
6“Ponkapo byonakiyilenga pakufika kwipi na Damasakasa, juba kasa jashinkimana pakachi, ponkapo kyeya kikatampe kyasamine kufuma mwiulu ne kunzhokoloka. 7Ne amiwa naponene panshi, kabiji naumvwine ne jiwi jang'ambijile amba, ‘Saulo, Saulo, ubena kummanyikila ka?’ 8Kepo amiwa naipwizhe namba, nanchi anweba yenu bang'anyi, Nkambo? Ne aye wang'ambijile amba, ‘Amiwa ne Yesu wa ku Nazala, ye ubena kumanyika obewa.’ 9Kabiji bonajinga naabo bekimwene akya kyeya, bino kechi ba umvwinenga jiwi ja yewa wang'ambijilenga ne. 10Ne amiwa na ambile namba, pano ngube byepi, Nkambo? Kumvwa aye Nkambo wang'ambijile amba, ‘Imana, uyenga ku Damasakasa, koko bakakubula bintu byonse bya kutongwelwa kuuba obewa.’ 11Kabiji amiwa byo nabujile kukonsha kumona na mambo a lukumo lwa kyokya kyeya, natangijilwe na kuboko kwa boba bonajinga naabo, ne kufika nakafikile mu Damasakasa.”
12“Kabiji muntu umo wa jizhina ja Ananyasa, watekanya mwayila Mizhilo, watelelwe bulongo ku Bayudea bonse baikajile momwa. 13Waishile ne kwimana ponajinga ne kwamba amba, ‘Mulongo wetu Saulo, utambule meso!’ Ponkapo pa kyonkakya kimye nainwine meso ne kumumona. 14Ne aye amba, Lesa wa bashakulu betu, ye wakutongola amba uyuke kyaswa muchima wanji, kabiji umumone ne aye Mololoke, ne kwijumvwa jiwi ja mu kanwa kanji. 15Mambo obewa ukekala kamonyi wanji wa kumushimuna ku bantu bonse mu byonse byo wamona ne byo waumvwa. 16Kabiji pano ikika kyo upembela? Imana, ubatizhiwe, owe bubi bobe, pa kwita pa jizhina janji.”
Lwito lwa Paulo lwa kusapwila ku Bangentila
17“Kabiji ponkapo byo nabwelele ku Yelusalema, byo nalombelenga mu nzubo ya Lesa, namwene kimwesho, 18ne kumona na mumwene kasa ang'ambila amba, Pelawizha ufume mu Yelusalema bukiji, mambo kechi baketaba lushimuno lobe lwa kunshimuna amiwa ne. 19Ne amiwa namba, Nkambo, abo bene bayuka byo nebatayanga mu kaleya, ne kwibapuma mu mashinagoga bonse bemwitabijilenga anweba. 20#Byu 7:58Kabiji byo baichijile mashi a kwa Setepena, kamonyi wenu, amiwa najinga ponka ne kwitabizha, nalamine ne bivwalo bya bamwipayile. 21Kumvwa aye wang'ambijile amba yanga, mambo amiwa nkakutuma kwalepa ku Bangentila.”
22Kabiji baswile kumumvwa poso byo afikile pa kino kyambo; ponkapo basanswile mawi abo ne kwamba amba, “Mufumyaipo ao muntu pano pantanda! Mambo kechi kyamufwainwa amba ekale na bumi ne!”
23Kabiji byo bakibijikilenga, ne kuvuula bivwalo byabo, ne kufuukula lukungu mwiulu. 24Aye mukulumpe mwine wa bashilikale wakambiizhe amba, bamulete mu kamba, bamwipuzhe na kumututaula, namba ngyuke byo bamubijikila bibye. 25Ponkapo byo bamukashile na ntambo, aye Paulo wamwambijile mukulumpe wa bashilikale waimene ponka amba, “Nanchi, kyawama kututaula muntu mwina Loma, ye babula kuzhachisha nyi?”
26Kabiji aye mukulumpe wa bashilikale pakumvwa byobyo, wayile ku mwine mukulumpe wabo amba, “Pano musa kuubaka? Uno muntu ye mwina Loma.”
27Ponkapo aye mwine mukulumpe waishile ne kumwambila amba, “Mbule kana wi mwina Loma obewa nyi?”
Ne aye amba, “Ee, i mo.”
28Kumvwa aye mukulumpe mwine amba, “Amiwa ne bumwene buno bwina Loma na mali avula.”
Pakuba Paulo amba, “Amiwa nasemenwe monka.”
29Ponkapo aba basakile kumwipuzha bafumineko koaji; ne aye mukulumpe mwine wa bashilikale naye ke moyo pakuyuka amba ye mwina Loma, mambo wamukashile.
Paulo ku meso a kije
30Pakuba byo bwakiile lukeelo, byo asakile kuyukisha kine kintu kyo ashiinwa na Bayudea, wamukasulwile, ne kukambizha bang'anga bakatampe ne bena kije bonse bapwijile pamo; ponkapo wamwikizhe Paulo ne kumubiika mu kyenyi kyabo.
Currently Selected:
Byubilo 22: KNTP
Highlight
Copy
Compare
Share
Want to have your highlights saved across all your devices? Sign up or sign in
The Kaonde New Testament © The Bible Society of Zambia, 2019.
