Byubilo 2

Kwiya kwa Mupashi Wazhila

1 # Levi 23:15-21; Mpitu 16:9-11 Byo jafikile juba ja Pentekosta, ne bonse kasa bapwila pamo. 2Ponkapo mwafumine kilulumo mwiulu nobe mwela mukatampe upuupa, kabiji wayuzhizhe nzubo yonse mobaikajile. 3Ne ponkapo kwibamwekejile njimi kasa ya abana nobe mujilo yaikajile pa bonse pa muntu pa muntu. 4Ne abo bonse bayujile na Mupashi Wazhila kabiji batatwile kwamba mu njimi ingi, monka mo ebapelejile byambo Mupashi.

5Bino mu Yelusalema mwaikajilenga Bayudea, banemeka Lesa, bafumine mu mikoka yonse ya muno munshi. 6Kabiji byo kyaumvwanyikile akya kilulumo, jibumba japwijile pamo po bajinga, ne bulaka bwibashinkile, mambo bantu bonse bebomvwine kasa bamba mu milaka yabo, au wanji, au wanji. 7Kabiji bonse bakuminye bingi ne kwiipuzha amba “Olo, bano bantu babena kwamba bonse kechi bena Ngalilea nenyi? 8Mambo ka atweba bonse, pa muntu pa muntu, tubena kumvwa mu milaka yetu yotwasemenwamo? 9Bena Palatiya, ne bena Media, ne bena Elama, ne bekala mu Mesopotamya, ne mu Yudea, ne mu Kapadokya, ne mu Pontusa, ne mu Asha, 10ne mu Filigya, ne mu Pamfilya, ne mu Ijipita, ne monse mu Libya pepi ne ku Kilene, ne benyi bafuma ku Loma, 11ne bonse Bayudea ne bealula ke Bayudea bena Keleta, ne bena Alabya, tubena kwibomvwa sa bamba mu njimi yetu mambo a mingilo ikatampe ya Lesa.”

12Ne abo bonse bakuminye bingi, ne kwiipuzha bene na bene amba, “Kino kyayila mu ka?” 13Pakuba bamo bebakosamikilenga amba, “Bano bantu bapendwa binyu bya bintonto!”

Mambo asapwijile Petelo

14Bino Petelo waimene naba jikumi na umo, wasanswile jiwi janji, ne kwibambila amba, “Anweba bena Yudea, ne anweba bonse mwikala mu Yelusalema, yukai kino, ne kumvwa byambo byami. 15Mambo bano bantu kechi bapendwa byo mubena kulanguluka anweba ne; mambo juba jikijitu lukeelo. 16Pakuba kino kyo kyokya kya ambile ngauzhi Yoela amba.

17 # Yoe 2:28-32 “Mu moba akapelaako Lesa wa amba amba,

‘nketulwila Mupashi wami pa bantu bonse:

Ne baana benu ba balume ne ba bakazhi bakaulanga na Mupashi,

Ne bansongwalume benu bakamona bimwesho,

ne bakote benu bakalota biloto.

18Kine, mu oa moba,

nketulwila Mupashi wami pa bakalume bami ba balume ne ba bakazhi ne pa bazha bami,

ne abo bakaulanga na Mupashi,

19Kabiji nkamwesha bya kukumya mwiulu,

ne biyukilo pano panshi;

Bya mashi, ne bya mujilo, ne bya mimbulungwa ya bwishi.

20Juba jikaluka ke jifiita,

ne ng'ondo ukaluka nobe mashi,

juba ja Nkambo kasa jikyangye kufika,

jonkaja jikatampe ne ja lukumo.

21Kabiji bonse baketa pa jizhina ja Nkambo bakapuluka.’

22“Anweba bena Isalela, umvwai bino byambo! Yesu mwina Nazala, muntu waitabilwe kwi Lesa ku meso enu mu mingilo ya bulume ne mu bya kukumya ne mu biyukilo, byo aubile Lesa mwi aye mukachi kenu, monka mo mwayukila ne anweba bene; 23#Mat 27:35; Mako 15:24; Lu 23:33; Yoa 19:18aye uno Yesu, byo asolwelwe na mambo a kutongwela jimo ne kuyukila jimo kwanji aye Lesa, anweba yenu mwamupopele pa musalabu ne kumwipaya konka ku maboko a bampupabizhila. 24#Mat 28:5,6; Mako 16:6; Lu 24:5Pakuba aye Lesa wamusangwile mu bafu byo apwishishe kumukasulula ku misongo ya lufu, mambo kechi kyakonshekele amba lufu lumulame ne.” 25#Sala 16:8-11 Mambo Davida wa ambile mambo a aye amba,

Namwene Nkambo kasa aikala ku meso ami moba onse,

mambo aye uji ku kilujo kyami, kechi ntenkene ne.

26Onkao mambo muchima wami watokele to,

ne lujimi wami wasekejile.

Mubiji wami naye,

ukakelwa mu luketekelo.

27Mambo anweba kechi mukalekelela mweo wami mu Kalunga ne,

nangwa kupana wenu Wazhila amba amone bubole ne.

28Mwangyukisha ne mashinda a bumi,

mukangyuzha na lusekelo mambo muji ne amiwa.

29“Anweba bakwetu, nanchi pano nsa kwimwambilatu kwakubula kupita mumbaji na mambo a mushakulu Davida, namba wafwile kabiji bamuzhikile, ne kilende kyanji tuji nakyo ne leelo. 30#Sala 132:11; 2 Sam 7:12,13Byo ajinga ngauzhi, ne kuyuka amba, Lesa wanchipila luchipo amba, ku nkunwa ya mukifuka kyobe nkekazha umo pa jitanda jobe. 31Aye, byo amwenejile jimo kino, wa ambile na mambo a kusanguka kwa Kilishitu amba,

“Kechi bamushiile mu Kalunga ka bafu ne,

nangwa mubiji wanji naye kechi wabolele ne.”

32Uno Yesu bamusangwile kwi Lesa, ne atweba bonse twi batumonyi banji. 33Byonkabyo byo atumbijikilwe ku kilujo kya Lesa, ne kutambula kwi Shanji kyo alayile kya Mupashi Wazhila, aye waitulula uno. Byonka byo mwamona ne kumvwa. 34#Sala 110:1Mambo Davida kechi wakanjijile mwiulu ne, bino aye mwine wa ambile amba,

“Nkambo wa ambijile Nkambo yami amba,

ikala ku kilujo kyami

35Poso ngalule balwanyi bobe ke kyakutulapo maulu obe.”

36“Onkao mambo bonse ba munzubo ya Isalela bayukishetu amba, Lesa wamupa bu Nkambo ne bu Kilishitu, yenka uno Yesu ye mwaipayile pa musalabu.”

37Ponkapo byo ba umvwine bino, ne michima ibapiile munda, ne kwambila Petelo ne batumwa bakwabo amba, “Anweba bakwetu, tube byepi?”

38Ne Petelo wibambijile amba, “Lapilai, ne kubatizhiwa bonse mu jizhina ja Yesu Kilishitu mu kulekelwa mambo enu, kabiji mukatambula Mupashi Wazhila wa bupetu. 39Mambo awa mulaye walaijilwe anweba, ne baana benu, ne bonse baji kwalepa, ne bonse mobavujila bobaketa kwi Nkambo Lesa wetu.” 40Ne na byambo bikwabo byavula aye wibabujishenga ne kwibambila amba, “Ipulushai ku kyo kino kisemi kyaluwankana!” 41Byonkabyo abo batambwile mambo anji ba batizhilwe, kabiji mu jonkaja juba bantu babikilweko kwi abo kampe biumbi bisatu.

42Kabiji bakosejiletu mu mafunjisho a batumwa ne mu lumvwang'ano, ne mu kutebaula shinkwa ne mu milombelo.

43Ponkapo ne moyo wibakwachile bantu bonse, ne byavula bya kukumya ne biyukilo byaubilwe kupichila mu batumwa. 44#Byu 4:32-35Ne bonse baitabijile baikajile pamo, ne byonse byo bajinga naabyo byajinga ke bya bonse. 45Kabiji bapoteshenga ne mishiji yabo ne bikwabo byo bajinga naabyo, ke baabile ne ku bonse bakajilwe, 46Kabiji pa juba pa juba, bakelelwenga na muchima umo mu nzubo ya Lesa, kasa batebula shinkwa ku mazubo kwabo, ne kuja kajo kabo na lusekelo ne na muchima umo, 47kasa batota Lesa, ne kutalwa bulongo ku bonse. Kabiji ne aye Nkambo wabikilengapo kwi abo pa juba pa juba aba bapulukilenga.

Currently Selected:

Byubilo 2: KNTP

Highlight

Copy

Compare