Byubilo 19
19
Paulo byo ajinga mu Efisesa
1Apolosa byo akijinga mu Kolinda, Paulo wapichile mu byalo bya mukachi ka kibunji ne kwiya ku Efisesa. Akwa wataineko baana babwanga bamo 2ne aye wibepwizhe amba, “Mwatambwile Mupashi Wazhila byo mwaitabijile nyi?”
Kumvwa abo amba, “Ine, kechi twaumvwinepo nangwa pacheche amba kuji Mupashi Wazhila ne.”
3Kumvwa aye amba, “Nanchi mwabatizhilwe ng'anyi lubatizhilo?”
Abo amba, “Mu lubatizhilo lwa kwa Yoano.”
4 #
Mat 3:11; Mako 1:4,7,8; Lu 3:4,16; Yoa 1:26,27 Ne Paulo wibambijile amba, “Yoano wabatizhilenga na lubatizhilo lwa lulapilo, kasa ebambila bantu amba, bamwitabile awa wamulondejile panyuma, aye Yesu.”
5Pakumvwa bino, ba batizhilwe mu jizhina ja Nkambo Yesu. 6Kabiji aye Paulo byo eba tentekele maboko, Mupashi Wazhila waishile pe abo; kebambe na njimi ingi ne kwaula na Mupashi. 7Abo bonse bajinga banabalume kampe jikumi na babiji.
8Kabiji aye Paulo watwelele mu shinagoga, kasa amba na kuchinchika pa bang'ondo basatu, kasa epuzhang'ana naabo ne kweseka kwibetabizha bya mu bufumu bwa Lesa. 9Pakuba bamo byo bakoseshe michima ne kulengulula, ne kwijinena bibi jino Jishinda#19:9 Jishinda, kyalumbulula amba, mafunjisho a pa mambo a Yesu Kilishitu ne byo bafwainwa kulondela aba baitabila. ku meso a jibumba, aye wafumineko ko baji, wasendele baana babwanga, kaipuzhang'ane naabo mu sukuulu wa Tilanusa pa juba pa juba. 10Kino kyaubilwenga byonkabyo myaka ibiji, onkao mambo bonse bajinga mu Asha ba umvwine mambo a Nkambo, ne Bayudea ne Bagiliki pamo.
Baana ba kwa Sekeba
11Lesa naye waubilenga mingilo ya bulume ya kukumya kupichila mwi Paulo. 12Ya kuuba batwajilenga bitambala ne bisapi bya ku mubiji wanji ku bakolwa, ne abo babukilwe ku bikola, kabiji ne bapashi babipa balupukilengamo. 13Kabiji bamo Bayudea bang'anga ba lubuko bonka bapitang'enenga, batatwile abo bene kutela jizhina ja Nkambo Yesu pa bajinga na bapashi babipa amba, “Nemukambizha mwi Yesu ye asapwila Paulo.” 14Kabiji kwaji banabalume batanu na babiji baana ba kwa Sekeba mu yudea, mukulumpe wa bang'anga, bo baubilenga bino.
15Kumvwa aye mupashi wabiipa wibambijile amba, “Yesu namuyuka, Paulo naye namuyuka, pakuba anweba mwi bang'anyi?”
16Kabiji aye muntu wajinga na mupashi wabiipa wibakilukijile ne kwibashinda bonse, ne kwibakookesha, ponkapo bavundumukile mu nzubo matakotu na byaso byabo. 17Ne bino byayukanyikilwe ku bonse, ne ku Bayudea ne ku Bagiliki baikajilenga mu Efisesa. Kabiji moyo wibakwachile bonse, ne jizhina ja Nkambo Yesu jatumbalele. 18Ne bavula baitabijile ke beye na kwisolola mambo abo, ne kutelaula byabo byo baubilenga. 19Kabiji bakwabo nabo bavula baingijilenga bya bwanga, baleetelenga ma buku abo pamo, beapwizhizhe pamo ne kwiasoka mu mujilo ku meso a bonse. Byo babajile mutengo wa mali o apotelwe, afikile ke biumbi makumi atanu. 20Byonkabyo mambo a Nkambo ayilenga na kukoma na bulume ne kushinda.
Kiwowo mu Efisesa
21Kabiji pakupita bibye, Paulo wapingile mu muchima amba, kana napwisha kupita mu Makedonya ne Akaya, nkaya ku Yelusalema. Kabiji amba, kana nafika kokwa nafwainwa kumona ne ku Loma. 22Kabiji byo atangizheko ku Makedonya babiji ba mwi abo bamukwashishenga, ba Timoti ne Elasatusa, aye mwine washajileko ka kimye mu Asha.
23Pa kyonkakya kimye kwabukile kiwowo kikatampe kechi kicheche ne, na mambo a jino Jishinda. 24Mambo a muntu umo jizhina janji Demeteliusa, sendwe wa siliva, ye wabunjilenga tubipashang'ano twa nzubo yazhila yakwa Atemisa, wibanonkeshanga basendwe banji byavula. 25Ne aye wibapwizhizhe pamo basendwe ne bamwingilo bakwabo baingilanga ye wa mwingilo ne kwibambila amba, “Anweba bakwetu mwayuka amba, monka mu ye uno mwingilo mo motumwena bunonshi bwetu. 26Kabiji mwamona ne kumvwa amba, kechi muno mu Efisesa monkatu ne, nanchi ne pepi monse mu Asha, uno Paulo wibakanjikizha bantu bavula, ne kwibalulula amba ba lesa bo balenga ku maboko kechi ba lesa ne. 27Bino kampe kechi busendwe bwetu bonka bukasulwa ne, kampepo ne nzubo ya kwa Atemisa, lesa wa mukazhi mukatampe, nayo ikekala ke yatu, ne aye mwine ukapelulwa ne lukumo lwanji lukapwa, yenkaye ye bapopwela bonse bamu Asha ne pano pantanda ponse!”
28Kabiji pakumvwa bino, babukile bingi bukaji ne kubijika kasa babijika amba, “Atemisa wa bena Efisesa ye mukatampe!” 29Ne muzhi yense waubile kiwowo ne kulukuta bingi, kabiji byo bakwachile Ngayusa ne Alisatakusa, bena Makedonya, mo baendelanga ne Paulo, bavundumukile lubilo kya mumo kuya mu nzubo ya kukayilamo. 30Ne aye Paulo byo asakile kutwela mu jibumba ja bantu, baana babwanga bamukainye. 31Kabiji ne bamo bamu bukulumpe bwa Asha byo bajinga balunda nanji, bamutumijile jiwi ja kumusashijila amba, kechi mweseke kutwela mu nzubo ya kukayilamo ne. 32Bino bamo ba bijikishenga kingi, bakwabo nabo kingi mambo jibumba jaubilengatu kiwowo ne kulukuta, ne bavulatu kechi bayukile kyo bapwijile pamo ne. 33Ponkapo bamufumishe Alekesanda mu jibumba, byo bamushinjikileko ku Bayudea. Ne aye Alekesanda wakebawile na kuboko kwanji amba, neambile ku bantu. 34Ponkapo byo bayukile amba, ye mu Yudea, bonse ba bijikishenga na jiwi jimotu kasa babijikatu kampe ma awala abiji amba, “Atemisa wa bena Efisesa ye mukatampe!”
35Aye munembeshi wa muzhi byo azhindamikilepo jibumba, wa ambile amba, “Anweba bena Efisesa, bantu bonse bayuka amba, muzhi wa bena Efisesa ye ulama nzubo ya kwa Atemisa mukatampe, ne nkishi waponene mwiulu. 36Kabiji byo mwabula kukonsha kumona mwa kwibilengulwila bino, mwafwainwa kutekanya, ne kuuba bintu kya lubilo ne. 37Mambo bano bantu mwibaleeta kuno, nangwa kechi baiba bya mu mazubo azhila ne, nangwa kumuba mwenga lesa wetu wamukazhi ne. 38Onkao mambo umvwe Demeteliusa, ne basendwe bo aji naabo, baji na mambo na muntu, nangwa ng'anyi nangwa ng'anyi, bije ko biji, ne bachiba mambo nabo po baji. Balekai baleete bya kwishiina bene. 39Kabiji umvwe mwasaka kintu kikwabo kingi, kikachibilwa mukije kya moba onse. 40Mambo kine atweba tuji mulukatazho lwakupewa mambo a kino kiwowo kya leelo, byo pabula ne kintu kya kwibingishishamo na mambo a kino kiwowo. Kabiji ne pano ponse kechi tukamona mwa kwikitotolwela kyo mwapwilakena ne.”
41Kabiji byo a ambiletu bino, wapalang'enye jibumba.
Currently Selected:
Byubilo 19: KNTP
Highlight
Copy
Compare
Share
Want to have your highlights saved across all your devices? Sign up or sign in
The Kaonde New Testament © The Bible Society of Zambia, 2019.
