Byubilo 11
11
Petelo byo apaine sawakya ku kipwilo kya mu Yelusalema
1Batumwa ne balongo bajinga mu Yudea ba umvwine amba, Bangentila nabo batambula mambo a Lesa. 2Byonkabyo Petelo byo afikile mu Yelusalema, ba mu mukanda bamunenene amba, 3“Anweba mwakatwelele mu babula mukanda, ne kuja naabo.”
4Bino Petelo wibalondolwejile mo kyamwekejile amba.
5“Amiwa najinga mu muzhi wa Yopa kasa ndomba, kabiji naponejile mutulo tukatampe. Ponamwene kimwesho kya kijiilo kasa kiikila, pamo nobe kisapi kikatampe kyo bekizha panshi ku makonka onse ana kufuma mwiulu, ke kiye ne ponji, 6byo nekizanzhile meso, ne kwikitajisha, namwene banyama ba mikupa ina, ne banyama bakaji, ne bikalaba panshi, ne bang'onyi ba mwiulu. 7Kabiji naumvwine jiwi amba, ‘Petelo, imana; wipaye uje!’ 8Pakuba amiwa namba, ‘Akyo ne, Nkambo! Mambo kechi napishishepo kala mu kanwa kami kyatu kya kijejeje nangwa kyazhila ne.’ 9Bino jiwi jang'ambijie jibiji mwiulu amba, ‘Kyoatokeshaa Lesa, obewa kechi wikitela amba, kyatu kya kijejeje ne.’ 10Kino kyaubiwe jisatu ne byonse bebikokejile jibiji mwiulu. 11Kabiji talai ponkapotu ne banabalume basatu baimene pangye ya nzubo yo twajingamo, bo bantumijile amiwa kufuma ku Kesalea. 12Ne aye Mupashi wang'ambijie amba, uye naabo kwakubula kuzhinauka ne. Ne bano balongo batanu na umo bayile ne amiwa, kabiji twakatwelele mu nzubo ya yeo muntu. 13Ne aye witubujile mo amwenejile malaika kasa aimana mu nzubo yanji, ne kumwambila amba, ‘Tuma bantu ku Yopa, baleete Shimona, jikwabo Petelo. 14Ye ukakubula byambo byo ukapulukilamo, obewa ne bonse ba munzubo yobe pamo.’ 15Byo natatwile kwamba, ponkapo aye Mupashi Wazhila waikijile pe abo, pamo byonka byo aikijile pe atweba kuntendekelo. 16#Byu 1:5Ne amiwa ponkapo navulukile byambo bya Nkambo, byo a ambile amba, ‘Yoano kine wabatizhilenga na mema, pakuba anweba mukabatizhiwa na Mupashi Wazhila.’ 17Byonkabyo umvwe aye Lesa wibapele kya bupetu kimotu kyonka kyoetupelepo ne atweba byo twamwitabijile Nkambo Yesu Kilishitu, amiwa yami ng'anyi, wakonsha kukanya Lesa!”
18Byo ba umvwine bino, bazhindamine nzo, ke bamutumbijike Lesa amba, “Nanchi kine Lesa wibapa ne Bangentila nabo lulapilo lwa ku bumi!”
Kipwilo kya ku Antioka
19 #
Byu 8:1-4
Kabiji abo bapalang'ene na mambo a bya malwa byabuukile pe Setepena bayile bakafikile ne ku Finesha, ne ku Kipilusa, ne ku Antioka, ne kwamba mambo ku bangi nangwa umo ne, kana ku Bayudea bonka. 20Kabiji kwajinga bamo ba mwi abo, bena Kipilusa ne bena Kilene, abo pakufika ku Antioka, kebambe ne ku Bagiliki#11:20 Bagiliki: amo ma buku a kala a mu Kigiliki muji ambaBayudea ba ambanga Kigiliki, nangwa amba bantu ba ambanga Kigiliki, kasa basapwila Mambo Awama a Nkambo Yesu. 21Ne kuboko kwa Nkambo kwajinga naabo, ne jibumba jikatampe ja itabijile ne kwalulukila kwi Nkambo.
22Kabiji nkuwa yabo yaumvwanyikile ne mu matwi a kipwilo kya mu Yelusalema, kabiji bamutumineko Banabasa amba akafike ku Antioka. 23Aye pakufikako ne kumona bupe bwa Lesa, wasekejile kabiji wibatundaikile bonse amba, balamachile kwi Nkambo na michima yabo yonse. 24Mambo aye wajinga muntu wawama, wayujilwe na Mupashi Wazhila ne na lwitabilo, ne bantu bavula banungilweko kwi Nkambo.
25Ponkapo Banabasa waimene lwendo kuya ku Talasusa na kukeba Saulo. 26Ne byo a mutaine wamuletele ku Antioka, byonkabyo mwaka umo mutuntulu bapwijilenga pamo na kipwilo ne kufunjisha bantu bavula. Kabiji baana babwanga mu Antioka momo batelelwe patanshi amba bena Kilishitu.
27Kabiji mu onka a moba mu Antioka mwaishile bangauzhi bafumine ku Yelusalema. 28#Byu 21:10 Kabiji mwaimene umo jizhina janji Agabusa, ka ambe mu Mupashi amba kukeya kipowe kikatampe kikakumbana pano pantanda ponse. Ne akyo kyaishile mu moba a kwa Kaludiusa. 29Byonkabyo baana babwanga bapwishishe mu michima yabo amba bonse pa muntu pa muntu, monka mo akonshesha kuuba muntu, tutume bya bupe bya kwibakwasha bakwetu bekala mu Yudea. 30Kabiji bekyubile, ne kwibituma ku bakulumpe ku maboko a ba Banabasa ne Saulo.
Currently Selected:
Byubilo 11: KNTP
Highlight
Copy
Compare
Share
Want to have your highlights saved across all your devices? Sign up or sign in
The Kaonde New Testament © The Bible Society of Zambia, 2019.
