2 Petelo 2
2
Bafunjishi ba bubela
1Bino kwamwekele ne bangauzhi ba bubela mu bantu, pamo ne mwi anweba namo mukekala bafunjishi ba bubela, bo bakatwezhamo kumbaji mafunjisho angi a lonaiko, kasa bakana ne aye Nkambo wibapotele, ne kwiletela abo bene lonaiko bukiji. 2Bino bavula bakalondela byubilo byabo bya bunya, kabiji na mambo a abo, jishinda ja bukine jikanenwa bibi. 3Kabiji monka mu lunkumbwa lwabo bakemujiila bintu na byambo byabo bya kujimbaika. Batambwile kala luzhachisho lwabo, kabiji ne lonaiko lwabo kechi lukabanda ne!
4Mambo umvwe Lesa wabujile kwibaleka bamalaika byo balengele mambo, bino wibatayile mu Tatalusa, ne kwibabika mu bimbo bya mfishi, na ku pepembelela kije. 5#Nte 6:1—7:24Ne ntanda ya kala nayo kechi wiilekele ne, bino wapulwishe Nowa wasapwijilenga bololoke, ne bakwabo batanu na babiji, byo aletele muyulo pano pantanda pa bambulwa kwakamwa Lesa. 6#Nte 19:24Kabiji byo aalwile mizhi ya Sodoma ne Gomola ke buto tu, wiizhachishe na lonaiko, ne kwiyalula ke ya kumwenako abo bakekala mu bumbulwa kwakamwa Lesa. 7#Nte 19:1-16Kabiji wamupokolwele Lota waoloka, byo aubishe bulanda na mambo a bwikalo bwa bunya bwa babi. 8Mambo awa muntu waoloka, byo aikajile mwi abo ne kwibamona ne kwibomvwa, wamanyikile muchima wanji waoloka pa juba pa juba, na byubilo byabo bya bumpupabizhila. 9Aye Nkambo wayuka bya kwibapokolola banemeka Lesa mu lweseko, ne kwibalama babula koloka mu lukabisho, kupembela juba ja kije, 10pakuba bene bakilaamo bonkaba balondalonda bya buntunshi mu bya lwiso bya bubipisho, ne kusuula ba luusa.
Bachinchika ne kulondela monka mwayila bya butunshi byo basaka, nangwa kuchiina pa kwibanena bya mwenga ba lukumo ne. 11Pakuba bamalaika, nangwa bakila ngovu ne bulume, kechi bebashiina bya mwenga ku meso a Nkambo ne. 12Pakuba bano, nobe bilengwa byabula maana, byasemwatu bu nyama bya kukwata ne kwibyonauna, bamba bya mwenga pa byambo byo babula kuyuka, ne abo bakonaika pamo byonkabyo, 13kasa bamona bibi, yo mfweto ya bibi byabo abo amba, kwilemena mute kyo kitutokela ku muchima. Abyo, byo biko ne bulema byo belemena mu bijiilo byabo bya butemwe byo baja ne anweba. 14Baji na meso ayuula bukende, abula kutondwa kulenga mambo. Bakokola ba michima yanekena, baji na michima yaubisha lunkumbwa, bo baana bafingwa. 15#Bala 22:4-35 Bashiile jishinda jaoloka baya mungi, byo balondela jishinda ja kwa Balamu mwana Beola, ye watemenwe mfweto ya kuuba byatama, 16pakuba aye bamulengulwile na mambo a kuzhilula kwanji. Mbongolo ubula kwamba wa ambile na jiwi ja muntu ne kukanya kukosama kwa aye ngauzhi.
17Bano o masulo abula mema, ko kamfwa katwalwa ku kipuupu kikatampe; bo balamina kufiita kwa mfishi. 18Mambo, bamba byambo bikatampe byatu, bya kwitota, bebongola bantu babena kupuluka kuboba baji mu bwikalo bwa bulubi. 19Kasa bebalaya amba, mukekala ke baana ba bene, abo bene kasa baji bazha ba bubole. Mambo konka koashindwa muntu ko konka koekala buzha. 20Mambo umvwe pa kupuluka ku bubipisho bwa pano pantanda monka mu maana a kuyuka Nkambo ne Mupulushi wetu Yesu Kilishitu, bakasankana ne kushindwa jibiji, bwikalo bwabo bwapelaako bukakila butanshi mukutama. 21Mambo kibawaminako inge babujile kuyuka jishinda ja bololoke, pakuba pa kwijiyuka ne kuvundaminako ku mukambizho wazhila ye bapelwe, kyo kibatamina. 22#Maana 26:11Mambo kibamwekela monka mwayila akya kishimpi kya kine amba, “Kabwa wabwela ku malashila anji mwine” ne “nkumba waowele, wabwela mukwitaka mu mateshi”.
The Kaonde New Testament © The Bible Society of Zambia, 2019.