ROMA 7
7
Puig Yahudi niggai serti tut niwak yamti ndo bindo binye
1Disut bat jen, jahagom jikan tut mun di Puig Yahudi niggai serti mbot kep binye tu. Gima rino jikan tut bipia Puig Yahudi niggai serti om kep tungwatu di igyaijo nya he. 2Nimbot kepti rinok gini. Puig Yahudi niggai serti dima om kep sop di wak nijjep. Tirigi nijjep niyaijo yo ne ninyeng tak kep nitnem. Gino nijjep mai leu lene Puig Yahudi niggai serti di bindei nijjep ninyeng tak kep noni dima bindei kwek nitnem bu. 3Gino nitnem bit bong biyem njita tut hi ter tirigi nijjep niyaijo yo ne tungwatu ipai biyam bipia noni ne sop di pigau nijjep ri. Noro gino nijjep mai leu lene Puig Yahudi niggai serti dima bindei kwek noni. Gino noni ug wak pinai hi ter bu ne sisar nicut tut yamti ntun him bi. 4Disut bat jen, nok gima tut jeni cem. Jindo jimai eisi bak Puig Yahudi niggai serti lewo jinggre kin Kristus ninguda. Nogindini jijem jiceu bit Kristus di Allah kon leu nimai eisi. Allah kon Noni hanyen leu nimai eisi leu binhyepo nyeni iba niyaijo nijep biyai midyai mem Allah. 5Lewo nipou ne igyai munti nya bit leu tungwatu dihyeisi dini ingut kanti nya. Mpe dima lene Puig Yahudi niggai serti di yai nibou tut nye bindei ba, ingon pri kep sisar ba, inok awak mem igyai munti nya di bie ndam nimai. 6Noro tini bu ne Allah kwek nye leu Puig Yahudi niggai serti nide nisindemti. Indo imai eisi bak Puig Yahudi niggai serti di tak kep nye tu. Nogindini nyeni iba nisinati nijep biyai midyai mem Allah tug hon Allah Ninnei nibie tut nyeti noro tug hon Puig Yahudi niggai serti nipas kepti bi.
Puig Yahudi niggai serti bindei tungwatu nya ibon sisar
7 #
Kel. 20:17; Ul. 5:21 Gi nok ne ipai mindei i? Ipai Puig Yahudi niggai serti kinei e? E bi! Noro Puig Yahudi niggai serti dima ribindei dino dikan tut sisar. Gino Puig Yahudi niggai serti dima cuon ser sisar ningon pri kep mun di hiter mbunti bi ne dingon hukti tut sisar dima bi. 8Puig Yahudi niggai serti dima bon nituti mem sisar lene sisar yai nibou tut da ba, biyai ningon pri kepti nyeng mang bibor ttau hak ei dingonti. Gino Puig Yahudi niggai serti ningat rin bi ne sisar tak kep nye bi lewo sisar mai su. 9Nipou tirigi Puig Yahudi niggai serti jo bi ne dibou coi. Noro tirigi Puig Yahudi niggai serti tot dingonti ne gima bindei sisar ntun him, 10apino dimai. Puig Yahudi niggai serti di nimbie him bindei ba, diyai niyaijo nijep dima bindei timek da ba, dimai. 11#Kej. 3:13 Sisar ba Puig Yahudi niggai serti biyai nituti mem gima ris da bikimukep da cem.
12Puig Yahudi niggai serti dima ntun Allah him ne niggai ser dati nya hagom kwei leu Noni ba, sren bibor kin kei bibor cem. 13Gima ndo bipia mun di kei bibor dima bindei ba, dimai e? E bi! Noro sisar bindei ba, dimai tug hon mun di kei bibor dima leu binhyepo piga digai sisar niyai munti nya. Gima rino Allah nicuk nyeti nya ndo bindo bipia sisar ne mun di kinei nindig bibor ri.
Ningon kanti can di srou kui yam
14Ikan tut bipia Puig Yahudi niggai serti ntun Allah Ninnei him noro dani ne tungwatu dihyeisi dini rin ba, sisar ubon da bidinok awak. 15#Gal. 5:17 Dingon kiowi tut diyai kepti nya. Dipi bidiyai kep mun di igbit noro bit bon diyai gima yok kan bi leu api diyai kep mun di dingon mpo tut nya. 16Gino diyai kep mun di srep tut dingon kanti ne gini ndo bipia dice tut bipia Puig Yahudi niggai serti ne mun di igbit ri. 17Ningat ne dani rino no di bon mun dima bi noro sisar di yai nibou tut dingonti riyai mun dima. 18Dikan tut bipia mun di kei nyeng hi ningat rin ei dingonti kin dingut kanti di ntun dihyeisi dini himti bi. Mbro nok gino dingon kanti di kei bibor ntun dingon him lo, bit bon diyai dibou tut kan bi. 19Dipi bidiyai mun di igbit noro bit bon diyai kan bi leu api diyai kep mun di kinei gi dingon mpo tut nya. 20Gino diyai kep mun di dingon mpo tut ne gini ndo bipia dani rino no di bon mun dima bi noro sisar di yai nibou tut dingonti ribon mun dima.
21Gima rino dirop ninda ndigsi bipia niggai serti di yai nibou tut da rinok gini. Mbro nok gino dipi bidiyai mun di igbit lo, mun di kinei nongkom he ttau hak biyai nituti mem da yo. 22Dingon mien llei sut Allah niggai serti. 23Noro niggai serti hiter yai nibou tut dingonti ba, srep tut niggai serti di diba dibou ngwakti bice tut. Sisar niggai ser dati di yai nibou tut dingonti kat da ba, disima. 24Aye! Notou mem da i? Dingon kinei bibor! Tou riteu da bidingwes ngun leu dingut di bindei bidimai dini i? 25Dipai sigyo bak Allah! Noni miteu da bidingwes ngun tug hon ide Tuhan Yesus Kristus. 26Mun di pek kep mem da rinok gini. Diba dibou ngwakti bibit Allah niggai serti noro dingut kanti di ntun dihyeisi dini him kuk no bak sisar niggai serti.
Currently Selected:
ROMA 7: HAD
Highlight
Share
Compare
Copy
Want to have your highlights saved across all your devices? Sign up or sign in
