NINGAT-HI-NGAT NYA 20
20
Nijam ari bingwam nitindur sribu gom
1Gima ngwig leu lene dingat lo, malaikati gom srek kwei leu gwamti bittei kusin mem ninnei rom nya ide jui nsi bikrau lante nindig bibor ei nindati. 2#Kej. 3:1 Lene Noni kat naga dino wou di ningat rin ei nimbie him di ninyeng Bilis kin Ninnei Di Sibut cem lene ba lante biteu noni mem ari bingwam sribu gom. 3Noni com naga ug ei jui ninnei rom nya ide leu api bakusin ser dimbou lene ba biei nggrai bikrau kep. Gima hagom nok leu binhyepo bit bon Bilis ris bak tungwatu dihyeisi bu kan bi bibou ari bingwam sribu gom ngwig ug e. Tirigi tto bou dem tu lene dimbou jui nsi dima mikau leu noni mem nijam di jei bi.
4 #
Dan. 7:9, 22 Lo bi lene dingat banggo mbrei nya. Biditou kep bu lo, yo di tungwatu nya irop ibou leu drek dip gi itri tut Yesus nihyet di nijit kin Allah nihyet pima. Yo dini ikuk yok bak mindhe di niten-pos kin nide kwar bigyai mindhe de nitak bukti ei ingwak kin inda bi sren. Ikiju hanyen leu imai eisi bigwam ei banggo mbrei nya dip lewo Allah yai nisindemti biyok mem gima inyeng tak kep tungwatu nya. Inok nibou ndig nya di igwam kui Yesus mem ari bingwam sribu gom. 5Yo dini ne nimpung gi nigom di ikiju hanyen leu imai eisi ri. (Yo di imai su nindigsi nya ikiju hanyen leu imai eisi bigyo bibou ari bingwam sribu gom ngwig ug e.) 6Yo di ikiju hanyen bit nimpung gi nigom dima ingon nggei-hi-nggei ba, ingon llei bibor cem. Nimai gi nican om kep yok bi. Inok imam mem Allah kin Kristus ba, inok nibou ndig di igwam kui Noni mem ari bingwam sribu gom.
Bilis tug ndei hukum
7Mpe dino ari bingwam sribu gom pima ngwig leu lene malaikati gom kau dimbou ig bui leu Bilis. 8#Yeh. 7:2, 38:2, 9, 15 Leu api Bilis mimbut ug ei dihyei nisurti-nipekti hagom leu binhyepo ris bak tungwatu nya yahagom. Yo dini ne timiei minu ndig Gog kin Magog nya rin ba, imangti dem kep igum di jo ei muk pimat nimangti. Bilis nduk yo dini yahagom kwei mem gima ikon pran. 9Yo dini minjei siceu ug ei dihyei nisurti-nipekti bikrop ttai mpia di Allah de limwa nya ibong eisi di nok minu ndig di Noni ngat ningwes eisi. Noro hum di cut kros kwei leu gwamti yem yok bingwig. 10No dima com Bilis di ris bak tungwatu nya yahagom ei muk hum belerang di cig-caiti. Mindhe di niten-pos kin nabi nitrowai itug ndei hukum ei muk hum nipou su. Yo dini mitug ndei inghuisi wei nindig bibor bikwop mmun-njap kikau buug hon nohonti bi.
Hukum ningwig honti
11 #
Dan. 7:9-10
Gima ngwig leu lene dingat banggo mbrei nitiei di nindig bibor kin No di gwam dip. Dihyeisi kin mpia-bbed him pror hak leu No dima Noho bei ba, ingat gima yok bu bi sren. 12Leu api dingat lo, yo di imai su nya bitut yo di inyeng jei nya kin yo di inyeng bi nya yahagom igya simiak banggo mbrei. Lene hi mbrek leu srat nya lo, mbrek leu srat gom kin bu ba, srat dini ne Srat Yo Di Igyaijo Nya ri. Yo di imai su nya itug ndei hukum bibit leu igyai munti nya di jo ei srat dimati. 13Muk ngeisi cem kes yo di imai ei minyei jou nya. Nimai kin minu nimai nya ide cem ikes yo di imai su nya leu api yahagom itug ndei hukum bibit leu igyai munti nya. 14Leu api malaikati gom com nimai kin minu nimai nya ide ug ei muk humti. (Muk hum dini ne nimai gi nican ri.) 15No dima com yo dino inyeng jo ei Srat Yo Di Igyaijo Nyati bi nya ei muk humti.
Currently Selected:
NINGAT-HI-NGAT NYA 20: HAD
Highlight
Copy
Compare
Share
Want to have your highlights saved across all your devices? Sign up or sign in
