MBEN ISRAEL IMBUT-MBUT NYEN 8
8
Nicukti tut mini njeng nidihima
1 #
Kel. 25:31-40, 37:17-24 tuhan pai bak Musa, 2“Ma apai bak Harun bipia mpe di noni tin ei mini njeng ningat muhwindacan dima ei nidihimti lene suar ma tin nok gi igbit leu binhyepo piga digai bei nidihim nohobei. 3Lene Harun yai igbit mun di tuhan pai dima ba, tin mini dima yok leu binhyepo ninjeng piga digai bei nidihim dima noho. 4Iba mas di itug su bibon mini njeng nitriti bikui bipek kin nide mitou nibimau nya ba, ibibit leu bindo di tuhan ndo bak Musa pima.”
Musa ta Lewi nya mem midyai di igyai nya
5Lene tuhan pai bak Musa, 6“Adimig Lewi nya leu mben Israel nindigsi nya ikieti ba, abon midut nibindei kwes yok mem yoni, 7tug hon nisinati dini. Ma aba minyei bigimahap yoni mem nibon midut nibindei ningon kwes. Lene acuk yok ba, ikak ingkek dip titut yam bitot ide sinsun nya cem. Tug hon nisinati dima lene yoni mipwoi-pwau. 8Leu api acuk yok ba, ijem sapi nikre di nipmot bo ningut gom kwei bigyai njita nibipai sigyoti di iba tepun kin mini bibon di ibikuk yok bak tuhan cem kwei. Leu api aug jem sapi nikre ningut gom kin bu kwei mem nibon midut nibiyai nikos ser sisarti. 9Gima leu api anduk limwa mben Israel yahagom ba, idem yam lene acuk Lewi nya ba, idem yam bigya kui dimbou ei Ditde Prak Meng nuhui a. 10Suar limwa nya ikes inda bijo ei Lewi nya ibou dip, 11leu api Harun ta Lewi nya noyam kin munkwas di mben Israel idimig pijum ei mem Dani leu binhyepo Lewi nya igyai kep Ditde midyai di dindo biyok. 12Leu api suar Lewi nya ikes inda bijo ei sapi nikre ningut can dima ibou dip bibui sapi dima ningut gom mem nibon midut nibiyai nikos ser sisarti lene ibui ningut gom bu mem nibon midut nindig mindhe titut kep hum. Tug hon nibon midut dima lene abindei kwes Lewi nya.
13Ma acuk Lewi nya biyuug ya kui Ditde nimbar hum dok ei Harun kin nipmot bat nya yoho bei leu api Harun nya midimig Lewi nya pijum ei mem Dani. 14Aba nisinati dima bidimig Lewi nya leu mben Israel nindigsi nya ikieti leu binhyepo dima yok bou Da nok Ditde. 15Niabiati abon midut nidimig Lewi nya pijum ei mem Dani tu lene dem mem gima yoni igyai midyai ei Ditde Prak Meng nsi. 16Dibindei ba, yoni igya luei munggwom pinai mighumbou mben Israel yahagom yohoti bidima yok bou Da nok Ditde tu. 17#Kel. 13:2 Mpe di diyai nimai bak mben Mesir imunggwom bat mighumbou nya yahagom lene didimig mben Israel ipmot bat mighumbou nya kin ide mindhe-ndhe nihyen kep nipmot bou nya hagom pijum ei mem Danti. Diyai gima bou Da nok Ditde. 18Nogindini diyai Lewi nya ba, igya luei munggwom mighumbou mben Israel hagom. 19Lene dikes Lewi nya yahagom bak Harun kin nipmot bat nya leu binhyepo igyai midyai mem mben Israel ei Ditde Prak Meng nsi lene yahara ser nhyema dikos ser mben Israel ide sisar di idideu Prak Meng di kwes-kwau dima kin gi ibisinggre bi ba, dikes nsuwer ajar ei yok dip bi cem.”
20Lene Musa kin Harun kin mben Israel yahagom ikes Lewi nya hak bak tuhan dem igbit nicuk Musati. 21Lewi nya iba minyei bigimahap yonti mem nibon midut nibiyai ningon kwes kin Allahti ba, itot ide sinsun cem leu api Harun ba nibon midut nibiyai nikos ser sisarti bidimig yok ei nok munkwas di idimig pijum ei mem tuhan. 22Mben Israel igyai kep mun nyeng di bitut Lewi nya di tuhan cuk yok tut hagom. Tug hon nisinati dima lene Lewi nya idem mem gima igyai midyai ei tuhan De Prak Meng nsi ba, Harun kin nipmot bat nya ibie tut yok.
23Lene tuhan pai bak Musa, 24“Bikwop no di Lewi di nide njap dem ari bingwam ningot can ba, muhwi bikui lene suar yai midyai ei Ditde Prak Meng nsi. 25Lo, tirigi nide njap dem ari bingwam ningot muhwi lene ma kes midyai dima ei ba, gwam hak. 26Gima leu su lene ma asindui sut ba, noni mpu Lewi nindigsi nya ei Ditde Prak Meng nsi. Noro ninyeng tak kep midyai di yai kikep hi bu bi. Ma anyohou dimig Lewi nya ide midyai tug hon nisinati dima.”
Currently Selected:
MBEN ISRAEL IMBUT-MBUT NYEN 8: HAD
Highlight
Copy
Compare
Share
Want to have your highlights saved across all your devices? Sign up or sign in
