MBEN ISRAEL IMBUT-MBUT NYEN 27
27
Zelafehad nipmisop bat nya
1Zelafehad yai nipmisop bat nya ibou muhwi di inyeng rino Mahla kin Noa kin Hogla kin Milka kin Tirza. Zelafehad nicig rino Hefer di nicig rino Gilead di nicig rino Makhir di nicig rino Manasye di nicig rino Yusuf. 2Misop ibou muhwi dini yuug ngat Musa kin Imam Eleazar kin nibou nya kin limwa nya yahagom di idem yam ei bigya kui dimbou ei Prak Meng tuhan De nuhuigya. Lene ipai biyok, 3“Nyeni nicig mai ei iggum ndigsi lo, noni yai nipmot bat nya hi bi. Noni tti kin Korah di ham nimbuk kep tuhan pima bi noro mai drek dip nonti nide sisar. 4Noro nggon rima ninyeng mipror leu daptar di mben Israel ide bat nya inyeng joti drek dip gi noni yai nipmot bat nya di intun noni him bi i? Ma akwas dihyei ninda rom hi tut nyeni cem ba, nima bou nyeni noyam kin Arig nide bat nindigsi nya.”
5Leu api Musa pai sut ingon kanti dima bak tuhan. 6Lene tuhan pai bak Musa, 7#Bil. 36:2 “Zelafehad nipmisop bat nya ipaisi dima ne igbit ri. Ba, akwas dihyei ninda rom hi tut yoni ba, ima bou yoni noyam kin icig nide bat nindigsi nya. Suar akwas dihyei di Zelafehad ninda rom pima tut nipmisop bat nya. 8Apai bak mben Israel bipia gino pinai gom mai leu ba, yai nipmot bat nya hi bi lene suar nipmisop bat nya ima nide dihyei ninda rom dima bou yok nok ide bu. 9Gino no dima bon nipmisop bat nya hi bi lene suar nikindig bat-nikinjoi bat nya ima nide dihyei ninda rom dima bou yok nok ide bu. 10Gino no dima bon nikindig bat nikinjoi bat nya hi bi lene suar nipmum bat nya ima nide dihyei ninda rom dima bou yok nok ide bu. 11Gino no dima bon nikindig bat-nikinjoi bat nya kin nipmum bat nya hi bi lene suar no di ntun nicig ninsi de him di dideu hak rino ma dihyei ninda rom dima bou no nok nide bu. Suar mben Israel ikrau kep Ditde nikos tutti dima bit leu nok dicuk yokti tug hon Musa.”
Musa ndo Yosua mem gima ya luei nohoti
(Ul. 31:1-8)
12 #
Ul. 3:23-27, 32:48-52 Lene tuhan cuk Musa bipai “Aug ba, akui ug ei Nungug Abarim leu binhyepo acap ug ei minu di midiyai bak mben Israel. 13Niabiati acap minu dima leu su lene nani cem ayai nimai bit leu nok akindig Harun nimaisi. 14Lewo tirigi jingat rin ei iggum ndigsi Zin lene jitunggwei sut dicuk jeti. Tirigi po jide limwa nya inso-nso nyen bak Dani ei Meriba lene jindo Ditde nisindemti di kwes-kwau brei ei igyai him bi.” (Mun dini cut igkep yok ei minyei bousi Meriba dideu Kades ei iggum ndigsi Zin.)
15Gima rino Musa ngat nadi bipai, 16“tuhan di nok nibousi mem niyaijoti hagom ei dihyeisi dini e, dingat nadi leu binhyepo ando igbit no di mibie tut Ade limwa dini yok kan. 17#1Raj. 22:17; Yeh. 34:5; Mat. 9:36; Mrk. 6:34 Ando igbit no di mibie tut yok kan ei mpe di ikon pran leu binhyepo Ade limwa nya minok domba di ibon ide gembala hi bi nya au.”
18 #
Kel. 24:13
Lene tuhan pai binoni “Ma ahig Yosua di Nun nipmot kwei lewo noni joi bibor. Lene ma akes anda hacem ei nibou nggram him. 19Ma akes noni biya ei imam Eleazar noho bei lene ei ade limwa nya cem yahagom yoho bei leu api apai sut brei ei yahagom igyai him bipia noni ne no di miya luei ahoti ri. 20Ma akes Ade nisindemti ndrim hi bak Yosua leu binhyepo mben Israel yahagom mibit nihyet. 21#Kel. 28:30; 1Sam. 14:41, 28:6 Noro suar noni ba ningon com Eleazar di nok jide imam lewo Eleazar nongkom mikan igbit tut dingon kanti tug hon Urim kin Tumim#27:21: Nipas kep Urim kin Tumim ndo tut mun nyeng can di imam nya ikrau kep leu binhyepo ibikan tut Allah ningon kanti. Nisinati mem gima ikrau kep Urim kin Tumim dima jo nibreisi ba, hi ningon dorti tut bi. di noni krau kep pima. Tug hon nisinati dima lene Eleazar mibie tut Yosua kin mben Israel yahagom leu binhyepo ikan tut dingon kanti tut mun di mipek kep mem yok hagom.” 22Lene Musa yai hagom bit leu nok tuhan nicuk noti. Noni kes Yosua biya ei Eleazar kin mben Israel yahagom yoho bei. 23#Ul. 31:23 Lene kes ninda hacem ei Yosua nibou nggram him bipai sut brei bipia noni ne no di ya luei Musa nohoti bit leu nok tuhan nicuk noti ri.
Currently Selected:
MBEN ISRAEL IMBUT-MBUT NYEN 27: HAD
Highlight
Copy
Compare
Share
Want to have your highlights saved across all your devices? Sign up or sign in
