MBEN ISRAEL IMBUT-MBUT NYEN 22
22
Nibou ndig mben Moab hig Bileam kwei
1Lene mben Israel imbut kikau ba, yohok ide prak meng nya ei mbang briep Moab ei Minyei Yordan nite bei mpia nipriti dideu Yerikho.
2Tirigi Balak di Zipor nipmot nok nibou ndig mben Moab miap tut notou mben Israel ihwen mben Amori bitimek bingwig cem miap tut mben Israel imangti cem, 3lene noni kin nide limwa nya yahagom ingon ttin bibor. 4Gima rino mben Moab imbrap bit nibou mben Midian nya bipai “Jei bi ne tungwatu ningot ndig dima yok mipinde mun nyeng hagom di jo ttai nyeni nok sapi nya di igyem minta ei minta nidumti ri.” Lene Nibou Ndig Balak, 5#2Ptr. 2:15-16; Yud. 11 pinak tungwatu nya ibou poi leu binhyepo yuug hig Bileam di Beor nipmot kwei. Mpe dima ne Bileam bong ei Petor dideu Minyei Efrat ei hanjop Amau. Balak sok nihyet ei awak dima yok dip bak Bileam bipai “Akan tut bipia keret nindig bibor ikwei leu minu Mesir tu. Ba, idigek kep mpia lene mbigom mipos nyende minu dini leu nye ug ri. 6Yo dima imangti nindig bibor dor njiriek nye. Gima rino ma akwei mbriom yok mem da. Apino yoni misindem bu bi leu api nyeni minihwen yok ba, nijji yahagom leu minu dini. Dikan tut bipia tirigi angat nadi tindei mun di kei mem tungwatu nya lene mun di kei pek kep mem yok. Tirigi ambriom tungwatu nya lene mun di kinei cut igkep yok bu.”
7Lene nibou mben Moab kin mben Midian nya imbut ug ei Bileam de minu bipwoi mitiei nok gi dem mem Bileam leu binhyepo noni mbriom mben Israel. Lene ipai binoni bit leu nok Balak sok nihyet ei yok dip. 8Lene Bileam cuk yok bipai “Ma jibong bit da mmun di ariman leu api njap di hyep bu lene midimbot kep tut tuhan nicuk dati bije.” Gima rino nibou pima yok ibit bong.
9Lene Allah kwei hig ser Bileam “Tou nya rino ibong bit na i?”
10Lene noni buhup “Balak di nibou ndig mben Moab sok nihyet bak dani bipai sut, 11keret gom di jo leu minu Mesir kwei yem mpia ei nide minu. Nibou ndig dima cuk dani bidimbriom yo dima leu binhyepo noni mihwen yok bijji yok leu nide minu dima.”
12Lene Allah pai bak Bileam “Ma abit yo dima ba, ambriom mben Israel au lewo dijoi sut yok.”
13Njap di hyep bu lene Bileam ug pai bak yo di Balak pinak yok kwei pima “Suar jingkwei hanyen hak ug lewo tuhan pai ser da bipia dibit je au.” 14Gima rino yo dima ingkwei hanyen biyuug ngat Balak bipai binoni “Bileam kou sut gima bit yok kwei.”
15Lene Balak pinak nibou di inyeng jei bibor imang bibor bidor njiriek gi nipou nya bu kwei. 16Yoni cem yuug ngat Bileam bindat kep Balak nihyet nok gini “Dibidip huk na leu binhyepo akwei ngat da lene ma akou sut da bu au. 17Midiba mitiei nindig bibor birop bina ba, midiyai igbit acuk dati cem. Gima rino dibidip huk na leu binhyepo akwei mbriom yo dini mem da.”
18Noro Bileam buhup “Mbro nok gino Balak yai perak kin mas ei nide ig nibou ndig hagom bida lo, bit bon disrep tut tuhan di nok ditde Allah nicuk dati nyeng gom poi mien cem kan bi. 19Noro ma jibong bit da ariman mmun bit leu nok yo po ikwei bibie pima leu binhyepo gino tuhan joi sut lene Noni mindo igbit ningon kanti gom kin bu bida.”
20Himmun dima lene Allah kwei pai bak Bileam “Gino yo dini ikwei hig na leu binhyepo abit yok lene ma atin ei ba, abit yok hak ug. Noro ma ayai mun tunggwei dicuk nati au.” 21Njap di hyep bu lene Bileam kes ban ei nide keledai dip bibri lene bit nibou mben Moab pima yok.
Bileam de keledai ngat malaikati gom bou niyai him
22Noro Allah ningon sibui sut Bileam tut nimbutti dima. Tirigi Bileam bri bigwam nide keledai dip bimbut kak puig bitut nide awak nya ibou can di ibit noni lene tuhan de malaikati gom tau kros biya ser puig hacan ba, bigen ser nimbutti. 23Tirigi keledai dima ngat malaikati di ya ser puig ei dima di krau simeda ei nindati lene noni kriek leu puig bimbut ei miaisi. Noro Bileam bui nide keledai bijem noni hanyen kwei kak puigya. 24Lene malaikati dima son nyahan biya ser puig ei nikomti di jo ba anggur nghousi nikieti ba, ngug tig jo nitehi-nitehi ser tu. 25Hammi tirigi keledai ngat malaikati dima mbigom bu rino noni tti bibram kui ngug tig dima bibindei ba, tig pinggin Bileam nimig ba, dut bibor. Gima rino Bileam bui nide keledai mbigom kin bu. 26Lene malaikati dima son nyahan bu biya ser puig di kom bibor apino bit bon keledai mbut kikau kan bi. 27Tirigi keledai ngat malaikati dima mbigom bu lene noni kou bibong hak ei dihyeisi. Lene Bileam gga nindig bibor biba nide tom bibui keledai sindem bibor. 28Lene tuhan bindei ba, keledai dima hap niji bimbrap bit Bileam bipai “Dinggon ndei na i? Nggon rino abui da mbiningai su i?”
29Lene Bileam buhup “Dibui na lewo aba da bikek! Gino dipwoi ditde simeda kwei lene midiyai nimai bina hak ug.”
30Lene keledai hig ser noni “Dani ne keledai gom ngat di abri-bri nyen bikwop njap ngwa hagom rin bi e? He dibibon na nok gini hi nipou su e?”
Leu api Bileam buhup “Bi.”
31Lene tuhan bindei ba, Bileam ngat malaikati di ya ei mpia dima di krau simeda ei nindati bou niyai him. Lene noni kuk no biba ningwak bikik mpia. 32Lene malaikati dima hig ser noni “Nggon rino abui ade keledai mbiningai su i? Diya ser puig ba, dibigen ser na lewo dikan tut bipia ambutti dini njiriek tuhan ningon kanti. 33Noro ade keledai ngat da bou niyai him ba, kriek leu puig mbiningai. Gi bi ne mmo yo diba simeda bitot na tu. Noro midikes tut ade keledai ba, ningwes ngun.”
34Lene Bileam buhup “Dibon sisar tu. Gi po Andigpoi ya ser puig tut da ba, bigen ser da pima jo nibreisi mem da bi. Gino Andigpoi joi sut lene midingkwei hanyen ug ei ig bei hak ug.”
35Noro malaikati buhup “E bi! Abit yo dima hak ug. Noro midipingok angonti leu binhyepo gino ahap aji lene ahyet mitibim tut dingon kanti he.” Lene Bileam mbut kikau bit nibou po Balak cuk yok kwei pima.
Balak ya um Bileam
36Tirigi Balak miap tut Bileam nikweisi lene noni ug um noni ei minu ndig Moab di jo ei Minyei Arnon nyai hammi minu niya kwas yamti ei minu Moab. 37Lene noni hig ser Bileam “Nggon rino akwei ngat da tirigi po dihig na kwei nimbigom pima bi i? Akan bipia mun di dinyeng tut nya dem mem gima dibirop mun di kei hanyen bina bi e?”
38Lene Bileam buhup “Yo nogindini ne dikwei su. Noro bit bon dipai mun nyeng hi njiriek Allah nicuk dati kan bi.” 39Lene noni bit Balak ba, yuug ei minu ndig Huzot. 40Lene Balak bui sapi nya kin domba nya ningut poi bikwas mikwau bihi tut Bileam lene bihi tut nibou nya di ingat rin bit noni.
Bileam tri tut Allah ningon kanti nimbigom
41Njap di hyep bu lene Balak buwak Bileam ba, ikui nungug Bamot-Baal. Lene Bileam ngat mben Israel ide prak meng nya nite hi he.
Currently Selected:
MBEN ISRAEL IMBUT-MBUT NYEN 22: HAD
Highlight
Copy
Compare
Share
Want to have your highlights saved across all your devices? Sign up or sign in
