MBEN ISRAEL IMBUT-MBUT NYEN 15
15
Nicukti tut mindhe-ndhe mem nibon midut nya
1Lene tuhan yai nicukti nya bak Musa, 2nicukti dini yok ne suar mben Israel igyai kep ei minu di tuhan miyai biyok. 3Ma jiba sapi nikre kin domba nikre kin domba pmot nikre kin kambir bikuk je bak tuhan mem nibon midut nindig mindhe titut kep hum kin nibon midut nibigo nehengti kin nibon midut nikwas mun mikuisi tut Allahti kin nibon midut di jibon kikep ngan-nganti nya. Lene mikwau di jindig dima ngge kei bipwoi tuhan ningona. 4Ma tungwa tou rino jem mindhe kwei dima ttei tepun kilo gom di ba mini zaitun liter gom bisrigsi kwei mem nibon midut njita nibipai sigyo bak Allahti. 5Mindhe pima ne domba pmot nikre kin kambir mem nibon midut nindig mindhe titut kep hum rin ba, suar no dima pwoi ba anggur ngei liter gom kwei. 6Gino mindhe pima ne domba nikre rin lene ma no dima ttei tepun kilo gom di ba mini zaitun liter gom bisrigsi kwei mem nibon midut njita nibipai sigyo bak Allahti, 7bitut ba anggur ngei liter gom cem. Lene mikwau di jindig dima ngge kei bipwoi tuhan ningona. 8Gino mindhe pima ne sapi nikre mem nibon midut nindig mindhe titut kep hum kin nibon midut nibigo gau nipreu mun ei mem Allah kin nibon midut nibiyai ningon kwes kin tuhan cem rin, 9lene suar no dima ttei tepun kilo ningai di ba mini zaitun liter can bisrigsi kwei mem nibon midut njita nibipai sigyo bak Allahti, 10bitut ba anggur ngei liter can cem. Lene mikwau di jindig dima ngge kei bipwoi tuhan ningona.
11Suar jittei mun dima yok tirigi jiba sapi nikre kin domba nikre kin domba pmot nikre kin kambir bikuk je bak tuhan. 12Gino mun di jisuar mem jibikuk je bak tuhan dima dor njiriek leu mindhe ningut gom lene jikum ei tepun kin mini kin ba anggur ngei nikwas dimati bit leu mindhe pima nimangti. 13Suar bikwop mben Israel yahagom ibit nicukti dima mpe dino iba mindhe bikuk yok bak tuhan. Lene mikwau di indig dima ngge kei bipwoi tuhan ningona. 14Nok gima cem tut ngkiai gom di bong lai-lai de bibong timiei cem ei jikieti di bon midut nindig mikwau di ngge kei bipwoi tuhan ningon dima ba, suar noni cem bit nicukti dima hagom. 15#Im. 24:22 Nikos tutti kin nicukti dima hagom ngot kep jeni kin ngkiai nya di ibong ei jikieti bijo ninno bijo kikau. Lewo jeni kin yoni jahagom jinoyam ei tuhan niyai him. 16Nikos tutti kin nicukti dima hagom noyam mem jeni kin ngkiai nya cem.
17Lene tuhan yai nicukti bak Musa, 18nicukti dini cem mem mben Israel leu binhyepo ibit ei minu dima tuhan miyai bak yoni. 19Mpe dino jikinyon ei niyem njita ngat di ntun minu dima him lene suar jiba jinda om gi ndia hi ei nok munkwas di jipigig sut pijum ei mem tuhan. 20Gino jiba gandum di jike ei nimbie him binon roti lene suar jikwas roti di jinon nimbie him nok munkwas di jipigig sut pijum ei tut tuhan. Lene ma jikwas roti dima bit leu nok gi jikwas gandum ngan nimbie him di jiba tig gilingan bidram. 21Suar jikwas roti di jiba gandum di jike ei nimbie him binon dima pijum tut tuhan bijo ninno bijo kikau.
22Lene tuhan sok nihyet ei Musa dip bak nide limwa nya bitri tut nikos tutti tut no di yai tunggwei nicukti di Noni yai bak Musa pima, 23kin nikos tutti tut mben Israel yahagom di igyai tunggwei nicukti pima ei njap di tuhan tri tut nicukti nya kikau ug ei nijam yo di intun yok him sindam nipekti. 24Gino limwa nya yahagom ibon sisar nibisinggre bi bigyai tunggwei nicukti drek dip gi ikan tut nicukti dima bi lene suar yahagom ijem sapi nikre ningut gom kwei mem nibon midut nindig mindhe titut kep hum leu api mikwau di indig dima ngge kei bipwoi tuhan ningona. Lene ittei gandum kwei mem nibon midut njita nibipai sigyo bak Allahti ba, ittei ba anggur ngei kwei mem nibon midut ba anggur ngei di isiberti cem. Bitut gima lene ijem kambir nikre ningut gom kwei mem nibon midut nibiyai nikos ser sisarti. 25Leu api suar imam bon midut nibiyai nikos ser sisarti mem limwa nya. Apino tuhan mikos ser ide sisar di ibon kin gi ibisinggre bi dima lewo ijem mindhe kwei mem nibon midut nibiyai nikos ser sisarti kin nibon midut nindig mindhe titut kep humti cem bak tuhan. 26Noni mikos ser limwa mben Israel kin ngkiai nya di ibong ei ikieti yahagom ide sisar lewo yahagom icut ei nitunggwei sut kin nibisinggre bi dimati.
27 #
Im. 4:27-31
Gino tungwagom ngat he bon sisar kin gi bisinggre bi lene suar jem kambir niwek ningut gom di nide njap ug ei ari bingwam gom kwei mem nibon midut nibiyai nikos ser sisarti. 28Lene suar imam bon midut nibiyai nikos ser sisarti mem no dima ei tuhan Noho bei leu binhyepo tuhan kos ser nide sisar. 29Nicukti dima mem mben Israel kin ngkiai di ibong timiei ei jikieti yahagom di ibon sisar kin gi ibisinggre bi.
30Noro gino limwa mben Israel gom kin ngkiai pima gom ibon sisar kin gi ibisinggre lene no dima ningwes pri gau tuhan. Suar jikes hukum nimai ei no dima dip hak ug. 31Lewo no dima srep tut tuhan ba, bisinggre bibon mun tunggwei tuhan nicukti. Suar no dima biang nide sisar nibuhunti bitug ndei nimai drek dip.
No di tunggwei nicukti tut Njap Nigwam Kep Ninghuisi
32Mpe di gom tirigi mben Israel ingat rin ei iggum ndigsi lene ingat pinai gom di ug rop biei mem Njap Ningwam Kep Ninghuisi. 33Lene ibuwak no dima ug ei Musa Harun nya kin limwa nindigsi yahagom yoho bei. 34Leu api ikuk noni ei sirima lewo ikan tut nibon ndei noniti bigyo. 35Lene tuhan pai bak Musa “Suar jikes hukum nimai ei no dima dip hak ug. Jikri noni ug ei prak meng yati nisai leu api suar limwa mben Israel yahagom iba tig bihwen noni bimai ei sirima. 36Lene limwa yahagom ikri no dima ninda ug ei prak meng yati nisai leu api iba tig bihwen noni kikau bimai bit leu tuhan nicuk yokti.”
Nicukti tut sinsun bou mbu nya
37Lene tuhan cuk Musa, 38#Ul. 22:12 bipai bak mben Israel “Ma jiba sinsun bou mbu nya bimau jide sinsun ninggrun lene jiba mong nidri bikri sinsun bou mbu dima gom-gom. Suar jeni kin yo di intun jeni him jiyai nok gima bijo ninno bijo kikau. 39Sinsun bou mbu dima ne mun nibiyok ngon kep ri. Bikwop mpe di jingat gima yok lene ma jiyok ngon kep dicuk jeti nya hagom ba, jiyai igbit. Tug hon nisinati dima mijibbwe ser Dani leu ba, jibit jenti jingon kanti kin jingon pri kepti nya bi. 40Sinsun bou mbu dima yok mibipingok jingonti leu binhyepo jibit dicuk jeti nya hagom. Apino mijinok Ditde ningat-ngat nya ri. 41Dani ne tuhan bidinok jide Allah ri. Dibuwak je kwei leu minu Mesir leu binhyepo dibindei Danti ba, dinok jide Allah. Dani ne tuhan ri.”
Currently Selected:
MBEN ISRAEL IMBUT-MBUT NYEN 15: HAD
Highlight
Copy
Compare
Share
Want to have your highlights saved across all your devices? Sign up or sign in
