NAHUM 3
3
1Buhun bibor mem minu ndig dini di mpung tut nisuglai mun cig nya kin nihwen mun cig nya. Lene minu ndig dini mpung tut ndigban di ipos nya kin gi icat nya cem.
2Angig atingou mem na mbrei ngkek di ibibui kuda nimuhunti kin kroba pran nimig nibimbiti kin kuda di idor imig nibimbiti kin kroba pran nisigikti.
3Nimpung tentara ibri kuda bigya kep tungwatu nya. Singau simeda kigyei igyaisi ba, micim njeng-jau kei. Bit bon igikwop yo di imai nimbiam nya imangti kan bi. Ingut di jo-jo yam dip bindei ba, tentara indrat bitti.
4 tuhan no kes hukum kep minu Niniwe di nikrar jut dinok sop sundal dip yo. Minu Niniwe ba nuubbuti kin ninda dutti bibrim ngkiai nya imang ingon lene ba nihyet di mmau bihwen ingon cem.#3:4: Nipas kep bihwen ingon cem cem kei lene nipas kep buubon yok binok awak cem kei.
5 tuhan Di Sindem Bibor pai “Minu Niniwe e, midihwen bit na! Dikau sre ade leu na ei ngkiai nya igyai him leu api ingat ammai joti.
6Midibibon na nok mun di biyai ningkek di henha tut bidiba mumpiang birus na cem leu api tungwatu nya igyai ngkek ttin ser na.
7Yo di ingat na miyoom yonti ei ting bipai ‘Minu ndig pmem Niniwe wer igkum kroi ningkom! Tou riningon ngguk tut no i? Hi di joi sut gwam ser ningon bi.’ ”
8Minu ndig pmem Niniwe e, notou mem gima akeisi dor njiriek minu ndig pmem Tebe ei minu Mesir i? Minu ndig pmem Tebe cem jo simin minyei di bicuon no dem kep nok ngug tig. Ningat ne Minyei Nil rinok tentara nibousi di igya coi di ngkiem ser yok. 9Minu ndig pmem Tebe ninyeng tak kep minu Sudan kin Mesir. Ba, nide nisindemti ug bipek nohonti bi. Minu Libia kin Put itti kin minu ndig pmem Tebe. 10Mbro nok gima lo, siceu nya ikat timiei minu ndig pmem Tebe bibindei ba, isima ei ingkiaisi. Ibui nimunggwom bat nya bimai bidem simpak nahau yamti hagom. Iba lante biteu nibou di inyeng jei nya yahagom ba, iko bibinggok tut leu api ikwas yo dima tut yam biyuubon yok nok awak.
11Minu ndig pmem Niniwe e, abou ngwak sibui drek dip gi adut mun di pu na ba, anggok puig mem gima angwes ngun leu ade nitok inda nsi. 12Ade tentara nibousi di igya coi nya hagom midem kep biei ara di mpung tut ningat di nggwop nya. Gino ikit biei dima ne ningat llet ei yo di ijoi sut igyem nya insi. 13Tentara ade nya inghuisi jet bidem kep no di sop. Ade minu sindem mem gima hau mem siceu nya bi. Hum miyem bum di abilit ser dimbou pmem nya hagom bingkiong. 14Atau minyei ba, abet ei mem gima adut mem nijam di siceu nya igyon ttai na. Ma aco-co nyen kep igtuyap ba, atin ei mun di ibibon tig ma eisi leu binhyepo abindei sindem ade tentara nibousi di igya coi nya bingkiem! 15Mbro nok gino anggok puig hi gom-hi gom leu binhyepo angwes ngun lo, hum miyem na ningwig ba, amai nimbiam ei pranti. Ajjem hak noyam kin mun di ngun ei miaisi di hai ceng duhwen di jjem hak a.
Ade nidigekti digek bibor bidem hai ceng nya tu! 16Abon nitri-nipek mun cig nya imang bibor dor tunggwei ham mpia-bbed him nimangti! Noro tini bu ne yahagom ipror hak bidem kep hai ceng di ikieng inyehei bimba bipror hak. 17Ade nibou di inyeng jei nya idem kep nimpung hai ceng di imahan bigyo di igwam nding nungug tig nggreti nya mpe di hou cut. Noro tirigi mpia pri bicom nimig tu ne idimba biyuug sar mpia hak. Hi di kan tut yuug sar mpiati bi.
18Na di nibou ndig Asyur e! Ade nibou di inyeng jei nya imai su ba, ade yo di inyeng jei nya ibong mai ningga rima ug. Limwa ade nya intek gimahap ug ei nungug him. Hi di mittei yok bingwes ngun hanyen kwei bi sren. 19Bit bon hi yok obat kep abokti nya leu api abokti mijut hanyen kan bi sren. Yo di imiap tut atimekti yahagom mittem inda bingon kei kep na drek dip tungwatu nya di igyai ninghuisi wei tug hon ade nimbukti di ug hon nohonti bi dima tu.
Currently Selected:
NAHUM 3: HAD
Highlight
Copy
Compare
Share
Want to have your highlights saved across all your devices? Sign up or sign in
