MATIUS 24
24
Yesus pui sut Tuhan De Ig nitimekti
(Mrk. 13:1-2; Luk. 21:5-6)
1Tirigi Yesus hei leu Tuhan De Ig bimbut lene yo di igya kui Noni ikwei nggap leu tut Tuhan De Ig. 2Noni buhup “Jicap ser mun dima yok hagom bou jiyai him mem nijam dini. Ma jiyok ngon kep bipia ei nidipti bu lene tungwatu nya minggek hagom ba, tig di jo-jo yam dip mijo nijoti bu bi.”
Mun di buhun kin nihwen bit yokti micut igkep yo di ibit Yesus
(Mrk. 13:3-13; Luk. 21:7-19)
3Tirigi Yesus gwam biNongkom ei Nungug Zaitun lene yo di igya kui Noni ikwei hig ser Noni nyahan “Apai igbit binye tut nituti mem mun dima yok hagom tirigi micut igkep nyeti i. Mindei rimibindo tut akwei hanyenti kin njap ningwig honti i?”
4Yesus buhup “Ma jitindei ser tungwatu nya leu binhyepo hi ris bije bibindei ba, jisrawir au. 5Lewo tungwatu nya imang bibor miba dinyeng bipai sut yonti bipia yoni ne Nibou Ndig di teu tungwatu nya biyai niyaijo nijep biyok ri! Yo di ipai nok gima miris tungwatu nya imang bibor. 6Tirigi jimiap tut yo di ikon pran dideu je nya kin gi minu ting nya lene ma jittin tut au. Lewo mun dini yok hagom midem igbit nipou ug e noro tto bou mem njap ningwig honti dem bigyo. 7Timiei minu hi mikon mbrap bit timiei minu hiter ba, nibou di isindem bibor nya miyeheu imbuk mem yam cem. Ninggum mihwen tungwatu nya lene mun brim cem. 8Mun dini yok hagom micut igkep yok bibie ba, dem kep sop di sindi ninghim dut tut nimunggwom.
9 #
Mat. 10:22
Lene nibou di isindem nya mikat je ba, ihwen bit je bikimukep je. Tungwatu nya yahagom mingon mpo tut je drek dip gi jibit Da. 10Mpe dima ne yo di ingon jo kep nya imang bibor mingkwei hanyen leu ba, ibakilak yam ba, ingon mpo tut yam cem. 11Nabi nitrowai nya imang bibor mikiju biris bak tungwatu nya imang bibor. 12Sisar kin mun di mbuk mikieng kep tungwatu nya apino bit bon imang bibor ingon ngakei yam bu kan bi. 13#Mat. 10:22 Noro Allah miteu no di ya ngkiem kikau ug bipek ningwig honti. 14Lene tungwatu nya mitri tut Nihyet Di Kei tut Allah Ninyeng Tak Kepti bidem dihyei nisurti-nipekti leu binhyepo tungwatu nya yahagom imiap tut nihyet nipou ug e leu api ningwig honti mitau kep je.”
Nisibutti Di Bindei Di Map Kui Tuhan De Igti
(Mrk. 13:14-23; Luk. 21:20-24)
15 #
Dan. 9:27, 11:31, 12:11 “Mijingat lo, ‘Nisibutti Di Bindei Di Map Kui Tuhan De Igti’ tirigi ya ei ninsi di kwes-kwau dem igbit srat di nabi Daniel pas kep tut. (Ma no di kwop srat bokti dini yok ngon kep ningginausi!) 16Mpe dima ne suar yo di ibong ei hanjop Yudea yahagom inang ug ei cet him. 17#Luk. 17:31 Ma no di kui bigwam ei ig bou njek cem juk hanyen kwei noro coi ug ei ig bei biyai nide ndigban au. 18Ma no di yai miai cem ngkwei hanyen ug ei ig bei biyai nide sinsun au. 19Aye! Mpe dima ne notou mem sop di itta buhun nya kin sop di igyai ido bak munggwom ngwoi nya i? 20Ma jingat nadi tindei nijam di jinangti leu binhyepo cut igkep je mem bed di biang hou kin Njap Nigwam Kep Ninghuisi bi! 21#Dan. 12:1; Why. 7:14 Lewo tungwatu nya ei nijam dima migyai ninghuisi wei nindig bibor dor njiriek ninghuisi wei di hwen tungwatu habiei leu nimbie him kikau kwei bipek ammani kep lene kikau ug bipek njap ningwig honti cem. 22Gino Allah mikos nijam dima nijeisi leu bi lene bit bon tungwatu nya bihi ingwes ngun kan bi. Noro Noni mikos nijam dima nijeisi leu mem Nide limwa nya.
23Mpe dima ne gino hi pai bije ‘Jingat i! Nibou Ndig di teu tungwatu nya biyai niyaijo nijep biyok No rini’ e, ‘No rima’ e, lene ma jingon bit ighyet au. 24Lewo nibou ndig di teu tungwatu nya biyai niyaijo nijep biyok nitrowai nya kin nabi nitrowai nya mitau kwei leu api indo bindo bibon mindur cem ba, ipi biris Allah de limwa nya noro limwa dima yok ingon bit ighyet bi. 25Ma jiyok ngon kep! Dimbot kep tut gini hagom brei bije nipou tirigi nidemti dem bigyo.
26 #
Luk. 17:23-24
Gino hi pai bije ‘Jingat i! No rima ei iggum ndigsi’ lene ma juug ei mpia dima au. Gino hi pai bije ‘Jingat i! Noni ku No ei nghim nsi dini’ lene ma jingon bit ighyet au. 27Lewo Munggwom Tungwatu Nipmot nitau hanyenti midem kep nok mpia di kieng leu bei mpia nitausi ba, ninjeng piga kikau ug ei bei mpia nicutti.
28 #
Luk. 17:37
Lewo ha di nindig krop di yem kep mun di mpiei nya ingat rin ei nimbiam nijoti.”
Munggwom Tungwatu Nipmot nikwei hanyenti
(Mrk. 13:24-27; Luk. 21:25-28)
29 #
Yes. 13:10, 34:4; Yeh. 32:7; Yl. 2:10, 31, 3:15; Why. 6:12-13 “Tirigi mun di buhun cut igkep yok ei nijam dima ningwigsi rino mpia njap dindi ba, bed mmun com bi. Ham mpia bbed-him micut ba, nisindemti nya ei mpia-bbed him ugwa-kwei. 30#Dan. 7:13; Za. 12:10-14; Why. 1:7 Gima ngwig leu lene Munggwom Tungwatu Nipmot nide bindo piga mpia-bbed him. Mpe dima ne tungwatu dihyeisi dini hagom ipim tirigi ingat lo, Munggwom Tungwatu Nipmot tau kwei sut Nide nisindemti kin Nide nikei-kau-keisi ei bumbuhuiti kwei. 31Pun mbrei nindig bibor tibim leu api Noni cuk Nide malaikati nya ug ei nite bei mpia nitausi kin nicutti kin nijjai kin nibiho hagom leu binhyepo imbus Nide limwa nya yahagom kwei leu dihyei nisurti-nipekti.”
Ningginausi tut biei ara ningat
(Mrk. 13:28-31; Luk. 21:29-33)
32“Ma jiyok ngon kep ningginausi tut biei ara. Tirigi dideu gi mitu lene nitom llet leu nimbrinap kikau ug ei ninggrupti ba, nuui hei hanyen bidem ninda-nda hagom apino jikan tut bipia bed di biang mpia ngei dideu kwei su. 33Nok gima cem tirigi jingat mun pima yok hagom pek kep mem je tu lene jikan tut bipia tto bou dideu kwei su.#24:33: Nipas kep tto bou dideu kwei su cem kei lene nipas kep Noni dideu kwei su ba, mbigom tau kwei ri cem kei. 34Ma jiyok ngon kep bipia tungwatu nya ei nijam dini mimai bi bibou mun dini yok hagom dem igbit ug e. 35Mpia-bbed him kin dihyeisi dini misar noro Da dihyet misar bi sren.”
Hi kan tut tto bou dima nipek kepti bi
(Mrk. 13:32-37; Luk. 17:26-30, 34-36)
36“Hi kan tut njap ningwig honti nipek kepti bi. Malaikati gwamti nya kin Da di Allah Nipmot nahagom nikan tut nipek kepti bi noro Dicig Nongkom kan tut. 37#Kej. 6:5-8 Lewo Munggwom Tungwatu Nipmot nittau hanyenti midem kep nok nijam di Nuh gwam ei dihyeisi dini. 38Nipou pima tirigi minyei ut kep yok bigyo lene tungwatu nya igyem njita ba, idut ndia ngei lene iwak yam cem kikau ug bipek njap dino Nuh coi ug ei kibar nsi kep. 39#Kej. 7:6-24 Noro ikan tut mun di micut igkep yok bi. Apino minyei ut kep yok ba, yahagom isar bingwig. Nok gima cem tut njap dino Munggwom Tungwatu Nipmot nikwei hanyenti. 40Mpe dima ne ibou can igyai kep miai leu api malaikati teu gom leu lene kes tut gom. 41Sop ibou can yoho gandum ngat ei hukti leu api malaikat teu gom lene kes tut gom. 42Gima rino ma jiyai ngkiem lewo jikan tut njap dino jide Tuhan nitau hanyen kweisi bi. 43#Luk. 12:39-40 Ma jiyok ngon kep bipia gino ig ceu kan tut ninggimang kep mun cig nikweisi lene niyai ngkiem ba, tindei ser no dima leu binhyepo nggimang ndigban bi. 44Gima rino jeni cem ma jiyai ngkiem bikwop mmun-njap lewo Munggwom Tungwatu Nipmot mikwei hanyen mem jam dino jiyok jingon mem Noni bi.”
Nihyet nibiti nindati tut awak nya ibou can
(Luk. 12:41-48)
45“Tou rinok awak di ningon gom ba, ningon ki cem i? Gi hi dima ne no di niceu ndo nok nibou mem awak nindigsi nya leu binhyepo kwas njita tut yok dem igbit jam di noni preu ei su. 46Gino awak dima pwoi niceu ningon kikau ug bipek njap di niceu nikwei hanyenti lene ningon nggei-hi-nggei. 47Ma jiyok ngon kep bipia niceu mikon awak dima ninyeng bindo noni nok mindor mem nide ndigban hagom. 48Noro gino awak dima ningon dindi bikan ‘Siceu ug bong ninno ba, mikwei hanyen bigyo,’ 49ba, sindi hwen bit awak nindigsi nya leu api yem njita bidut ba anggur ngei bit yo di pes pu yok nya. 50Jei bi ne niceu mitau hanyen hak kep noni mem nijam di noni yok ningon mem bi kin njap dino noni kan tut bi. 51Leu api niceu mikos noni kukiau#24:51: Nipas kep mikos noni kukiau cem kei lene nipas kep mijji noni ug ei nisai cem kei. leu api micom noni ug ei mpia di yo di ingon can ingat rin eisi. Apino noni mipim bitug ndei ninghuisi wei ei mpia dima.”
Currently Selected:
MATIUS 24: HAD
Highlight
Copy
Compare
Share
Want to have your highlights saved across all your devices? Sign up or sign in
