MATIUS 2
2
Andigpoi di ingon ki nya di ikwei leu mpia nipriti
1Maria srek tut Yesus ei minu mien Betlehem ei hanjop Yudea mem nijam di Herodes ninyeng tak kep mben Yahudi. Mpe dima cem andigpoi di ingon ki tut ham mpia-bbed him nya ibou poi ijo leu mpia nipriti bikwei krau minu ndig Yerusalem. 2Ba, ikwei hig-hig nyen ser bipai “Mben Yahudi ide nibou ndig di nipmem srek tut bong tirigitou i? Ningat Nide ham di pri ei bei mpia nipriti. Gima rino nikwei mem nikuk nye bak.”
3Tirigi inghapti tibim ug ei nibou ndig Herodes nitingou nsi lene noni digit tut ba, timiei minu ndig Yerusalem nya cem yahagom idigit tut. 4Lene Herodes sok nihyet mem imam nindig nya kin guru Puig Yahudi nicukti nya kwei bihig ser yok “Apo jikan tut Nibou Ndig di teu tungwatu nya biyai niyaijo nijep biyok tirigi nipmem nisrek tut eisi e?”
5Lene ice bipai “I, nipmem misrek tut Noni ei minu mien Betlehem ei hanjop Yudea bit leu nok nabi gom nipas kepti nok gini,
6 #
Mi. 5:1
‘He minu mien Betlehem ei hanjop Yudea e, anyeng mitibim nok minu mien he ei minu Yehuda bu bi. Lewo nibou di ninyeng jei mijem nitimieisi leu ade minu mien leu api Noni mibie tut Ditde mben Israel.’ ”
7Herodes miap tut gima tu lene sok nihyet mem andigpoi di ingon ki nya bikwei ngat noni ba, nyohou hig ser yok “Apig rino jingat ham pima i?” 8Leu api noni cuk yok biyuug ei minu mien Betlehem bisok kep yok “Jug nyohou nggok ser ba, tirigi jingat munggwom dima igbit leu su lene ma jikwei pai sut bidani cem sindam ug e leu binhyepo dani cem duug kuk da bak.”
9Tirigi imiap Herodes nisok kep yokti dima leu lene imbut ba, ingat ham di ingat ei bei mpia nipriti pima hanyen bibie tut yok ug bipek hammi tirigi munggwom pima nibongti kep. 10Tirigi ingat ham ninjeng hanyen lene ingon llei nindig bibor. 11Leu api icoi ug ei ig bei bingat munggwom dima kin nipmem Maria lene ikuk yok bak binggei sut Yesus. Leu api ikwek migbuwang leu mas kin biei nggrai di ui-gwang kei kin mur#2:11: Nipas kep mur: Angig ayai kep Kamus. ba, yihit binjei bak. 12Leu api Allah sok kep yok tug hon mumpriem gom ser nhyema ingkwei hanyen bingat Herodes bu au noro ma imbut kak puig hiter di bie ug ei itimieisi hanyen leu.
Yesus ningwes ngun ug ei minu Mesir
13Tirigi yo di ingon ki nya imbut leu lene Allah de malaikati tau kep Yusuf tirigi bong bimumpriem bisok kep noni “Akiju ba, anang tut munggwom dima pip nipmem ug ei minu Mesir leu lene jibong kikau ei minu dima bibou dihig je hanyen kwei ug e. Lewo Herodes nggok ser munggwom dima mem gima kos Noni.”
14Lene Yusuf kiju mem mmun mau binang tut munggwom dima pip nipmem biyuug ei minu Mesir. 15#Hos. 11:1 Ibong ei minu dima kikau bibou Herodes mai leu ug e. Mun dini pek kep mem yok leu binhyepo Allah nipaisi tug hon nabi midem ug e. Noni pai “Dihig Dipmot kwei leu minu Mesir.”
Tentara nya ikos munggwom pinai nya
16Tirigi Herodes kan tut bipia yo di ingon ki pima yok iris binoni lene ningon sibui sut yok nindig bibor. Gima rino noni cuk nide tentara nya bipai biyok “Jug kos munggwom pinai nya ei Betlehem kin minu mien di gahai nya di ide njap ug ei ari bingwam can nimo jug yahagom.” Nicuk yokti dini bit leu nok mun di yo di ingon ki nya ipui sut binoni tut ham nitausi pima ri.
17Tug hon nisinati di nok gima lene mun di nabi Yeremia pas kep tut cut igkep yok. Nipas kepti dima pai,
18 #
Yer. 31:15
“Ighyet tibim kwei leu minu ndig Rama. Ipim bibwos bipim nggruet cem lewo Rahel ningon ngguk tut nimunggwom bat nya nindig bibor ba, kou sut gima tungwa hi gwam ser ningon a. Lewo nimunggwom bat nya yahagom imai leu su.”
Yusuf nya ingkwei hanyen leu Mesir
19Niabiati Herodes mai leu su lene Allah de malaikati gom tau kep Yusuf ei minu Mesir tug hon ningat-hi-ngat tirigi Yusuf bong bimumpriem, 20bicuk noni “Akiju ba, ausap munggwom dima pip nipmem ba, jingkwei hanyen ug ei minu Israel lewo yo di ikos tut bipia igyai nimai bak munggwom dima imai leu su.” 21Gima rino Yusuf kiju ba, usap munggwom dima pip nipmem bingkwei hanyen ug ei minu Israel.
22Noro tirigi noni miap tut bipia Arkelaus ya luei nicig Herodes nohoti binok nibou ndig ei hanjop Yudea lene noni ttin tut gima ngkwei hanyen ug ei hanjop nsi dima. Tirigi noni bong bimumpriem mbigom kin bu lene Allah tin puig di kei mem noni. Leu api noni kriau kikau ug ei hanjop Galilea, 23#Mrk. 1:24; Luk. 2:39; Yoh. 1:45 bibong ei minu ndig Nazaret. Nok gima lene srat di nabi nya ipas kep tut munggwom dima pek kep tu lewo ipas “Yoni mijem Yesus ninyeng Munggwom Timiei minu ndig Nazaret.”
Currently Selected:
MATIUS 2: HAD
Highlight
Copy
Compare
Share
Want to have your highlights saved across all your devices? Sign up or sign in
