LUKAS 8
8
Sop nya di yahati tut Yesus nya
1Njap poi kin bu lene Yesus mbut nimig bidem minu ndig nya kin minu mien nya hagom bitri tut Nihyet Di Kei tut Allah ninyeng tak kepti. Ibou simnaibrimigcan di igya kui Noni ibit-bit nyen. 2#Mat. 27:55-56; Mrk. 15:40-41; Luk. 23:49 Sop nya ibou poi di Yesus jji ninnei rom nya leu yok kin sop nya di Noni bindei ba, ikei hanyen iba yok bikum yok. Sop dini yok inyeng Maria di ijem Magdalena (di Yesus jji ninnei rom ningat muhwindacan leu ningonti pima), 3kin Yohana di Khuza di ya kui Herodes nitnem kin Susana kin sop nindigsi imang bibor cem. Sop dini yok iba mitiei di inyeng tut nya binyohou Yesus kin yo di igya kui Noni.
Nihyet nibiti nindati tut no di hap njita ngan
(Mat. 13:1-9; Mrk. 4:1-9)
4Tungwatu ningot ndig induk yam kwei leu bikwop minu ndig kin minu mien nya bingwig ttai Yesus leu api Noni ba nihyet nibiti nindati bingginau yok bipai,
5“Mpe di gom lene tungwagom ug ei nide miai ngwoisi bahap njita ngan. Ninda jo kep bahap leu api njita ngan gom-gom cut ariwace ug ei puigsi apino tungwatu nya ico kep leu api ha nya ikwei puk bingwig. 6Lene njita ngan gom-gom cut ariwace ug ei tigsi. Jei bi ne nikioi hei noro mbris bimui lewo hei ei dihyei ninggati. 7Lene njita ngan gom-gom cut ariwace ug ei bohousi leu api bohou ceu nikioi ba, mui bingwig. 8Noro njita ngan nindigsi cut ug ei dihyei suti apino nikioi hei ba, ningat sratus gom ntun ninjem him.”
Niabiati Yesus ba nihyet nibiti nindati bingginau yok lene pai biyok “Gino jitingou dile lene ma jiyok ngon kep dihyet!”
Yesus ba nihyet nibiti nindati bingginau yok leu binggon i?
(Mat. 13:10-17; Mrk. 4:10-12)
9Yo di igya kui Noni ikwei hig ser Noni tut nihyet nibiti nindati dima. 10#Yes. 6:9-10 Noni buhup “Allah mbot kep mimun tut ninyeng tak kepti bije noro mbot kep mimun dima bak nindigsi tug hon nihyet nibiti nindati he. Leu binhyepo mbro nok gino imian ser lo, ingat bi ba, mbro nok gino ingig itingou mem nihyet lo, imiap bi.”
Yesus mbot kep nihyet nibiti nindati tut no di hap njita ngan
(Mat. 13:18-23; Mrk. 4:13-20)
11“Nihyet nibiti nindati pima ningginausi pai binye bipia njita ngan dima ne Allah Nihyet ri. 12Njita ngan di cut ug ei puigsi bindo tut yo di intu kep nihyet. Noro tirigi intu kep nihyet lene Bilis kwei pos nihyet di cut ei ingonti leu binhyepo ingon jo kep ba, igyai gi teu leu ide sisar kin niyaijo nijep bi. 13Njita ngan di cut ug ei tigsi bindo tut yo di intu kep nihyet lene iba ingon di kei bingon jo kep. Noro nihyet com nigau ei ingonti kan bi. Mbro nok gino ingon jo kep nihyet lo, Bilis kwei bingon yok lene yoni ingkwei hanyen hak ug. 14Njita ngan di cut ug ei bohousi bindo tut yo di imiap nihyet noro ingon ku yonti tut mun di pror yon lene iba yoho rok mitiei nindig bibor kin ndigban di ingat ingwes eisi cem apino gima yok hagom ceu nihyet leu api ningat ntun him bi. 15Njita ngan di cut ug ei dihyei suti bindo tut yo di imiap nihyet leu api ipwoi ei ingon di gomti kin ingon di kwes keiti. Yo dini ita ibou eisi bikui dip ningat di kei ntun him.”
Mini njeng di jo bokor nibehei
(Mrk. 4:21-25)
16 #
Mat. 5:15; Luk. 11:33 “Tou ritin mini binjeng lene ba bokor bikibou kep ninjeng hanyen bikes bijo ei bilen nibehei i? Hi bi! Noro ikon bikes ei nidihimti leu binhyepo yo di icoi kwei ei ig bei ingat ninjeng di piga. 17#Mat. 10:26; Luk. 12:2 Ninjeng gom mipiga digai mun di jo nding hagom hanyen. Nihyet gom mitibim tut mimun hagom hanyen.
18 #
Mat. 25:29; Luk. 19:26 Gima rino ma jiyok ngon kep mun di tibim ei jitingou nsi. Lewo Allah mikum eisi bak no di nyohou mun di jo binoni noro Noni mitug niken hanyen leu no di nyeng tut mun nyeng hi bi.”
Yesus nipmem kin nikinjoi bat nya
(Mat. 12:46-50; Mrk. 3:31-35)
19Mpe dima lene Yesus nipmem kin nikinjoi bat nya ittau kwei bigya biyati noro bit bon yuug kikau ndam Yesus kan bi lewo tungwatu nya inggreu ser Noni. 20Gima rino hi pai biNoni “Andigpoi e, apmem kin akinjoi bat nya ikwei ya biyati bihig ser Na.”
21Noro Yesus buhup “Yo di imiap dihyet bigyai igbit Allah ningon kanti ne dipmem kin dikinjoi bat nya ri.”
Yesus bindei ba, hou ntus hanyen
(Mat. 8:23-27; Mrk. 4:35-41)
22Mpe di gom bu lene Yesus bri ut bit yo di igya kui Noni bipai biyok “Jikwei ba, yuug ei igpong nite dinyo ri.” Gima rino itig minyei bimbut. 23Tirigi yuug ei minyei ngwa dip lene Yesus bong mai. Mpe dima lene hou di nimig ten bibor cut kros ba, igpong roi nindig bibor bikibor ei ut nsi apino mbigom isar minyei. 24Yo igya kui Yesus iwin Noni ba, yahara “Andigpoi e, isar minyei ug ri!”
Noni kiju biya ba, ggai ser hou di nimig ten bibor kin igpong di roi bibor leu api hou ntus hak ba, mpia mbum-bra. 25Lene Noni hig ser yok “Nggon rino jiba jingon com Da haigtu bi i?”
Leu api yoni inghuisi mpig sut binggap leu tut lene ihig yam “Tou rin i? Lewo Noni bindei ba, hou kin minyei ntus bit nihyet.”
Yesus jji ninnei rom leu tungwagom ningonti
(Mat. 8:28-34; Mrk. 5:1-20)
26Lene Yesus nya yuug ttau ei hanjop Gerasa di birok kik hanjop Galilea ei igpong nite dima ug. 27Tirigi Yesus kinyon leu ut nsi biya mambei lene timiei minu ndig dima gom kwei ya um Noni. Ninnei rom ya ningonti apino bong ig bei bi noro bong-bong nyen ei hak mihyeti di nok jui dip. Ningat ngu lewo juk sinsun ser no bi. 28Tirigi noni ngat Yesus lene cot bikuk no ei nimig him leu api ba nihyet nindig bahara “Nani ne Yesus di Allah Di Ninyeng Jei Nipmot rin e? Akwei nggon ndei da i? Dahara ser Na bipia ahwen bit da au!” 29Hara nok lewo Yesus sindi jji ninnei rom leu ningonti. Ninnei rom dima ya ningonti ba, ngkwei-ngkwei nyen ei noni him. Mbro nok gino tungwatu nya iba lante biteu noni ninyen ba, hi ya ser noni cem lo, noni brim lante bitun leu api ninnei rom kri noni ug ei iggum ndigsi.
30Yesus hig ser noni “Anyeng tou i?” No dima buhup “Dinyeng Nimpung Gom.” Noni buhup nok lewo ninnei rom nya imang bibor igya ningonti. 31Ninnei rom dima yok yahara ser Yesus bipia ma Noni jji yok kikau ug ei Pimbien Nimai Di Jut Bibor#8:31: Nipas kep Pimbien Nimai Di Jut Bibor: mpia di ninnei rom nya isima eisi bitug ndei hukum. au.
32Mpe dima lene na nya ningot ndig item dihyei ei timbukti ei cet him dima. Ninnei rom nya ibidip huk Yesus leu binhyepo sindui sut yok ba, icoi ug ei na nya ingonti. Lene Yesus sindui sut yok ba, 33ikes no dima leu bicoi kikau ug ei na dima yok ingonti. Lene na nya yahagom idor sindem bibor ug ei pimbien bou bikinyon ei igpongti leu api minyei kot yahagom bisar bingwig ug.
34Yo di ihyen kep na nya ingat mun di pek kep dima. Gima rino inang leu mpia ttou nsi dima biyuug tri tut bidem ide minu ndig kin ide minu mien di jo ttai nya. 35Lene timiei minu dima yok induk yam kwei bingig igyai kep mun di pek kep mem no dima. Ikwei ttau kep Yesus bingat no di ninnei rom nya igya ningonti pima lo, gwam ei Yesus Noho bei. Noni juk sinsun ba, ningon tungwatu hanyen tu. Apino yoni inghuisi mpig sut nindig bibor. 36Yo di ingat mindur dima bou igyai him ipui sut bak nindigsi nya tut notou no dima yai ningon tungwatu hanyen. 37Lene yo di ibong bidem Gerasa kin minu mien di gahai nya cem irok Yesus ba, icuk ngkiemti leu binhyepo kes yok bingkwei hanyen leu yok hak ug, Lewo inghuisi mpig sut nindig bibor. Gima rino Yesus bri ut ba, joi sut ngkwei hanyen leu yok. 38No di ninnei rom nya inang leu ningonti tu hara Noni “Asindui sut bidibit Na.”
Noro Yesus cuk bipai bak, 39“Ma angkwei hanyen ba, atri tut mindur di Allah bibon mem nani tu!”
Gima rino noni ngkwei hanyen bitri tut mindur di Yesus bibon mem noni bak tungwatu nya yahagom bidem minu ndig dima.
Misop di ninnei kimbas kin sop di ngget Yesus de sinsun
(Mat. 9:18-26; Mrk. 5:21-43)
40Tirigi Yesus ngkwei hanyen ug ei igpong nite dinyo lene tungwatu ningot ndig ikwei ya um Noni lewo imem kep ser nikweisi njehep tu. 41Lene nibou mbusyamei mben Yahudi gom di ninyeng Yairus kwei ba nibiau bicom mpia ei Yesus Noho bei bahara Noni leu binhyepo bit noni ug ei nide ig, 42lewo nipmisop di nimig gom ngat di nide njap ug ei ari bingwam simnaibrimigcan nggwen nindig bibor ba, duhug-duhug nyen.
Tirigi Yesus ningat rin ndam ig di Yairus de lene tungwatu ningot ndig inggreu ser nimbutti. 43Sop gom di ningkek kan mun bikwop mmun-njap kikau mem ari bingwam simnaibrimigcan tu cem srig yoti. Mbro nok gino noni bindei ngwig nide mitiei hagom bak yo di inda kan nya lo, bit bon hi mpu noni bikei hanyen kan bi. 44Sop dini bram Yesus biya kui ninghim leu api ngget Nide sinsun nggrun. Hammi tirigi ngget Noni nok rino mun di ningkek kan dima kes leu noni. 45Yesus hig ser yo dima “Tou ringget Ditde sinsun i?”
Noro yahagom ibikep ser. Lene Petrus pai biNoni “Andigpoi e, tungwatu ningot ndig di iba yok dek yam nyen di inggreu ttai Na dini!”
46Yesus pai “Tungwagom ngget Da tu lewo dikan tut lo, nisindemti ndrim hi hei leu Da tu.” 47Sop dima kan tut lo, mun di bon dima jo nibreisi tu. Gima rino ba ningon di digit bikwei kuk no ei Yesus Noho bei bipai brei bou tungwatu nya yahagom igyai him tut nggon rino noni ngget Yesus kin gi noni yai gi kei hanyen tu. 48Yesus pai binoni “He dikwohop ndia ug o, akei hanyen tug hon ade niba ningon com Dati. Dikes na ba, aba angon di nggan-triot bingkwei hanyen hak ug.”
49Tirigi Yesus mbrap bit noni lene awak hi kwei leu Yairus de ig bipai binoni “Apmisop ninnei pas tu. Gima rino abindin Guru bu au.”
50Tirigi Yesus miap nipaisi lene pai bak Yairus “Dwai! Ma angon digit tut au. Angon jo kep Da lewo apmisop mikei hanyen bu ug ri.”
51Tirigi Yesus kwei krau ig dima lene kuk nindigsi yahagom bigwam ei biyati. Lene buwak Petrus kin Yohanes kin Yakobus kin Yairus nitnem nya bicoi bit Noni ei ig bei. 52Tungwatu nya di idem yam tu yahagom ipim kep nimai ba, ighyet ter kep. Noro Yesus pai ser yok “Ma jipim kep nimai au lewo misop dini mai jit bi noro bong mai he yo!”
53Lene yo dima insrik ser nihyet lewo ikan tut bipia misop dima mai nijit tu. 54Noro Yesus krau misop ninda bihig noni “He dipmisop ndia ug o, ma akiju kui.” 55Hammi tirigi Noni pai bak nok rino ninnei joti hanyen leu api noni kiju kui. Leu api Yesus cuk yoni bipai “Jiyai njita hi binoni biyem.” 56Nicig nipmem nya inga leu tut nindig bibor. Noro Yesus pai ser yok leu binhyepo imbot kep tut mindur dima bak nindigsi nya au.
Currently Selected:
LUKAS 8: HAD
Highlight
Share
Copy
Want to have your highlights saved across all your devices? Sign up or sign in