LUKAS 5
5
Yesus dimig nipos kep wau cig nya ibou bitai
(Mat. 4:18-22; Mrk. 1:16-20)
1 #
Mat. 13:1-2; Mrk. 3:9-10, 4:1 Mpe di gom bu lene Yesus ya-ya nyen ei igpong Genesaret nintig dip lo, tungwatu nya iba yo dek yam bingwig ttai Noni leu binhyepo intu kep Allah nihyet. 2Yesus ngat ut ningwak can di niceu bat nya ikes bijo ei igpong nintig dip leu lene yuug piap ide jala leu su. 3Yesus bri ut di Simon de bipai bak “Arok ut bison tut Da ug ei minyei ngwa dip mbigom ug e.” Yesus gwam jug ei ut nsi bingginau tungwatu nya.
4Tirigi Noni ngginau yok bingwig leu lene pai bak Simon bipai “Ma jitig ut ug ei minyei nijutti. Lene jicom jide jala kep wau.”
5 #
Yoh. 21:3
Lene Simon buhup “Guru e, nicom nahanggwap mikuisi himmun jei di aponi noro nipos wau hi bi. Nnaba midicom jala kep wau mbigom kin bu bit leu nok acuk dati.” 6#Yoh. 21:6 Tirigi igyai igbit nicuk yokti dima lene ibrim ide jala tut wau ningot ndig ba, nahanok ma jala rik bikinei ug. 7Gima rino yahara isut bat di ibri ut hiter pima bikwei mpu yok. Tirigi ikwei su lene yahagom ibrim jala tut wau ningot ndig dima kwei ei ut cin dima ninsi bimpung apino nahanok ma ut nya hacem sar minyei ug. 8Tirigi Simon ngat mindur dini bou niyai him rino kuk no ei Yesus nimig him bipai biNoni “Andigpoi e, ma akes da hak ei lewo dani ne no di bon sisar ri!”
9Noni kin nisut bat nya yahagom inga leu tut wau ningot ndig di ibrim jala tut dima. 10Nok gima cem tut Simon nisut bat cin di Yakobus kin Yohanes di icig ninyeng Zebedeus. Yesus pai bak Simon “Ma anghuisi mpig sut au lewo hon kep ammani kui ne mporo acom jala kep tungwatu nya.”
11Simon kin nisut bat nya ikri ide ut hanyen kwei ei igpong nintig dip leu api ikes ide mun di inyeng tut nya hagom leu bibit Yesus hak.
Yesus bindei ba, no di bras yem kei hanyen
(Mat. 8:1-4; Mrk. 1:40-45)
12Mpe di gom Yesus coi ug ei minu ndig gom di no di bras yem nindig bibor ningat rima eisi. Tirigi noni ngat Yesus rino ba nibiau bicom mpia ei Yesus nimig him bahara Noni “Andigpoi e, gino ajoi sut ne dikan tut bipia akrau nisindemti mem gima abindei ba, dikei hanyen!”
13Yesus su ninda bingget noni bipai “Dijoi sut. Ma akei hanyen hak ug!” Hammi tirigi pai bak nok rino bras dima llet hak leu noni. 14#Im. 14:1-32 Lene Yesus cuon ser noni “Amiap e, ma aug mbot kep tut bras dima bak nindigsi nya au. Noro aug ndo nanti bak imam leu binhyepo noni bimian ser angkek dip. Leu api abon midut bit leu nok Musa nicuk nyeti nok bindo bak tungwatu yahagom bipia akei hanyen tu.”
15Noro Yesus ninghapti tibim kikau bidem minu dima hagom leu api tungwatu nya ningot ndig induk yam bingwig ttai Noni leu binhyepo intu kep nihyet. Noni bindei ba, yo di inggwen ikei hanyen cem. 16Gima leu lene Yesus om No nyahan buug ei ha ngunti leu binhyepo ngat nadi.
Yesus bindei ba, no di las hwen kei hanyen
(Mat. 9:1-8; Mrk. 2:1-12)
17Njap poi bu tirigi Noni ngginau tungwatu nya lene Farisi nya kin guru Puig Yahudi nicukti nya di ikwei leu bikwop minu mien hagom ei Galilea kin hanjop Yudea kin minu ndig Yerusalem cem igwam bit Noni. Allah de nisindemti mem gima bindei ba, yo di inggwen ikei hanyen jo ei Noni dip. 18Mpe dima lene ibou poi ittei lat tut no di las hwen kwei ndam Yesus ba, igruap mem gima ittei no dima bikes ei Yesus Noho bei. 19Noro tungwatu ningot ndig inggreu ser dimbou hui. Gima rino ikui sut ug ei ig bou ninjek ba, ilet bigyem sra bitot bot nya leu leu binhyepo ibon nimihyeti mem gima itu kuk tut lat di no di las hwen dima bongti tut ug ei Yesus Noho bei. 20Tirigi Yesus ngat lo, iba ingon com Noni nindig bibor nok rino pai bak no di las hwen “He mot de ug o, dikos ser ade sisar.”
21Guru puig timiei kin Farisi nya sindi isimbot kep biyam bipai “No di nihyet wer mpiahi tut Allah dini tou rin i? Lewo Allah Nongkom sindem mem gima kos ser sisar a.”
22Yesus kan tut ingon kanti leu api hig singgre yok “Jikan-kan nyen ei jingonti leu binggon i? 23Leu gi tou rikrop i? Dipai ‘Dikos ser ade sisar’ e, he ma dipai ‘Akiju ba, ambut hak ug’ e? 24Noro nogindini dindo bindo brei bije leu binhyepo jikan tut bipia Munggwom Tungwatu Nipmot yai nisindemti mem gima kos ser sisar ei dihyeisi dini.” Leu api Noni cuk no di las hwen “Akiju ba, aya pijum lene ma akon ade lat ba, aug sut ei ade ig hak ug!”
25No dima kiju kros biya bou yahagom igyai him lene kon nide lat buug sut ug ei nide ig binggei sut Allah.
26Yo dima yahagom inggap leu tut bijo ninno leu api inggei sut Allah. Iba inghuisi di mpig sut bipai biyam “Mbenjen! Njap di ammani ingat mindur nindig bibor bou igyai him!”
Yesus hig Lewi bidimig noni
(Mat. 9:9-13; Mrk. 2:13-17)
27Gima ngwig leu lene Yesus mbut nimig bittau kep Lewi di gwam ei nide kintrorti. No dima ya tindei belasten biyem tungwatu nya imuhup. Leu api Yesus hig noni “Akwei bit Da.” 28Lewi kes nide mun nyeng hagom leu ba, bit Yesus hak.
29Mpe dima lene noni bon pesta nindig bibor ei nide ig mem Yesus ba, yo di igya tindei belasten bigyem tungwatu nya imuhup nindigsi nya kin yo di hiter imang bibor induk yam kwei ba, igwam bit Yesus bigyem njita. 30#Luk. 15:1-2 Lene Farisi nya kin guru Puig Yahudi nicukti nya ibou poi inso tut yo di igya kui Yesus bihig ser yok “Nggon rino jiyem njita bit yo di igya tindei belasten di igyem tungwatu nya imuhup kin nikinei-kinau nindigsi nya i?”
31Lene Yesus buhup “Yo di ikei nya yuug ngat yo di inda kan nya bi noro yo di inggwen yuug ngat yok. 32Dikwei ei dihyeisi dini mem dinduk yo di ikan bipia ikei-kau nya bi noro mem gima dinduk nikinei-kinau nya leu binhyepo ittin ser ide sisar bikiek ndam Allah.”
Ningginausi tut niyem njita bi mem nituti poi
(Mat. 9:14-17; Mrk. 2:18-22)
33Tungwatu nya ibou poi ihig ser Yesus “Nggon rino yo di igya kui Yohanes kin yo di igya kui Farisi nya igyem njita bi mem nituti poi leu binhyepo yuhuk nadi noro yo di igya kui Na igyem njita bikwop njap i?”
34Yesus buhup “Apo dem mem gima jicuk yo di idem yam ei pesta niwak yamti dini bigyem njita bi mem nituti poi tirigi no di wak nitnem ningat rin bit yok e? 35Noro ei nidipti bu tirigi yo di hiter ikwei kat no di pinai dima bimbut tut leu yok leu api igyem njita bi mem nituti poi.”
36Lene Noni ngginau yok bipai “Tungwatu nya irik sinsun di nijep-jau lene iba ninghas di nijep binap kep ser sinsun timiei nirikti e? Leu gi nok ne ibimangkrei sinsun di nijep. Gima cem sinsun nghas di nijep kin sinsun nitimiei ngakei bi. 37Nok gima cem tungwatu nya yuhug ba anggur ngei di nijep ei aigmui mindhe ngkek timieiti bi. Leu gi nok ne mbigom ba anggur ngei kiak lene aigmui mindhe ngkek mikimbo bikinei sut ba anggur ngei bikiber bingwig hak ri. Aigmui mindhe ngkek cem kinei. 38Noro ma yuhug ba anggur ngei nijep ei aigmui mindhe ngkek nijepti. 39Tirigi hi dut ba anggur ngei nitimiei lene noni joi sut gidut ba anggur ngei nijep bi. Noni pai hak ‘Ba anggur ngei nitimiei dima nyop kei.’ ”
Currently Selected:
LUKAS 5: HAD
Highlight
Share
Copy
Want to have your highlights saved across all your devices? Sign up or sign in