IMAM NYA IDE MIDYAI 7
7
Nibon midut nikum Allah de ningwam
1Gini ne Ditde nicukti tut nibon midut nikum Allah de ningwam rin lewo nibon midut dini kwes-kwau bibor. 2Suar imam gom bui mindhe dima ei nimbar hum dok nite bei mpia nijjai ei mpia ttou nsi di ibon midut nindig mindhe titut kep hum eisi. Lene ma noni hek ninggrom bibiprok nimbar hum dok nitta bitaisi. 3Lene ma noni digo nimmau hagom bindig kep hum bitut nipu di nimmau ndok titut kin ninggwo, 4kin nikimbu hacem bitut nimmau di joti nya kin nisingau igdo hi di kei bibor. 5Noni mindig nimmau hagom kep hum ei nimbar hum dokti noyam kin nibon midut njita nibipai sigyo bak Allahti mem tuhan. Gini ne nibon midut nikum Allah de ningwam ri. 6Dice tut gima imam nide bat di pinai nya yahagom igyem kep mikwau di kwes-kwau bibor dini.
7Nicukti tut nibon midut nibiyai nikos ser sisarti kin nicukti tut nibon midut nibikum Allah de ningwam hacem noyam. Ma imam di bon midut dini hacem ma mikwau dima biyem kep. 8Nok gima tut mindhe ningkek cem ba, imam dima ma ningkek mem nonti. 9Ba, nok gima tut roti di tungwatu igyai bak tuhan cem. Nok gi hi di ikang ei komforti kin gi ikang ei komfor ninjek dip kin gi ikang ei bokorti cem ba, hagom mem imam di ndig roti dima ndrim hi kep hum pima. 10Noro tut roti di igyai bak tuhan lo, ikang bigyo nok gi hi di mini zaitun srigsi kin gi hi di nindung he lene ma imam di intun Harun him nya yahagom ikwas tut yam.
Nibon midut nibiyai ningon kwes kin Allahti
11Gini ne nicukti tut nibon midut nibiyai ningon kwes kin Allahti di imam nya igyai bak tuhan. 12Gino tungwagom mipai sigyo hanyen tug hon nibon midut dini lene ma noni jem mindhe ningut gom bitut roti di roti ninjep srigsi bi kwei. Roti dima ne roti nindak di mini zaitun srigsi kin roti di dile di noni ba mini zaitun bibijos nidip kin roti nyop di mini zaitun srigsi cem. 13Lene ma noni kang roti di roti ninjep srigsi cem nindak poi kwei. 14Suar noni kwas roti ninyeng ningai dini ndrim hi tut tuhan. Roti dini mem imam di ba mindhe nggrom biprok nimbar hum dok nitta bitaisi. 15Lene suar no di yai mindhe bak tuhan pima yem mikwau dima bingwig mem njap di imam bui mikwau dima bindig kep hum ei nimbar hum dokti. Ma noni bet mikwau niken hi ei mem njap di hyep au.
16Gino tungwagom jem nide mindhe kwei mem nibon midut nibiyai ningon kwes kin Allahti drek dip mun di noni preu ei tug hon gi heng ba, yai mikuisi cem lo, noni yem kep mikwau dima hagom mem njap di imam bui mikwau dima bindig kep hum bingwig bigyo leu api yem niken mem njap di hyep bu lene dem. 17Ne gino niken jo mem njap gi niningai lene ma noni ndig gima kep hum bingwig ug. 18Gino noni yem mikwau dima mem njap gi niningai lene tuhan mikou sut nide mindhe po noni bui dima lene nibon midut dima mibindei gi kei mem noni bi noro map kuisi. Leu api tungwa tou rino yem kep mikwau dima ningon mui.
19Gino mikwau dima ngget mun di map kuisi lene ma hi yem au noro ma indig hagom kep hum bingwig ug.
Yo di map kui yokti bi nya yongkom migyem kep mikwau dima. 20Gino no di map kuisi yem mikwau dima lene noni minok Allah de limwa bu bi. 21Tungwa tou rino yem mikwau dima niabiati noni ngget mun di map kuisi nok mun di kwei leu tungwatu nya kin mun di kwei leu mindhe cem lene no dima minok Allah de limwa bu bi.
22Lene tuhan sok nihyet dini ei Musa dip, 23bak mben Israel. Harin dima mben Israel igyem sapi kin domba kin kambir nimmau a. 24Nok gima cem harin dima igyem ide mindhe di nonti mai kin gi hi di mindhe di niten-pos ttem bimai cem nimmau a. Noro gino iba nimmau dima biyai mun hiter bu lene dem. 25Tungwa tou rino yem nimmau di idigo leu mindhe di ibui mem nibon midut njita nibipai sigyo bak Allahti lene no dima minok Allah de limwa bu bi. 26#Kej. 9:4; Im. 17:10-14, 19:26; Ul. 12:16, 23, 15:23 Harin dima mben Israel igyem ha nya inggrom kin mindhe nindigsi nya inggrom ei minu di ibongti a. 27Tungwa tou rino pigau hanjop dini minok Allah de limwa bu bi.
28Lene tuhan sok nihyet ei Musa dip, 29bak mben Israel. Gino tungwagom jem nide mindhe kwei mem nibon midut nibiyai ningon kwes kin Allahti lene ma noni digo mikwau igdo hi ei nok mun di bon ninyeng di noni yai bak tuhan. 30Suar no dima nongkom kon igdo hi di noni digo ei kwei nok nibon midut njita nibipai sigyo bak Allahti. Ma noni kon nimmau kin ningget cem kwei nok mun di bon ninyeng di noni yai bak tuhan. 31Lene ma imam gom ndig nimmau kep hum ei nimbar hum dokti noro bet ningget ei nok mikwau mem imam nya yahagom igyem. 32Suar no dima digo mindhe dima nindimuhum ndam nite ninda com ei nok mun di bon ninyeng di noni yai bak, 33imam di hek ninggrom kin ndig nimmau di kwei leu nibon midut nibiyai ningon kwes kin Allahti dima. 34Lewo ningget kin nindimuhum ndam nite ninda com rinok mun di bon ninyeng di tuhan yai leu mben Israel biyai hanyen bak imam nya. Suar mben Israel ikwas ninghui dini hacem tut imam nya bijo ninno bijo kikau. 35Ninghui dini kwei leu mindhe di ibui bindig kep hum mem tuhan ei njap dino ata Harun kin nipmot bat nya nok imam. 36Lene tuhan sok nihyet bak mben Israel mem njap dima leu binhyepo idigo ninghui ninyeng can pima bak imam nya tirigi ijem ide mindhe nya kwei bibikuk yok bak Noni. Lene suar yoni ibit nicukti dini bijo ninno bijo kikau.
37Ayat pini yok ne nicukti mem nibon midut nindig mindhe titut kep hum kin nibon midut njita nibipai sigyo bak Allahti kin nibon midut nibiyai gi kos ser sisarti kin nibon midut nikum Allah de ningwam kin nibon midut nita imam nijep nya kin nibon midut nibiyai ningon kwes kin Allahti ri. 38tuhan yai nicuk yokti dini yok bak Musa ei Nungug Sinai ei njap po noni sok nihyet bak mben Israel tut nibon midut dini yok hagom tirigi po ingat rin ei iggum ndigsi Sinai pima.
Currently Selected:
IMAM NYA IDE MIDYAI 7: HAD
Highlight
Copy
Compare
Share
Want to have your highlights saved across all your devices? Sign up or sign in
