YAKOBUS 2
2
Ningginausi tut nimig mbus tungwatu
1Disut bat je di jingon jo kep Tuhan Yesus Kristus di Tuhan Di Kei-kau e, ma jimig mbus tungwatu nya tereu nok hi kei hi kinei bit leu nok ingat di jingat bou jiyai him au. 2Leu gino no di nyeng di ba mas bijuk ninda ba, juk sinsun di nibok kak kin no di nuhwap mbum di juk sinsun di rik-ta yahacem icoi kwei ei ig mbusyamei ba, 3gino jiya um no di juk sinsun di nibok kak bijicigit noni “Akwei gwam nikeisi dini” lo, jicuk no di nuhwap mbum “Ma aug ei nuhuisi dinu” e, he “Ma agwam juk ei dihyeisi dini hak ug” e. 4Gino jipai bak nok lene jingon mui lewo jiba ningon di can bimig mbus tungwatu nya tereu nok hi kei hi kinei ba, jiba jingon kanti di kinei bidimig yok.
5He disut bat di dingon kieti jen, ma jiyok ngon kep bipia Allah dimig nuhwap mbum nya ei dihyeisi dini bibindei ba, inyeng tut ide niba ningon com Yesus Kristusti. Yo dima micoi bit Allah Ninyeng Tak Kepti di Noni preu ei mem yo di ingon ngakei Noni. 6Noro jeni rino jico kep nuhwap mbum nya lo, yo di inyeng nya ico kep je bikri je ug ei nikei noho bei cem! 7Yo dima ikucang jinyeng Kresten di jiyai tirigi jiba jingon com Kristus.
8 #
Im. 19:18
Gino jiba ningon di gom bibit niggai serti di ntun Allah Ninyeng Tak Kepti him gi ipas ei gi preu nitimieiti “Ma angon ngakei hiter bit leu nok angon ngakei nanti” pima lene gima igbit ri. 9Noro gino jimig mbus tungwatu nye tereu nok hi kei hi kinei bit leu nok ingat di jingat bou jiyai him lene gima bindei bijingon mui su ba, Allah niggai serti pai kep je drek dip. 10Nipigau Allah niggai serti gom ngat he noyam kin nipigau niggai serti hagom titut yam tu. 11#Kel. 20:13-14; Ul. 5:17-18 Lewo no di pai ser nye “Ma jicut tut yam au” pai ser bu “Ma jihwen mun au.” Mbro nok gino jicut tut yam bi lo, jihwen mun ne jipigau Allah niggai serti tu. 12Ma jimbrapti kin jiyai munti nya hagom igbit lewo Allah mimbus jingonti tug hon niggai serti di kwek tungwatu nya bigyati kwes. 13Gino tungwagom ngondut hiter bi ne mpe dino Allah mbus ningonti lene Noni mingondut no dima bi. Noro ningondut yamti sindem dor njiriek hukum!
Ningginausi tut niba ningon comti kin niyai munti
14He disut bat jen, gino hi pai sut nonti bipia ba ningon com Yesus tu lo, niyai munti nya bicim tindei nipaisi dima bi ne notou mem noni i? Nide niba ningon comti miteu noni leu sisar biyai niyaijo nijep binoni e? 15Nok gino jisut bat yo di ingon jo kep nya ibou poi ijuk sinsun bi ba, njita di igyem bikwop njap dem yok bi cem. 16Lene ma jipigo yok he “Jicemo! Allah mimpu je tut sinsun di jijuk kin njita di jiyem o!” Gino jingondut yok tut mun di isuar dima bi lene jide nipigo yokti dima dem bi. 17Nok gima tut niba ningon com Yesus Kristusti cem. Gino igyai munti nya bicim tindei bi ne ide niba ningon comti nongkom he dima bon ninyeng bi.
18Nok gino hi pai “Hi biyai hamem niba ningon comti lene hi biyai hamem niyai munti nya.” Dibuhup no dima nihyet “Ando brei bida tut notou tungwagom biyai hamem niba ningon comti lo, biyai hamem niyai munti nya cem tut bi i? Noro tut dani ne midindo ditde niba ningon comti tug hon diyai munti nya.” 19Angon jo kep bipia Allah Nongkom ngat he e? Kei bibor! Ninnei rom nya cem ingon jo kep nok lo, gima bindei ba, inghuisi mpig sut ba, ittin tut. 20He na di angon mbum e? Ajoi sut gima dindo brei bina bipia gino niyai munti nya bicim tindei niba ningon comti bi lene hagom bon ninyeng bi, bi e? 21#Kej. 22:1-14 Ide pung di intun him di Abraham yai ningon di kwes kin Allah tug hon mindei i? Tug hon niyai munti lewo noni ba nipmot Ishak bibon midut nibikos ser sisarti bak Allah ei nimbar hum dokti. 22Jo nibreisi mem na bi e? Nide niba ningon comti kin niyai munti nya bicim tindei yam. Niyai munti nya bindei ba, nide niba ningon comti dem bimahan tu. 23#Kej. 15:6; 2Taw. 20:7; Yes. 41:8 Gima dem igbit Allah nihyet di ipas ei su “Allah pai sut Abraham bipia ningon kwes kin noni lewo ba ningon com Allah.” Gima rino Allah pai bak Abraham “Nani ne disut di dingon kieti ri.” 24Jo nibreisi bipia tungwatu nya igyai ningon di kwes kin Allah tug hon ide niba ningon comti he bi noro tug hon ide niyai munti nya cem.
25 #
Yos. 2:1-21
Nok gima cem tut Rahab di nibou sibui. Noni yai ningon kwes kin Allah tug hon niyai munti tirigi noni cigit mben Israel ibou can di ikwei ba iba itta sien ser ide siceu nya leu api Rahab ku yok nyahan bimpu yok leu binhyepo ingkwei hanyen kak puig hiter bingwes ngun.
26Gima rino gino ninnei kimbas ne ningut mai su. Bingon leu nok gino tungwagom yai niyai munti nya hi bi lene nide niba ningon comti cem mai su.
Currently Selected:
YAKOBUS 2: HAD
Highlight
Copy
Compare
Share
Want to have your highlights saved across all your devices? Sign up or sign in
