HOSEA 9
9
tuhan tri tut hukum di micut ei Israel dip
1Mben Israel e, ma jibon midut kep jide njap nindig nya noyam kin ngkiai nya au. Jikes jide Allah ei ba, jingon gom tut Noni bi kikau tu. Bikwop mpia di jico kep gandum eisi#9:1: Nipas kep mpia di jico kep gandum eisi: Yo dima ikui ug ei mpia dini yok mem ikuk yok bak ide kwar nya eisi. ne jitri jenti bijinok nikrar jut cig nya mem kwar Baal. Jingon kei sut gi jitug ndei gandum di jikan bipia Baal yai nok jimuhup bije! 2Noro jei bi ne jide gandum kin mini zaitun midem mem je bi. Ba anggur ngei cem mingwig leu je. 3Je di mben Israel e, mijibong kikau ei minu di tuhan yai bije bi. Suar jingkwei hanyen ug ei minu Mesir. Lene suar jiyem njita nipigig ser#9:3: Nipas kep njita nipigig ser: Nikos tutti nya di Allah tri tut biyok tug hon Musa di cuon ser yok tut njita ninyeng poi di igyem bikan bipia mibindei ba, map kui yokti. di bindei ba, map kui jeti ei minu Asyur. 4Bit bon jittei jide ba anggur ngei kin mindhe di jindig ei nimbar hum dokti mem jibipwoi tuhan ningon ei jingkiaisi dima kan bi. Jide njita di jiyem ei mpia dima mibindei ba, map kui jahagomti noyam kin njita di igyem ei midut nitig nimai ngutti. Njita dima kei mem gima ndei jinggumti he. Jigittei njita dima poi mien ug ei tuhan De Ig mem gima jibikuk je biDa bi. 5Tirigi tto bou dem mem jiba jide njap ndig binggei sut tuhan ei jingkiaisi ne bit bon jiyem pesta kep kan bi. 6Mpe dino mun di buhun tau kep je bibindei ba, jintek gimahap ug ei jingkiai ne mben Mesir mimbus jide tungwatu niken-ken di igwam nya keyam leu api migyai nimai biyok ba, ibitig ingut ei minu ndig Memfis! Mintu-minta kin ndia nggwen mehei ba, dwim kep igkumti jide nya kin jide ndigban perak di nibok kak nya di jo ei mpia dima.
7 #
Luk. 21:22
Nijam nikes hukum ei tungwatu nya dipti tau su. Njap dima ne njap nibuhup jide nibon munti nya hanyen bije ri. Tirigi nijam dima dem ne mben Israel ingkek kan hukum dima!
Jipai biyam “Nabi di ninnei bie tut no bbwe bibor. Mirei bon noni!” Jipai gima lewo jingon kinei sut da ba, jide sisar nindig bibor cem. 8Allah pinak da kwei nok nabi mem gima disok kep Nide limwa di jeni. Noro jibingon mem gima jisrou da bidem dimbutti nya nok tungwatu nya isrou ha nya. Limwa nya iba nitok bak nye di nabi nya ei minu di Allah ninyeng tak kep dini. 9#Hak. 19:1-30 Jibon munti nya kinei bibor bidem gi jibon ei minu ndig Gibea.#9:9: Nipas kep jibon ei minu ndig Gibea: Ei minu ndig dini ne mben Israel ibou poi di intun keret Benyamin him inggek tungwagom di ntun keret Lewi him nitnem mien. Igyai munti dini bindei ba, mben Israel ikon pran bit yam apino keret Benyamin ibou poi he ingwes ngun. (Angig ayai kep Hak. 19:21.) Allah miyok ngon kep jitunggweisi bikes hukum ei je dip drek dip jide sisar.
Israel de sisar kin ningat di ntun him
10 #
Bil. 25:1-5
tuhan pai “Nimbie him ngat di dittau kep mben Israel ne dingon nggei-hi-nggei bidem kep no di ttau kep ba anggur nghousi ei iggum ndigsi. Nimbie him ngat di dingat jidigup bat-jidigai bat nya ne dingon kei bidem kep no di ngat biei ara ningat gi nimbie him ngat. Noro mpe di yoni yuug krau Nungug Peor ne ikinyon ei nikuk no bak kwar Baalti. Apino map di kui kwar di ingon ngakei dimati kui yokti bu.
11Mben Israel ide ninyeng jeisi midimba bisar hak noyam kin ha di dimba di sar nyahan. Hi di nitta buhun bisrek tut munggwom nya cem bi. 12Mbro nok gino isrek tut munggwom nya ba, inyohou yok bindig lo, midikat yok ba, disindui sut munggwom gom ngat biniyaijo cem bi. Je di mben Israel e, tirigi diba dinghim bak je ne buhun bibor mem je!”
13 tuhan e, dingat siceu nya di yuhuk-huk nyen Ade limwa nya imunggwom bat nya ba, igyai nimai biyok. 14Suar dahara Na tut mindei mem yo dima i? Ma abindei sop di ide nya bipijet! Ma abindei ba, bit bon igyai ido bak munggwom ngwoi di ide nya kan bi!
tuhan kes hukum ei mben Israel dip
15 tuhan pai “Ikinyon ei ide nibon mun di kinei biborti ei minu ndig Gilgal. Dingon mpo tut yok ei sirigima drek dip ide nibon munti di kinei bibor ba, midijji yok leu Ditde minu dini bidingondut yok bu bi. Nibou di ide nya yahagom ihwen bit Da. 16Midikes hukum ei mben Israel dip. Yoni midem kep biei kioi di ita di ngat ningat bi kin nigau di mui bingwig leu ba, imbun imunggwom bi. Mbro nok gino imbun munggwom lo, midiyai nimai bak imunggwom bat di ingon ngakei yok dima.”
Nabi mbrap tut mben Israel
17Allah di diyai midyai mem mirok Nide limwa nya ei drek dip gi ikou sut ingig itingou mem nihyet. Yoni mimbut bibong-bong wai bidem dihyeisi dini bisrig ngkiai nya ikieti.
Currently Selected:
HOSEA 9: HAD
Highlight
Copy
Compare
Share
Want to have your highlights saved across all your devices? Sign up or sign in
