HAGAI 1
1
tuhan kes nihyet bak Nide limwa nya biwin Nide Ig hanyen
1 #
Ezr. 4:24–5:2, 6:14 Darius ninyeng tak kep Persia buug cut ari bingwam gi nican ei njap gi nigom mem bed gi nimuhwindagom lene tuhan sok nihyet ei Nabi Hagai dip. Nisokti dima bak nibou Zerubabel di Sealtiel nipmot ba, ninyeng tak kep mben Yehuda kin Imam Nibou Nindig di ninyeng Yosua di Yozadak nipmot cem.
2 tuhan Di Sindem Bibor pai bak Nabi Hagai “Yo dini ipai bipia nijam dini bon nikwesti mem iwin Ditde Ig hanyen bigyo.” 3Niabiati bu ne tuhan sok nihyet ei Nabi Hagai dip bak Nide limwa nya bipai, 4“Ditde limwa jen e, nggon rino jibon nituti mem gima jibong ser ig di sindem binddong kei lo, Ditde Ig wer igkum kroi bijo kikau nok gima i? 5Jingig jiyai kep mun di cut igkep je nya ug e! 6Jindim ningan mang ei miaisi lo, ningat di jiyai poi mien he. Jide njita no rinaha lo, dem mem gima ndei jinggumti bi. Jide ba anggur ngei no rinaha lo, dem mem gima bicut jinggobiausi bi. Jide sinsun no rinaha bijijuk ser jingkek lo, dem mem gima jijuk ser hou di kui jeti bi. Yo di igyai midyai ba, ibiyai imuhup itug ndei imuhup di dem mem gima ibinyohou ide niyaijoti nut bu bi. 7Jigingon huk niti tut bi e? Nggon rino mun dima yok cut igkep je i? 8Nogindini ma jikui ug ei nungug tou nya bijikut bum kwei mem gima jibiwin Ditde Ig leu api dingon mikei sut jiyai munti dima. Tug hon nisinati dima ne mijikuk je biDa nok gi dem hanyen bu. Ma jingig jiyai kep mun di cut igkep je nya! 9Jingon ya mem gi jiyai ningat di mpung bipias hagau ei beisi lo, ningat di jiyai rino poi mien bibor he leu api tirigi jittei gi ndima kwei lo, dihi dinnei eisi bidibindei ba, hou di dimiep bindei ba, njita ngwig hak leu je.#1:9: Nipas kep hou di dimiep bindei ba, njita ngwi hak leu je cem kei lene nipas kep kroi ningwig cem kei. Nggon rino diyai nok gima i? Diyai nok gima drek dip Ditde Ig di wer igkum kroi lo, bikwop tungwagom-gom ta nibou ei nide ig di ngotti. 10Gima rino biget but bi wer ninno apino njita kioi di jita nya gehei bi ug a. 11Dibindei ba, mpia ngei-ndung cut igkep jide dihyei kin nungug tou nya kin miai gandum nitu kin miai ba anggur nghousi kin miai biei zaitun nghousi kin njita di hei ei dihyei njek dip kin tungwatu kin mindhe-ndhe nimuhup tu nya kin miyai di jiyai nya ba, hagom mui ningwig a.”
Mben Israel ibit tuhan nicuk yokti
12Leu api Zerubabel kin Yosua igya tut ide limwa di mben Israel yahagom di ingkwei hanyen leu ingkiaisi ei Babel ibit Hagai di tuhan pinak kwei ndam yok tut nihyet di pai nya. Igyai mun ba, ibibit tuhan nicuk yokti nya lewo ittin tut Noni.
13Lene Hagai tri tut tuhan nisokti bak limwa nya bipia tuhan preu ei mem gima nyohou yok.
14 tuhan pingok ei Nibou Zerubabel kin Imam Nibou Nindig Yosua kin yahagom di ingkwei hanyen leu ingkiaisi kwei#1:14: Nipas kep di ingkwei hanyen leu ingkiaisi kwei cem kei lene nipas kep di siceu nya icom yok ug ei ingkiaisi bi cem kei. ingonti leu binhyepo yahagom impu yam tut midyai niwin tuhan Di Sindem Bibor di ide Allah De Ig. 15Ikinyon ei ig dimati biwin ei njap nyatungwagom bitai mem bed gi nimuhwindagom ei ari bingwam gi nican di Nibou Ndig Darius ninyeng tak kep yokti.
Currently Selected:
HAGAI 1: HAD
Highlight
Copy
Compare
Share
Want to have your highlights saved across all your devices? Sign up or sign in
