GALATIA 4
4
1Disum dihyet eisi bu. Mbro nok gino munggwom pinai ba nokep nicig de ndigban bininyeng tak kep hagom lo, gino noni mahan bigyo ne noni tereu nok awak he yo. 2Tirigi mahan bigyo lene nide andigpoi nya igyok igyai kep niyai munti nya bittei nibou nok nibou di kos tut mun di bitut noni hagom bibou tto bou di nicig preu ei mem noni dem ug e. 3Nok gima tut nyeni cem. Nipou tirigi imahan bigyo ne ninnei di inyeng tak kep mpia-bbed him kin dihyeisi dini nya yuubon nye ba, inok awak. 4Lene nok gima kikau bibou tto bou dem mem Allah cuk Nipmot kwei ei dihyeisi dini tug hon no di sop ug e. Ba, Puig Yahudi niggai serti ttei nibou nok nibou di kos tut Noni. 5#Rm. 8:15-17 Tug hon nisinati dima lene Noni kwek tungwatu nya leu Puig Yahudi niggai serti di ttei nibou nok nibou di kos tut yok di bindei ba, inok Allah nipmot bat nya.
6Allah kes Nipmot Ninnei ei jeni kin nyeni ingonti lewo yahagom inok#4:6: Nipas kep a lewo yahagom inok cem kei lene nipas kep a nok bindo ba, yahagom inok cem kei. nipmot bat nya. Ninnei dima bindei ba, yahara Allah “Arig e, Arig e!” 7Gima rino jinok awak bu bi. Noro jinok Allah nipmot bat nya. Allah miyai mun nyeng hagom di Noni tin ei mem nipmot bat nya bije drek dip gi jinok nipmot bat nya.
Paulus krau ningon tut timiei hanjop Galatia nya
8Nipou lene jikan tut Allah bi. Noro jinok awak mem ninnei nya di tungwatu nya ikuk yok bak lo, ninnei dima yok hagom ninnei nitrowai he. 9Noro tini bu ne jikan tut Allah lo, gi nijit ne Allah kan tut jeni. Nggon rino jingkwei hanyen kep ninnei nya di tungwatu nya ikuk yok bak di isindem bibon inyeng bi pima i? Nggon rino jisindui sut ba, ninnei dima yok yuubon je tereu nok awak nya hanyen bu i? 10Jidimig njap ngon bou kin bed ngon bou kin ari bingwam ngon bou hagom ei nok ngon bou di bon ninyeng mem je. 11Dikrau dingon tut je. Midyai di diyai ei jikieti pima hagom mikui-kausi e?
12Disut bat jen, ditigtai je leu binhyepo jinoyam kin da lewo dibibon danti bidinok jeni. Nipou lene jitunggwei sut mun nyeng gom di bitut dani bi. 13Jiyok ngon kep ninggwenti di cut igkep da di bon nituti nimbigom mem ditri tut Nihyet Di Kei bije. 14Mbro nok gino ninggwen di hwen da buhun tak je lo, jiyai ttin da bijirok da ei bi. Noro jicigit da noyam kin jicigit Allah de malaikati kin Kristus Yesus Nonti. 15Nipou ne jingon llei bibor! Noro tini bu ne mindei nggon ndei je i? Dikan tut bipia mpe dima ne gino bon jiyai kan ne jitin ei mem jiket jiyai njep leu lene jibicim hanyen biluei diyai njep. 16Tini bu ne jiba nitok bida drek dip gi ditri tut nihyet di nijit bije e?
17Yo di ikiek-kiek nyen Nihyet Di Kei ita ibou ei gi ibindei ba, jitti kin yok noro ingon kanti dima kei mem je bi. Ijoi sut gima jikes da ei ba, jingon nyei him yoni bu. 18Ningat ne gi kei rino tungwatu nya ita ibou ei mun di kei drek dip ingon kanti di kei. Dem tut gima iba ingon kanti di kei bibor behek tut je mem njap ngwa hagom noro mem nijam di dingat rin bit je he bi. 19Dimunggwom bat jen! Dinghim dut tut je noyam kin sop di ninghim dut tut munggwom. Dinghim dut tut je kikau bibou Kristus ningon mien paisi com nigau ei jingonti ug e. 20Dingon ya mem jeni. Gi kei rino dihwou bidingat rin bit je nogindini leu binhyepo diba dihyet di bindo bipia dingon a tut je lewo dingon kiowi tut je! Notou dimbus jingonti i?
Bindo leu Hagar kin Sara
21Je dino jingon bisau ndam gima Puig Yahudi niggai serti nya ninyeng tak kep je hanyen e, handei kon ba, jiyok ngon kep ditde nipingok jeti! Jingon dorti tut niggai serti nibokti ningat-ngat bi e? 22#Kej. 16:15, 21:2 Niggai serti dima pai bipia Abraham yai nipmot bat nya ibou can. Sop di awak srek tut hi lo, sop di niyati kwes srek tut hi. 23Sop di awak srek tut nipmot bit leu tungwatu nya ingut kanti noro sop di niyati kwes srek tut nipmot bit leu Allah nipreu ei mem Abrahamti. 24Diba yo cin dini bibiti ninda. Sop cin dini tereu nok nipreu eisi can. Nipreu eisi gi nigom ntun Nungug Sinai him ba, ndo tut Hagar lewo nimunggwom bat nya ne awak nya ri. 25Gima rino Hagar ne Nungug Sinai ei minu Arab ri. Hagar ndo tut minu ndig Yerusalem bitut timiei minu ndig Yerusalem nya yahagom di inok awak. 26Noro minu ndig Yerusalem di nimbier kim gwamti ne minu ndig di niyati kwes binok ipmem ri. 27#Yes. 54:1 Bit leu nok gi ipas ei Allah nihyetti,
“Na di sop di apijet yo e, ma angon llei bibor ug. Na di sop di anghim dut tut munggwom hi bi e, ma aba angon di kei bibor bimbos ug! Lewo sop di nijjep kes noni ei srek tut nimunggwom bat nya imang bibor dor tunggwei sop di nijjep kes noni ei bi sren.”
28Disut bat jen, jeni ne Allah nimunggwom bat nya rin ba, jintun Noni him tug hon Nide nipreu ei mem nyeti noyam kin Ishak di ntun Abraham him tug hon Allah nipreu ei mem Abrahamti. 29#Kej. 21:9 Nipou ne nipmot di nipmem srek tut bit leu tungwatu nya ingut kanti hwen bit nipmot di nipmem srek tut bit leu Allah Ninnei ningon kanti. Nok gima kikau kwei bipek ammani kep. 30#Kej. 21:10 Allah nihyet pai mindei binye i? Nihyet dima pai “Ma ajji sop di awak nipmot yoni ug. Lewo harin dima nipmot ba nokep ndigban nyeng gom noyam kin sop di niyati kwes nipmot a.” 31Gima rino disut bat jen, nyeni ne sop di awak nipmot bat nya rin bi. Noro sop di niyati kwes nipmot bat nya ri.
Currently Selected:
GALATIA 4: HAD
Highlight
Copy
Compare
Share
Want to have your highlights saved across all your devices? Sign up or sign in
