NEHEI LEUSI 26
26
tuhan De Prak Meng
(Kel. 36:8-38)
1Lene Allah pai bak Musa “Ma ahok Prak Meng#26:1: Nipas kep Prak Meng: Angig ayai kep Kamus (tuhan De Prak Meng). gom mem Da ba, abibon nimbumbati nya nok gini. Ma ayai minyahas linen di dia-diau kei ninghas di nok prak meng nimeng simnai ba, abien mong wol nimmun kin nghei nta kin gi ningwoi eisi. Lene abien kerub nya ingwes eisi bidis yam kikau ei nahacanti. 2Suar prak meng dima nimeng hagom noyam ba, nijeisi meter simnaibrimigcan lene ninyanti meter can. 3Ma anap prak meng dima nimeng muhwi kin yam nok nititut yam di jei bibor gom lene anap nindigsi nimeng muhwi kin yam nok nititut yam di jei bibor gom kin bu. 4Lene aba minyahas nimmun bibien nibisrousi nya ei ninghas him nya. 5Ma abien nibisrousi ningot muhwi sur nititut yam gom ninghas him nya lene nok gima cem mem nititut yam gom kin bu ninghas him nya lene nok. 6Ma aba mas bibon mun di buhum kin yam ningot muhwi leu binhyepo abuhum nititut yam dima hacem kin yam nok gom.
7Ma aba kambir nta bibien prak meng simnaibrimiggom bu leu binhyepo ibinggai kep Prak Meng pima. 8Suar prak meng dini nimeng hagom noyam ba, nijeisi meter simnaibrimigningai ba, ninyanti meter can. 9Ma anap prak meng dini yok nimeng muhwi kin yam ba, nok nititut yam di jei bibor gom lene anap nindigsi nimeng muhwindagom kin yam ba, nok nititut yam di jei bibor gom bu. Lene akrop nimeng gi nimuhwindagom kin yam mem gima ndun Prak Meng bei nibiho. 10Lene abien nibisrousi nya ningot muhwi kin nititut yam gi nigom ninghas him nya lene abien ningot muhwi kin bu kin nititut yam gi nican ninghas him nya. 11Ma aba ngkimom-tembaga bibon mun di buhum nititut yam dini hacem kin yam nok gom. 12Lene akes nititut yam nijeisi nikenti bindun Prak Meng bei nite dima kwei ndam mpia nikimbasti. 13Lene akes nititut yam dima ninyanti nikenti senti ningot muhwi bindun Prak Meng bei nite hi lene nikenti senti ningot muhwi bu bindun bei nite hi bu.
14Lene aba domba nikre ningkek di ningwoi bibon prak meng gom ba, aba mindhe-ndhe hiter ningkek di kei bibor kei bibon prak meng gom kin bu mem gima abimie kep Prak Meng di jo bijehei pima.
15Ma aba biei meng dia nisra bibon biei kibi nya bibingon nok ig hyei mem Prak Meng. 16Ma abon biei kibi dima nanaisi meter bitai ba, ninyanti senti ningot muhwindagom ba, muhwindagom. 17Ma aheu mun di nok keu di sren ningat can ei nijou bidem biei kibi nya hagom leu binhyepo bindei ba, icim bikinai Prak Meng nikiou nya. 18Ma abon biei kibi ningat ningot can mem ig hyei nite bei mpia nibiho. 19Lene aba perak bibon nikiou ningat ningot bitai mem biei kibi pima ba, nikiou can mem bikwop biei kibi gom lene nok. Ma abicim keu di sren pima gom ei nikiou gom ba, gom ei nikiou gom lene nok. 20Lene abon biei kibi ningat ningot can mem ig hyei nite bei mpia nijjai bu, 21kin nikiou perak ningat ningot bitai ba, ningat can bikwop biei kibi gom lene nok. 22Lene abon biei kibi ningat muhwindagom mem ig hyei ei nite di ndam mpia nikimbasti bu. 23Lene abon biei kibi ningat can bu mem ig nuhuisi. 24Lene abon mun di bipek biei kibi ningat can di jo hammi nuhuisi kin yam ei nitriti kui kikau ug bipek ninggrupti. Ma abindei biei kibi mem ig hyei di jo hammi nuhuisi hacem birap yam nok gima. 25Gima rino ig hyei ei nite dima mibon biei kibi ningat muhwindaningai bitut nikiou nya ningat simnaimuhwidip brimigtehigom di aba perak bibon ba, nikiou ningat can mem biei kibi ningat gom lene nok.
26Ma aba biei meng dia nisra bibon biei njiti di jei bibor ningat simnaimuhwidip. Ningat muhwi mem ig hyei nite hi. 27Lene ningat muhwi mem ig hyei nite hi bu. Lene ningat muhwi mem ig hyei ei nite mpia nikimbasti bu. 28Ma aba srak nya bingot biei njiti kin biei kibi pima kin yam ei nahacanti sur yam ei Prak Meng dima nuhuisi kikau ug bipek nuhuisi nitehi bu. 29Ma aba mas binggai kep biei kibi nya kin biei njiti nya hagom. Lene aba mas bibon srak mem gima asu biei njiti nya eisi. 30Ma ahok Prak Meng dima bit leu nok dicuk nati ei mbigdip dini.
31Lene ayai minyahas linen di dia-diau kei bu mem ban mbrawin hi kin bu ba, abien mong wol nimmun kin nghei nta kin gi ningwoi eisi. Lene abien kerub#26:31: Nipas kep kerub: Angig ayai kep Kamus. nya ingwes eisi bidis yam kikau ei nahacanti. 32Ma asreu ban mbrawin dini ei paku mas ningat bitaisi di apek kin cou nidihim bitai di aba biei meng dia nisra bibon. Ma aba mas binggai kep cou dini yok leu api ata hagom ei nikiou nya di aba perak bibon. 33#Ibr. 6:19, 9:3-5 Lene atas ban mbrawin dima titut yam bijo bijehei paku di apek kin bot ei Prak Meng ninsi. Lene akes Brua Gi Preu bitut tig mma can pima ei bei ninsi dima ba, ei ban mbrawin dima nite dima kwei. Lewo ban mbrawin kwas Gumihyep Di Kwes bijo ter leu Ditde Ninsi Di Kwes-Kwau. 34Lene aba Brua Gi Preu nibeng bikibou kep. 35Lene akes meja mem roti pima ei Gumihyep Di Kwes nite bei mpia nijjai. Lene akes mini njeng nidihim ei Gumihyep dima ndam nite bei mpia nibiho.
36Lene abon ninghas meng gom kin bu mem gima ndun ser dimbou huigya. Aba minyahas linen di dia-diau kei bibon ninghas meng dini ba, abien mong wol nimmun kin nghei nta kin gi ningwoi eisi. Lene abien ninghas him nya cem bu. 37Ma aba biei meng dia bibon cou ningat muhwi mem ninghas dima lene aba mas binggai kep hagom. Ma aba mas bibon nikoisi nya cem. Lene aba ngkimom-tembaga bibon cou nikiou ningat muhwi.”
Currently Selected:
NEHEI LEUSI 26: HAD
Highlight
Copy
Compare
Share
Want to have your highlights saved across all your devices? Sign up or sign in
