EFESUS 1
1
Paulus pigo yo di inggre kin mbusyamei ei minu ndig Efesus
1 #
Kis. 18:19-21, 19:1 Srat dini leu da di Paulus ba, dani ne no di ya kui Yesus tug hon Allah ningon kanti mem da ri. Srat dini mem Allah de limwa nya di ingon gom tut Kristus Yesus.
2Handei kon ba, Icig Allah kin Tuhan Yesus Kristus isingat tut je ba, ibiyai jingon jo nyahan.
Igyai mun di kei di bitut innei tug hon Kristus
3Jikwei ba, inggei sut Allah di nok ide Yesus Kristus Nicigya!
Lewo Noni njei mun di kei di ntun gwamti him ninyeng hagom bak innei drek dip gi inok gom kin Kristus. 4Allah dimig nye ei nok Nide limwa nya tug hon ide ninok gom kin Kristusti nipou tirigi Noni pai tes dihyeisi dini bigyo leu binhyepo ingon kwes-kwau ba, sisar hi rap nye bi ei Noni niyai him. Allah ningon ngakei nyeti bindei ba, 5Noni#1:4-5: Nipas kep ei Noni niyai him. Allah ningon ngakei nyeti bindei ba, Noni cem kei lene nipas kep ei Noni niyai him leu binhyepo igyaijo tug hon Allah ningon ngakei nyeti cem kei. kos tut nipou su bipia nek nye tug hon Yesus Kristus bibindei ba, inok nimunggwom bat nya. Kristus niyai munti ntun Allah ningon llei sutti kin ningon kanti nya him. 6Jikwei ba, inggei sut Allah di ninyeng jei drek dip nisingat tut nyeti di Noni njei bak nyeni tug hon Nipmot di Noni ningon him ngi-ngat!
7 #
Kol. 1:14
Lewo Allah kwek nye leu sisar tug hon Kristus nimaisi leu api bindei kos ser ide sisar. 8Allah nisingat tut tungwatu nyati ne kei ngat kei! Noni ba ningon di ki kin ningon di dorti tut mun nyeng hagom binjei nisingat tut tungwatu nyati dima bak nyeni nindig bibor! 9Allah yai midyai bibit leu Nonti ningon kanti. Gima rino Noni mbot kep tut nimimun di Noni tin ei nipou su binye. Allah kos tut nipou su bipia ningon kanti mipek kep mem tungwatu nya tug hon Kristus. 10Ningon kanti di Noni bindei ba, mipek kep mem tungwatu nya ndo binye bipia nipai testi ei gwamti kin dihyeisi dini hagom mibicim tindei yam nok gom ei Kristusti ba, Noni ttei nibou tut hagom. Allah ningon kanti dini mipek kep dem igbit tto bou.
11Allah bindei ba, mun di hagom pek kep mem tungwatu nya bit leu Nonti ningon kanti kin nikos tutti. Noni dimig nye habiei ei nimbie him bibindei ba, inok Nide limwa nya tug hon ide ninok gom kin Kristusti ba, niyaisi dini ntun ningon kanti him. 12Jikwei ba, nye di iba ingon com Kristus bibie inggei sut Allah tut nikei-kau-keisi!
13Jimiap Allah nicuk jeti tug hon Nihyet Di Kei di bindei ba, jiyai niteu leu sisarti kin niyaijo nijep. Jingon jo kep Kristus leu api Allah ba Nonti Ninnei di Noni preu ei mem nye bitak buk kep je bibindei ba, jinok Nide limwa nya. 14Ninnei dima tak buk kep nye mem gima iba nyekep mun di Allah preu ei mem Nide limwa nya. Gima rino ikan mungkun tut bipia Noni mibindei ba, igyati kwes. Jikwei ba, inggei sut Allah tut nikei-kau-keisi!
Paulus ngat nadi tindei yo di mbusyamei nya
15Gima rino tirigi dimiap tut jide niba ningon com Tuhan Yesusti kin jide ningon ngakei Allah de limwa nyati 16lene dipai sigyo bak Allah drek dip je bidikes dihyet hon kan bi. Dikwop kep jinyeng nya bidingat nadi tindei je, 17leu binhyepo Allah di ide Tuhan Yesus Kristus kuk No bak dinok Icig di kei-kau-kei mikes Ninnei ei je dip. Leu api Ninnei dima miyai jingon di ki bimbot kep tut Allah ningonti bije leu binhyepo jiya um Noni ei jingonti. 18Handei kon ba, Allah bindei ba, jintin kimbou ba, Nide nipigati piga digai jingonti leu binhyepo jingon dorti tut mun di jiba jingon com Noni tut tirigi Noni dimig je bijiyok jingon mem mun di kei bibor nya di Allah preu ei mem Nide limwa nya ba, 19jingon dorti tut Allah de nisindemti di mindur di sindem tut nye di ingon jo kep nya cem. Nisindemti dima noyam kin nisindemti di mindur, 20#Mzm. 110:1 di biwin Kristus hanyen leu nimai eisi leu api kes Noni bigwam kui Allah ninda com ei gwamti.
21Kristus ninyeng jei bibor dor njiriek nipai testi di ikrau kep nisindemti nya kin nibou ndig nya kin nibou mien nya bitut yo di inyeng jei nya yahagom di ingat rin ei mpia-bbed him mem nijam dini kin nijam di mikwei yo. 22#Mzm. 8:7 #Kol. 1:18 Allah om mun di hagom ei bijehei Kristus nimig him leu api bindei ba, Kristus ninyeng tak kep mun di hagom nok nibou ndig mem mbusyamei. 23Mbusyamei dima tereu nok Kristus ningut. Noni bindei ningut dima bikei-kau-kei ba, mun nyeng hagom ei tirima-tirima cem kei-kau-kei tug hon Noni. #1:23: Nipas kep mun nyeng hagom ei tirima-tirima cem kei-kau-kei tug hon Noni cem kei lene nipas kep Allah bindei ba, Kristus mpung tut Allah nikei-kau-keisi cem kei.
Currently Selected:
EFESUS 1: HAD
Highlight
Copy
Compare
Share
Want to have your highlights saved across all your devices? Sign up or sign in
