PETRUS GI NICAN 1
1
Petrus pigo Allah de limwa nya
1Srat dini leu da di Petrus ba, dinok awak mem Yesus Kristus bidiya kui Noni cem. Srat dini mem je dino jiyai jide niba ningon comti noyam kin nyeni tug hon ide Yesus Kristus di ningon sren-srau. Noni ne Allah kin No di teu nye leu sisar biyai niyaijo nijep binye cem ri.
2Handei kon ba, Allah singat tut je nindig bibor biyai jingon jo nyahan bibor bikum eisi bu tug hon jide ningon dorti tut Allah kin ide Tuhan Yesus ingon kanti.
Allah de nihig nyeti kin nidimig nyeti
3Allah de nisindemti di kei-kau bindei ba, nyeni igyai mun nyeng di isuar nya hagom mem gima igyaijo kin ingon di kwes. Noni bindei mbut mun dini yok tug hon ingon di dorti tut Kristus di hig nye leu binhyepo ipriet kin Nide nikei-kau-keisi kin ningon srenti. 4Tug hon nisinati dima lene Allah njei nisindemti di mindur kin gi nibok kui di Noni preu ei mem nye binye tu. Nisindemti dima mibindei kwek nye leu ingut kanti di kinei di kieng kep dihyeisi dini hagom leu api ipriet kin Allah niyaijoti di kei-kau-kei. 5Gima rino ma jiba jiyai munti di kei bibor bijibindei mbut jide niba ningon com Kristusti. Ma jiba jide ningon di dorti tut Allah ningon kanti di bindei mbut jide niyai munti di kei bibor nya. 6Ma jiba noom kep jingut kanti nya bindei mbut jide ningon di dorti tut Allah ningon kanti. Ma jiba jingon di nddong bindei mbut jide noom kep jingut kanti nya. Ma jiba jide niyai mun tug hon ningon di kwesti bindei mbut jide ningon nddongti. 7Ma jiba ningondut yamti bindei mbut jide niyai mun tug hon ningon kwesti. Ma jiba ningon ngakei tungwatu nyati bindei mbut ningondut yamti. 8Gino mun dini yok hagom ntun jingon him bikum eisi bu lene jide nibrim ningkekti kin niyai ningat mang biborti mintun jeni him drek dip jingon di dorti tut ide Tuhan Yesus Kristus ningon kanti mem je. 9Tungwa tou rino bindei mbut mun dini yok bintun ningon him bi niyai mmui su ba, ningon prion ser gino Allah piap nide sisar timiei nya leu no pima tu.
10Disut bat jen, ma jibrim jingkek leu binhyepo Allah nihig jeti kin nidimig jeti micom nigau ei jingonti binghig-niker. Gino jiyai nok gima lene jisrawir bi.#1:10: Nipas kep jisrawir bi cem kei lene nipas kep jicut ei sisarti bi cem kei. 11Apino jidem mem gima jicoi bit ide Tuhan Yesus Kristus di teu nye leu sisar biyai niyaijo nijep binye Ninyeng Tak Kepti di bit bon ug hon nohonti kan bi.
12Gima rino mbro nok gino jikan tut mun dini yok ba, jicom jigau ei nihyet di nijit di jiyaiti tu lo, dibiwin kep jingonti tut mun dini yok hagom kikau. 13Ei nijam di dingat rin ei dihyeisi dini ne dikan bipia suar diwin kep jingonti tut mun dima yok hagom. 14Dikan tut bipia jei bi ne diyaijo ngwig hon lewo ide Tuhan Yesus Kristus pai gini brei bida tu. 15Gima rino midibrim dingkek mem gima ditin puig di kei mem je leu binhyepo tirigi diyaijo ngwig hon tu ne jiyok ngon kep ditde nipingok jeti.
Ningginausi tut yo di ingat Kristus nikei-kau-keisi bou igyai him
16Tirigi ningginau je tut Tuhan Yesus Kristus nikwei hanyenti di bon ninyeng mem nye ne nindat kep mumpui di tungwatu nya itri tut bi. Noro ningat Kristus nikei-kau-keisi bou niyai him tu. 17#Mat. 17:1-5; Mrk. 9:2-7; Luk. 9:28-35 Nyeni ningat rin bit Noni ei mpe di Nicig Allah kon Noni ninyeng biyai nikei-kau-keisi bak. Mpe dima lene nihyet gom tibim kwei leu Allah Di Sieng-Siau nuhui him di pai biNoni “No dini ne Dipmot di dingon ngakei rin ba, dingon kei sut Noni.” 18Nimiap nihyet di tibim kwei leu gwamti dima tirigi ningat rin bit Noni ei nungug dip di kwes-kwau.
19Gima rino niba ningon com nihyet di nabi nitimiei nya itri tut dor njiriek bu. Gi kei mem jikrau kep nihyet di itri tut dima di nok mini ninjeng di piga digai nidinditi kikau bibou njap tek ba, hambong ninjeng piga digai jingonti ug e. 20Gi bon ninyeng rino ma jiyok ngon kep bipia gino Allah Ninnei pingok hi ningonti bi lene bit bon ningon dorti tut mun di nabi nya ipas kep ei Allah Nihyetti kan bi. 21Lewo nihyet di nabi nya itri tut tibim kwei tug hon tungwatu nya ingon kanti bi sren. Noro Allah Ninnei bie tut yok tirigi itri tut nihyet di kwei leu Allah Nonti.
Currently Selected:
PETRUS GI NICAN 1: HAD
Highlight
Copy
Compare
Share
Want to have your highlights saved across all your devices? Sign up or sign in
