KORINTUS GI NICAN 3
3
Awak gi preu nijep nya
1Jikan bipia dipas kepti dini tereu nok ningon jei sut nyenti hanyen e? E bi! Nisuar srat nibuwakti bit leu nok hiter isuar mem yonti bi. Nisuar srat nibuwakti leu yo di hiter mem nisu bije kin srat nibuwakti di jipas mem nisu bak hiter cem bi. 2Lewo jeni ne nyende srat nibuwakti rin ba, srat dima nibokti ningat rin ei nyeni ningonti bijo brei mem tungwatu yahagom ikwop kep bingon dor niti. 3#Kel. 24:12; Yer. 31:33; Yeh. 11:19, 36:26 Jo nibreisi mem yo dima bipia jinoyam kin srat nibuwakti di Kristus pas bipinak kwei tug hon nyeni. Noni ba buk ngei bipas kep srat bokti dima bi noro ba Allah Ninnei bipas kep. Noni pas kep srat bokti dima ei tig pasti bi noro pas kep ei tungwatu nya ingonti.
4Nipai nok lewo niba ningon com Allah tug hon Kristus di Noni yai binye. 5Dem mem nisimbot dat bipia nisindem mem midyai di niyai nya bi. Noro nisindemti di nimbun dima nitriti ne Allah ri. 6#Yer. 31:31 Noni sindem tut nye leu binhyepo ninok awak mem gi preu nijep. Gi preu nijep dima nitriti ne nicukti di tug hon srat bokti rin bi noro Allah Ninnei de midyai nya ri. Nicukti di tug hon srat bokti bie ug ei hukum nimai. Noro Allah Ninnei bie ug ei niyaijo nijepti.
7 #
Kel. 34:29
Allah yai gi preu di bie ug ei hukum nimai bipas kep ei tig pas dip biyai bak tungwatu nya lene Nide nikei-kau-keisi piga digai Musa niimaisi. Mbro nok gino Musa niimaisi di sieng-siau bitiei kei wer pimber hanyen nyahan lo, ninjeng dima piga sindem bibor bibindei ba, bit bon mben Israel itou kep Noni nggilun kan bi. Gino Allah nikei-kau-keisi piga gi preu di bie ug ei hukum nimai sieng-siau ne, 8jo nibreisi bipia nikei-kau-keisi di piga gi preu di tug hon Allah Ninnei de midyai nya sieng-siau dor njiriek bu. 9Gino gi preu timiei di bindei hukum nimai bon nikei-kau-keisi lene jo nibreisi bipia gi preu nijep di biyai ningon di kwes kin Allahti bon nikei-kau-keisi di nindig bibor bidor njiriek bu. 10Nipai mingat nok gini. Nikei-kau-keisi pren hanyen leu mun di bon nikei-kau-keisi nipou dima lewo mun di nijep bu bon nikei-kau-keisi di nindig bibor dor njiriek bu. 11Gino mun di bit bon jo kikau kan bi dima bon nikei-kau-keisi lene jo nibreisi bipia mun di jo kikau buug hon nohonti bi bon nikei-kau-keisi di nindig bibor bidor njiriek bu.
12Gima rino nibrim ningkek kep tungwatu nya lewo niba ningon com mun di jo kikau buug hon nohonti bi dima. 13#Kel. 34:33 Niyai kep Musa niyai kepti bi. Noni ba sinsun nghas binggai kep ser niimaisi leu binhyepo mben Israel ingat nikei-kau-keisi di sindi pimber bingwig leu noni bou igyai him bi. 14Yo dima ingkek ndok. Habiei kwei bipek ammani kep lene sinsun nghas dima bindei ba, mpe dino yo dima ikwop leu gi preu timiei nibokti lene ingkek ndok ser nihyet. Noro tirigi inok gom kin Kristus ne Allah Ninnei cug sinsun nghas dima leu yok. 15Nok gima mem nijam dini cem. Mpe dino ikwop Puig Yahudi niggai serti nya lene sinsun nghas dima no jo binggai kep ser ingona. 16Noro mpe dino tungwa hi kuk no ei Tuhan nimig him lene Allah Ninnei cug sinsun nghas dima leu ningonti#3:16: Nipas kep Noro mpe dino ... dima leu ningonti. cem kei lene nipas kep Noro sinsun nghas misindik leu niimaisi bit leu Allah nipas kep tut Musati “Noni cug sinsun nghas leu niimaisi tirigi noni ya ei tuhan Noho bei.” cem kei. 17Nipas kepti “Tuhan” ndo tut Allah Ninnei. Tungwa tou rino yai Allah Ninnei ei ningonti lene no dima niyati kwes. 18Tini bu ne sinsun nghas nggai kep ser nyeni iimaisi bu bi. Leu api Tuhan Yesus nikei-kau-keisi com ninjeng hanyen tug hon iimaisi di tereu nok kisina. Tuhan Ninnei luei kep nyeni itta sindam lene bindei ba, inoyam kin ide Tuhan di kei-kau-kei.
Currently Selected:
KORINTUS GI NICAN 3: HAD
Highlight
Copy
Compare
Share
Want to have your highlights saved across all your devices? Sign up or sign in
