KORINTUS GI NICAN 12
12
Paulus ngat ningat-hi-ngat nya
1Mbro nok gino ningat hi ntun ditde ningon di nggei him bi lo, dinggei sut Allah ningon kanti di Noni ndo brei bida tug hon ningat-hi-ngat di dingat nya. 2Dikan tut no di Kresten gom di Allah teu ba, buwak ug ei gumihyep di jo anai bibor ei gwamti ari bingwam simnaibrimigtai gi pini jug. (Dingon kiowi tut gino Allah teu no dima ningat buug sut ug ei gwamti e, he no dima ngat ningat-hi-ngat he e? Allah Nongkom kan tut.) 3Dindat kep mbigom kin bu bipia Allah teu no dima bibuwak noni ug ei gwamti. (Dingon kiowi tut gino Allah teu ningat buug sut ug ei gwamti e, he no dima ngat ningat-hi-ngat he e? Allah Nongkom kan tut.) 4Ug ei gumihyep dima rino noni miap mun di bit bon tungwatu nya imbot kep tut hanyen kan bi kin mun di harin dima tungwatu yahap iji tut hanyen bu a. 5Gima rino dingon jei sut no dima lo, dingon jei sut danti bi. Tut dani ne midingon jei sut mun di pek kep mem da di bindo bipia disindem bi nya. 6Gino dingon jei ne dinok no di nuhui buwei bi noro ditri tut nihyet di nijit-jau. Gima rino dingon jei sut ningat-hi-ngat di dingat nya bu bi. Lewo dikou sut gima tungwatu nya ikon dinyeng drek dip. Ma yo dima ikon dinyeng drek dip ditde midyai nya di ingat bou igyai him kin dihyet di imiap tu.
7Noro mun di biyai dinghuisi wei cut igkep da ser nhyema dingon jei drek dip mun di mipbor ngat di dingat bou diyai him au. Mun di bindei di dinghuisi wei tereu nok Bilis de awak di hwen bit da ser nhyema dingon jei au. 8Dingat nadi bak Tuhan mbiningai leu binhyepo kinding da bidikei hanyen. 9Noro Noni buhup “Ditde nisingat tut nati dem mem mun di asuar nya. Lewo anghuisi weisi bindei mbut Ditde nisindemti.” Gima rino dingon llei gi dingon jei sut mun di ndo bipia disindem bi nya. Lewo tirigi disindem bi rino dikan tut bipia Kristus de nisindemti nyohou da. 10Gima rino dingon cut hon ninghuisi wei di cut igkep da drek dip Kristus. Dinghuisi weisi kin tungwatu nya ighyet tigut dati kin mun di buhun di cut igkep dati kin tungwatu nya di ihwen bit dati hagom buhun mem da bi. Lewo mpe dino ditde nisindemti ngwig leu da lene Kristus sindem tut da.
Paulus krau ningon tut yo di ingon jo kep nya ei minu ndig Korintus
11Diyai mun tereu nok no di nintin kiek noro ningat ne jeni rino jibindei da nok a. Ningat ne ma jeni rino jikon dinyenga. Mbro nok gino dibon dinyeng bi lo, dani ei bijehei leu jide nibou di mipbor ngat dima yok bi! 12Allah bibon mindur kin niyai kepti di mipbor ngat nya ei jikieti tug hon da mpe di diba dingon di jo nyahan biyai kep midyai nya. Mindur dima yok hagom ndo brei bipia dani ne no di ya kui Yesus ri. 13Gino jibinai jenti kin mbusyamei hiter nya lene dibibon je haigtu bi sut mindei i? Tut gi dibindin je tut munkwas di jibahati tut da bi e? Nnaba jikos ser ditde niyai mun tunggwei sut jeti!
14Nogindini ditin ei mem dihwou ngat je mbiningai su. Gino dihwou lene dibindei ba, jingon buhun drek dip da bi. Lewo dinggok tut jide mun di jima nya bi noro dinggok tut gi jibit dihyet. Lewo dem tut gima munggwom nya iba mun di imbun nya bahati tut icig bat ipmem bat nya bi. Noro dem tut gima icig bat ipmem bat nya iba mun di imbun nya bahati tut munggwom di ide nya. 15Gima rino ditin ei mem diba dingon di llei bikwas mun di dimbun nya hagom tut je bidikes danti njem cem ei mem je. Gino dingon ngakei je nok gima ne dem tut gima jingon hou ser da drek dip e?
16Gima rino jice tut yam bipia dibindei ba, jingon buhun tut da bi. Mbro nok gima lo, bihi ipai kep da bipia dingon mang bidiba dihyet di mmau biris je bidiyem jimuhup. 17Notou diyem jimuhup i? Tug hon yo di dicuk yok hwou ei jikieti e? 18Dicuk Titus buhwou ngat je ba, noni hei sut isut no di Kresten gom. Titus yem jimuhup e? E bi! Lewo Titus nyeni niba ningon kanti di noyam biyai midyai lene niba nisinati di noyam biyai nibou tut!
19Mpaba jikan bipia hon kep nijam dini kwei ne nimbrap gau nyenti ei joho bei e? E bi! Allah ngat bou niyai him bipia nipai nihyet di nijit-jau bit leu Kristus ningon kanti mem nye. Lewo niba niyai munti nya hagom bibiwin kep jingonti! 20Dikrau dingon tut gima jei bi lene dihwou ngat je bidingat lo, jiluei jingonti bijibindei ba, dingon pus tut je drek dip. Lene ma jingat lo, diluei dingonti bidibindei ba, jingon pus tut da drek dip. Dikrau dingon tut gima dihwou ngat je bidingat lo, jiliriem yam cem jingon kinei sut yam cem jingon sibui sut yam cem jiba nitok biyam cem jihyet tigut yam cem jittei mumpui ei yamti cem jingon jei cem jisrep tut yam cem a. 21Dikrau dingon tut gima dihwou ngat je lene Allah bindei bidimmai sut danti bou jiyai him bidiyai nggwei kibor drek dip imang di ibon kikep sisar lo, ittin ser sisar nikrar kep yamti kin nicut tut yamti kin niba noho rok mun di kinei di ingat ingwes eisi di ikiek ndam Allah bi nya.
Currently Selected:
KORINTUS GI NICAN 12: HAD
Highlight
Copy
Compare
Share
Want to have your highlights saved across all your devices? Sign up or sign in
