TIMOTIUS GI NIGOM 4
4
Guru nitrowai nya
1Allah Ninnei ndo brei binye bipia ei nidipti bu tungwatu nya mikes ide niba ningon com Kristusti ei leu api iba ibou coi mem ninnei di kinei di ibindei srawir yok kin ninnei rom ide ningginausi. 2Ningginausi dini tibim kwei leu niris kep mun cig yuhui him ba, yo dini ingon mien ndok ser tu. 3Yoni isrin ser tungwatu nya bipai bipia ma iwak yam au. Ma igyem njita di ipigig ser au. Noro Allah pai tes njita dima hagom mem nye di ingon jo kep tu nya leu binhyepo ijem sigyo kep leu api igyem hak ug. Lewo ikan tut ningginausi di nijit di kwei leu Noni tu. 4Lewo mun di Allah pai tes nya hagom kei bibor kei. Harin dima ipigig ser njita ninyeng gom a. Gino ijem sigyo bak Noni tut njita hagom tu lene nnaba igyem hak ug. 5Lewo Allah di njei mun di kei eisi kin ide nijem sigyo kepti bindei ba, map kui njita dimati bi.
Ningginausi tut Kristus Yesus de awak di joi bibor
6Gino angginau mun di dicuk na tut dini bak yo di ingon jo kep nya lene gini bindo bipia nani ne Kristus Yesus de awak di joi bibor ri. Gino ayem njita leu Allah nihyet di yahagom ingon jo kep kin nihyet di nijit di abit kikau kwei bipek ammani kep cem lene gima bindo brei bipia amahan tu. 7Ma ambres nanti leu mumpui di bon ninyeng bi nya. Ma abingon-ngon nyen ba, abiyai hamem angonti di kwes leu binhyepo ayai mun bit leu Allah ningon kanti mem na. 8Gino abingon-ngon nyen ba, abiyai hamem anghuisi ne gini bon ninyeng lai-laide. Noro gino abingon-ngon nyen ba, abiyai hamem mun di bitut annei ne gini bon ninyeng mem ayai munti nya hagom lewo bon nide nipreu eisi mem gima ibiyai mun di kei mem nijam di igyaijo dini kin niyaijo ei nidipti bu. 9Mun di isimbot dat dima jit-jau. Gima rino ma tungwatu nya ice tut ba, ingon jo kep hak ug. 10Nyeni igyai midyai sindem bibor ba, ita ibou eisi lewo iba ingon com#4:10: Nipas kep Nyeni igyai midyai? iba ingon com cem kei lene nipas kep Tungwatu nya ikucang nye lewo iba ingon com cem kei. Allah di niyaijo di joi sut tungwatu nya yahagom igyai niteu leu sisarti kin niyaijo nijep. Noni teu yo di ingon jo kep nya leu sisar biyai niyaijo nijep biyok tu.
11Ma angginau yo di ingon jo kep nya tut mun dini yok ba, acuk yok leu binhyepo yahagom ibit. 12Ma asindui sut ba, hi ningwes om kep na drek dip gino anok pinjoi pilei au. Noro ma ando bindo di kei bak yo di ingon jo kep nya tug hon mun di tibim ei ahui him kin ayai munti nya cem ba, tug hon angon ngakei tungwatu nyati kin ade niba ningon com Kristusti kin angon kwesti. 13Ei nijam di dihwou ngat na bigyo dini lene ma ata abou ei nikwop kep Allah nihyetti brei bak yo di ingon jo kep nya lene arok kik yok ba, angginau yok cem. 14Ma anyohou nisindemti di Allah Ninnei yai bina nipou su tirigi nabi nya itri tut nihyet ba, nibou mbusyamei ikes inda ei abou nggram him. 15Ma abingon-ngon nyen mun dima yok mungkun kei. Abita abou eisi leu binhyepo tungwatu nya yahagom ingat gino abindei mbut ade midyai nya bou igyai him. 16Ma asok kep nanti tut ayai munti nya kin ade ningginau tungwatu nyati. Leu gino aba angon di gom biyai gima yok hagom kikau ne abiteu nanti bitut yo di intu kep ahyet cem ba, jahagom jingwes ngun.
Currently Selected:
TIMOTIUS GI NIGOM 4: HAD
Highlight
Copy
Compare
Share
Want to have your highlights saved across all your devices? Sign up or sign in
