PETRUS GI NIGOM 4
4
Ningginausi tut niyaijo nijepti
1Kristus yai ninghuisi di wei nok tungwatu lene ma jeni cem jiba Kristus nikos tutti dima bindei sindem jenti. Lewo no di yai ninghuisi wei kes hon ba, priet kin sisar bu bi. 2Hon kep ammani kui ne ma Allah ningon kanti om kep jiyaijoti ei dihyeisi dini lene ma jingut kanti nya om kep je bu au. 3Nipou ne jiyai munti nya dem kep nok yo di ingon tindur nya. Mpe dima lene jikrar kep yam cem jidut mun di pu je kikau cem jikwek njita cem jibihim cem jibon pesta kep jide kwar di jikuk je bak di bindei ba, tungwatu nya igyai ttin cem. 4Noro tini bu ne yo di ingon tindur nya inga leu je tut gi jipriet kin yok tut igyai munti di kinei bibor di igyai kikep nya bu bi. Gima rino ipai je kinei. 5Noro suar ibuhup tut igyai munti dima hanyen ei Allah Noho bei lewo Noni tin ei bigwam nok nikei mem yo di igyaijo kin yo di imai su nya. 6Tut gima ripo hi tri tut Nihyet Di Kei bak yo di imai su nya di itug ndei nimai noyam kin tungwatu nindigsi lewo Allah kes hukum ei yok dip. Mbro nok gima lo, Nihyet Di kei tibim ei itingou nsi leu binhyepo bon nituti mem innei yai niyaijo nijep bit leu Allah ningon kanti mem yok.
Ma inyohou nisindemti di Allah kwas tut nye
7Son dideu njap ningwig honti tu. Gima rino ma joom kep jingonti ba, jiyai ngkiem cem leu binhyepo bon nituti mem gima jingat nadi. 8#Ams. 10:12 Gi bon ninyeng dor njiriek nindigsi nya rino nicukti di bidip huk je leu binhyepo jingon ngakei yam mungkun kei. Lewo ningon ngakei yamti dima mibindei ba, jikos ser sisar di jibon biyam. 9Ma jicigit yam kui ig lo, jilua sok tut au. 10Ma bikwop tungwagom-gom nyohou nisindemti di ter leu yam di Allah kwas tut je leu binhyepo jiba nisindemti dima yok bahati tut yam. 11Ma no di tri tut nihyet tri tut Allah nihyet. Ma no di mpu hiter ba nisindemti leu Allah bimpu yok leu binhyepo jiyai munti nya hagom bindei ba, tungwatu nya ikon Allah ninyeng tug hon Yesus Kristus. Allah rino nyeng tut nikei-kau-keisi kin nisindemti kikau buug hon nohonti bi. Igbit ri.
Jiyai ninghuisi wei drek dip gi jinok yo di Kresten
12Disut bat di dingon kieti jen, ma jinga leu sut ninghuisi di wei bibor di cut igkep je di bingon je tereu nok mun di buhun bibor di cut igkep tungwatu nya bikwop njap ngwa hagom au. 13Tirigi jiyai ninghuisi wei bit Kristus lene ma jingon llei sut. Mpe dino Kristus de nikei-kau-keisi ttau bijo brei ei jiyai him ne jingon llei bibor. 14Gino hi pai je kinei drek dip gi jibit Kristus lene ma jingon nggei-hi-nggei lewo jikan tut bipia Allah Ninnei di kei-kau-kei ningat rin ei jingonti drek dip. 15Ma jigom yai ninghuisi wei drek dip sisar nihwen mun kin ninggimang mun kin nimbuk tut tungwatu nya kin nikwek dat mun nyeng hi au. 16Ne gino jiyai ninghuisi wei drek dip gi jinok yo di Kresten lene ma jimmai sut au. Noro ma jipai sigyo bak Allah tut gino ipai sut je bipia Kristus ninyeng tak kep je a.
17Nijam mem Allah mbus tungwatu nya ingonti dideu su. Noni mimbus Nide limwa nya ingonti bibie. Gino Noni kinyon ei nimbus ingonti bibie ne notou mem yo di ingon jo kep Allah Nihyet Di Kei bi nya i? 18#Ams. 11:31 Bit leu nok gi ipas ei Allah nihyetti “Gino nggruk bibor mem yo di ingon sren nya igyai niteu leu sisarti kin niyaijo nijep ne notou mem yo di ibit Allah nihyet bi di ibon kep sisar i?”
19Gima rino gino yo di ingon jo kep nya igyai ninghuisi wei bit leu Allah ningon kanti mem yok lene ma ikuk yonti bak Noni tug hon igyai munti di kei bibor nya lewo Noni ne ide Nipai Tes Mun Cig di ningon prion ser Nide nipreu ei mem yokti bi sren ri.
Currently Selected:
PETRUS GI NIGOM 4: HAD
Highlight
Copy
Compare
Share
Want to have your highlights saved across all your devices? Sign up or sign in
