KORINTUS GI NIGOM 14
14
Nimbot kepti poi mien bu tut nisindemti di Allah Ninnei yai binye
1Ma jita jibou ei ningon ngakei yamti. Ma juhuk bram nisindemti nya di Allah Ninnei yai binye lo, ma juhuk bram nisindemti di bindei ba, jitri tut Allah ningon kanti dor njiriek nisindemti nindigsi nya. 2No di ba nihyet mindur bimbrap mbrap bit tungwatu nya bi noro mbrap bit Allah lewo tungwatu nya imiap nihyet bi. Allah Ninnei bindei ba, noni mbot kep tut mimun di Allah Nongkom kan tut nya. 3Noro no di tri tut Allah nihyet tri tut bak tungwatu nya leu binhyepo biyai sindem yok ba, ibrim ingkek lene biwin kep ingonti cem. 4No di ba nihyet mindur bimbrap biyai nisindem bak nonti njem he noro no di tri tut Allah nihyet biyai nisindem bak yo di mbusyamei nya yahagom.
5Dijoi sut gima jahagom jiba nihyet mindur bimbrap. Noro dingon llei bibor tut gino jiyai nisindemti mem gima jitri tut Allah nihyet. Lewo no di tri tut Allah nihyet bon ninyeng dor njiriek no di ba nihyet mindur bimbrap. Gino hiter di ba nihyet mindur bimbrap luei nihyet mindur dima hanyen bijo nibreisi biyai nisindem bak yo di mbusyamei nya yahagom lene dem. 6Disut bat jen, gino dihwou ngat je bidiba nihyet mindur bimbrap lene notou nihyet dima mpu je i? Mpu je bi! Gino dihwou tri tut nihyet di Allah mbot kep tut bida kin Nide ningginausi ba, diprios kep nihyet cem lene dem.
7Dibingon tut mun di ikek di ninnei jo nuhwap nsi bi nya nok suling kin nggong mbrei ba, gino ikek haigtu bi lene notou nindigsi nya imiap igbit nibimbiti di ikek dima i? 8Gino no di miep pun mbrei ba, binduk tentara nya kwei miep pun mbrei haigtu bi lene tentara tou rino mitin ei mem nikon pran bit siceu nyati dima i? 9Nok gima tut nisindemti di bindei ba, jiba nihyet mindur bimbrap cem. Gino jiba nisindemti dima bitri tut nihyet brei bak tungwatu nya bi lene imiap jihyet bi. Jihyet mbut sir itingoua! 10Tungwatu dihyeisi dini iba nihyet mang bibor bimbrap ba, bikwop tungwagom-gom ningon dor nonti nihyetti. 11Noro gino dimiap nihyet di tibim leu tungwagom nuhui him bi lene no dima ne ngkiai rin ba, noni kan bipia dani cem ngkiai. 12Gino jingon llei ndam nisindemti nya di Allah Ninnei kwas tut je lene suar jingon llei ndam nisindemti nya di biyai nisindem bak yo di mbusyamei nya.
13Gima rino ma no di ba nihyet mindur bimbrap ngat nadi leu binhyepo noni yai nisindemti mem gima luei nihyet mindur dima hanyen brei bak tungwatu nya. 14Gino diba nihyet mindur bingat nadi lene dinnei ngat nadi noro dikan-kan nyenti mbut bit bi. 15Gima rino dibon mindei i? Dibon nok gini. Diba dinnei he bingat nadi bi noro diba dibou ngwakti cem bingat nadi. Diba dinnei he bipai doia bi noro diba dibou ngwakti cem bipai doia. 16Leu gino jiba jinnei he bipai sigyo bak Allah lo, hiter di miap Allah Ninnei nihyet di mindur bi srig jikieti ne bit bon no dima pai “Igbit ri!” hanyen drek dip jide nadi kan bi. Lewo miap igbit jihyet bi. 17Mbro nok gino jide nadi nibipai sigyo bak Allahti igbit lo, nadi dima sindem tut no dima bi sren.
18Dipai sigyo bak Allah tut gino ditde niba nihyet mindur bimbrapti dor njiriek jahagom di jide niba nihyet mindur bimbrap nya. 19Mbro nok gima lo, tirigi mbusyamei nya idem yam lene dijoi sut gino dipai dihyet nitun muhwi bitibim brei ei duhui him ba, yo di mbusyamei nya imiap igbit leu gi ma diba nihyet mindur bipai dihyet sribu simnai biyok a. Dingon llei sut nok gima leu binhyepo dibingginau yok.
20Disut bat jen, ma jikan-kan nyenti noyam kin munggwom nya ikan-kan nyenti au. Tut mun di kinei nya lene ma joom je bijinok munggwom di ingon ngun nya. Noro tut jikan-kan nyenti nya lene ma jimahan nok andigpoi. 21#Yes. 28:11-12 Bit leu nok gi ipas ei Allah nihyetti,
“Tuhan pai ‘Midisok dihyet ei yo di iba mbrei ighyet bimbrap kin yo di iba ngkiai ighyet bimbrap dip bak Ditde limwa nya noro ingig itingou mem dihyet bi.’ ”
22Gima rino nisindemti di bindei ba, hi ba nihyet mindur bimbrap dima ne bindo mem yo di ingon tindur nya rin noro mem yo di mbusyamei nya bi. Nisindemti di bindei ba, hiter tri tut Allah nihyet ne bindo mem yo di mbusyamei nya rin noro mem yo di ingon tindur nya bi. 23Gima rino gino yo di mbusyamei nya yahagom idem yam biba nihyet mindur bimbrap lo, ngkiai nya kin yo di ingon tindur nya icoi bit yok lene yoni mipai bipia ninnei rom kui jahagomti tu bi e? 24Gino jahagom jitri tut Allah nihyet lene ngkiai nya hi e, he no di ningon mbum hi e, coi bit je lene nihyet di jitri tut mitot ningonti lene gima bindei ba, ningon muhukti tut nide sisar nya. 25Leu api no dima mipai jit nide sisar di jo nding ei ningon bei brei bak yo di mbusyamei nya lene bikuk no bak Allah bipai “Jit-jit Allah ningat rin srig jikieti.”
Jinyohou dimig mun di bitut mbusyamei sindam
26Disut bat jen, gini ne ditde nipingok jeti nya ri. Tirigi jidem yam ei mem jikuk je bak Tuhan ba, hi kon doia lene hi ngginau tungwatu nya lene hi tri tut nihyet gom di Allah mbot kep tut binoni lene hi ba nihyet mindur bimbrap lene hi luei nihyet mindur dima hanyen brei bak tungwatu nya lene nok. Noro ma jiba nisindemti dini yok hagom bingginau yo di mbusyamei nya leu binhyepo ingwes gwam yamti tut. 27Gino jibou poi jiba nihyet mindur bimbrap lene ma jibou can jibou ningai he ba, jimbrap sindam sri lo, ma tungwagom luei nihyet mindur dima hanyen brei bak tungwatu nya. 28Ne gino no di luei nihyet mindur hanyen brei bije ningat rin bi lene ma yo di iba nihyet mindur bimbrap dima ikimut yuhui ei yo di mbusyamei nya yoho bei. Noro disindui sut ba, imbrap nyahan bit Allah ei ingonti. 29Gino jibou poi jitri tut Allah nihyet lene ma jibou can jibou ningai he ba, jimbrap kikep sindam lene yo di mbusyamei nya iba ingon srip huk nihyet di itri tut dima ug e. 30Gino Allah mbot kep tut nihyet gom bak no di ningat rin ei jikieti lene ma gi hi di mbrap kes nihyet hon laide ba, kimut nuhuigya. 31Tug hon nisinati di nok gima bon nituti mem jahagom ba, bikwop tungwagom-gom tri tut Allah nihyet sindam leu binhyepo yahagom ipwoi ningginausi dima ei ingonti bibikum ei ide ningon jo kepti. 32Ma no di tri tut Allah nihyet nyohou pingok nisindemti di Allah Ninnei yai binoni. 33Lewo Allah joi sut yo di inyohou dimig mun di bitut mbusyamei sindam. Noro joi sut yo di ibon mun di bitut mbusyamei ariwace bi.
Bit leu nok Allah de mbusyamei hagom igyai kepti ne, 34ma sop nya di igwam bit yo di mbusyamei nya ikimut yuhui. Harin dima yahap iji bimbrap a. Ma sop nya yoom yok leu ba, ibie tut tungwatu nya au. Gini bit leu nok Puig Yahudi niggai serti. 35Gino sop nya ingon kiowi tut mun nyeng hi lene ma ihig ser ijjep bat nya tut ei ig bei. Lewo sop tou rikon nihyet bimbrap ei yo di mbusyamei nya ikieti bindei ba, yahagom immai sut.
36Mei! Jide mbusyamei ne nibousi mem Allah nihyet rin e? He Allah sok nihyet kwei ei nyeni dip bak jengkom he e? 37Gino jigom kan bipia noni yai nisindemti mem nitri tut Allah nihyet ba, Allah Ninnei yai nisindemti hi kin bu binoni cem lene ma noni yok ngon kep bipia mun di dipas kep tut bije dini ne Tuhan de nicukti ri. 38Ne gino noni ba ningha bak dipas kepti dini lene ma jiba jingha bak noni.
39Gima rino disut bat jen, ma jita jibou ei nisindemti di bindei ba, jitri tut Allah nihyet lene ma jicuon ser no di ba nihyet mindur bimbrap au. 40Ma jinyohou dimig mun di bitut mbusyamei tug hon nisinati di igbit di mbut sindam.
Currently Selected:
KORINTUS GI NIGOM 14: HAD
Highlight
Copy
Compare
Share
Want to have your highlights saved across all your devices? Sign up or sign in
