AŋRomans 4
4
1To mə sə pa thɔŋ-a ta Ebraham ɔbemba kȧsu ka rawuni kəpet ka su-e? 2kotȧy-e bepi ɔ sɔthɔ naŋ məmari salata mȧyɔs mɔŋ-e, ɔ ba naŋ rȧ ɔ gbəli kolonɛ, kɛrɛ rodi ka Kuru thahɔ. 3Ko mȧgbal məsəm mə pa-e? Ebraham ɔ lanɛ Kuru, ka a lɔm ti ro rɔŋɔŋ mɔlɔ min rə məlompi. 4Ɔwa kɔn ɔwe yɔ məpanth-e, a kəli hɛ ȧŋrȧm ŋɔŋ mɔ aboya, kɛrɛ pə yi mɔ ȧŋrȧm ŋɔŋ gbeŋ. 5Ɔwa kɔn ɔwe te yɔ məpanth, kɛrɛ ɔ lanɛ gbo kɔn ɔwe gbəli sɔŋ məmari ka ŋaŋ aŋa te yi alompi, a lɔm kȧlanɛ kɔŋ mɔ məlompi. 6Debid sɔ ɔ tɔri aŋruba ŋa ɔwuni ɔwe Kuru ɔ lɔma məlompi kəgbaskinɛ kəwur ka mȧyɔs mɔŋ. 7Ɔ pa hɔ, Aruba aŋ yi ka ŋaŋ aŋa a tera makənȧ maŋ, Yi aŋa ba ɛhakɛ ɛgbəpər.
8Wuni ka aruba wɔŋ ɔwe ɔMarki mɔ te lɔma kɔ ɛhakɛ yɔŋ.
9Aŋruba aŋe aŋ yi gbo ka ȧŋbirons son-i, thalɔm ka aŋa te yi abirons sɔ-i? kotȧy-e sə pa a lɔm kȧlanɛ ka Ebraham tə kəyi naŋ məlompi. 10Asabu areke mə a lɔm ki-e, yeŋka a birons kɔ-e, thalɔm kədarəŋ kati-e? Ka kȧbirons thahɔ, kɛrɛ ka kate birons. 11kɔ sɔthɔ aŋlomar ŋa kȧbirons tə kətɔri tɛntɛnɛ mȧlompi ka kȧlanɛ ȧke ɔ ba yeŋka a birons kɔ, kȧmȧ ɔ gbəli yi ɔkas ka ŋaŋ bɛ aŋa lanɛ hali ma a te tha birons ŋa, kȧmȧ a gbəli lɔma ŋa məlompi sɔ, 12dɛ yi kȧmȧ ɔ gbəli yi ɔkas ka ȧŋbirons-e, pə yi hɛ ŋaŋ aŋa a birons ka madɛr gbo gbɛt, kɛrɛ ŋaŋ aŋa taŋanɛ ɔkas kȧsu Ebraham ka kȧlanɛ ȧke ɔ ba yeŋka a birons kɔ.
13kotȧy-e aŋlahiri ŋa Ebraham dɛ yi aŋwuth ŋɔŋ, kəpa aŋ tə səkɛ aŋbȧki ŋa ȧdȧru, aŋ der hɛ kətȧŋȧnɛ ka ȧŋthɔ, kɛrɛ ka mȧlompi ma kȧlanɛ. 14kotȧy-e bepi ŋaŋ aŋa wop ȧŋthɔ aŋ yi aŋbȧki-e, kȧlanɛ kə səkɛ ayay, yi aŋlahiri aŋ thamrɔ, 15pəkasifɛ ȧŋthɔ aŋ tə kȧrȧ kathalər ka rȧbaŋ, kɛrɛ ro athɔ aŋ te yi, kələsər ȧŋthɔ kǝ yi hɛ ri.
16Tiyȧŋ aŋlahiri aŋ təmȧ ka kȧlanɛ kaŋka aŋ gbəli yi salata aboŋa; kȧmȧ aŋlahiri aŋ bȧkər ka aŋwuth bɛ, pə yi hɛ gbo ka ŋaŋ aŋa təmȧ ka ȧŋthɔ, kɛrɛ ka ŋaŋ sɔ aŋa yi ka kȧlanɛ ka Ebraham, kotȧy-e kɔnɔ yi ɔkas kȧsu bɛ, 17(mɔ mȧgbal məsəm mə pa, I po səki mu ɔkas ka tȧbona təgbȧthi) rodi ka kɔn ɔwe ɔ lanɛ, pə yi mɔ Kuru Məsaba, ɔwe kəlis aŋfi, dɛ yi ɔwe tela ɛyɛt ɛyɛ te tha yi mɔ ɛ yi. 18Ebraham-əŋ ma ɔ te sɔ ba rə ɔ gbak amera-e, halisa ɔ lanɛ rə kəgbak ȧmerȧ, kȧmȧ ɔ səkɛ ɔkas ka təbona təgbȧthi; mɔ mə ȧsim tə pa, Yaŋ aŋwuth a mu aŋ tə yi. 19Hali ɔ yema bȧk thɔŋ təren kɛmɛ kin-e, kɔ yi gbo mɔ wuni fi ka andɛr-e, kȧlanɛ kɔŋ kə thamrɔ hɛ, hali mɔ ɔ tȧrȧ sɔ kəpa Sara ɔ po thas ȧŋlɔkɔ tə kəkom. 20Ɔ sikɛ hɛ ti tə kəte lanɛ aŋlahiri ŋa Kurɔŋ, ɔ bȧkər gbo ka kəlanɛ, kɔ sɔŋ Kuru yiki. 21Ɔ lanɛ tɛntɛnɛ kəpa ȧtȧ Kuru ɔ po lahiri, ɔ ba afɔsɔ tə kəyɔ. 22Tiyȧŋ a lɔma kɔ ti tə kəyi mɔ məlompi. 23Ɔwa a gbal hɛ ti ta atɔŋ gbo son-e, kəpa a lɔma kɔ ti tə kəyi mɔ məlompi, 24kɛrɛ ta ȧtȧ su sɔ. Ɔwa Kuru ɔ tə kəli kȧlanɛ kȧsu mɔlɔ min, bepi sə lanɛ kɔn ɔwe yokas Yisɔs Krayst kȧsu ka aŋfi. 25Ɔwe a sɔnd salata ɛhakɛ ɛ su, ɔwa a yokas kɔ kətɔŋ ka aŋfi kȧmȧ sə gbəli sɔthɔ məmari.
Themne New Testament © The Bible Society of Sierra Leone, 2009.